Adahe: Rikun Papet

Mapublika gi un` gasetan iya Hong Kong kometsiante siha ginen China ni man-miyinariun papet. Un` ratutu ha` mañgahulu` kabu` niha. I problema gaige `an manmafaisen para u fan man-apase. Seru! Taya` salape` gi lepblun bankun niha.

Hinatme Marianas nu este na klasen kometsiante. Mauleg i kabisiyun i hegsu` I Deni` umarikonose haye este na kompania pot proteksion fondun iya Marianas. Muñga na uma-aksepta sin kabales na hinisgua haf` tinatten niha gi bandan fondu.

Ti chagu` yan pa`gu siempre tafan konbetsasion haf` masusedi. Lastima i inañgoghu ni tai tinate fotmat na fondu.

Futuna-ta: Maseha tafuñut pinadesisita gi halum sapet na kondision kinalamten familia ta suñgun pot satbasion-ta, diariu.

Este na obligasion mana`e i mansabiun I Deni` para u kayun mas asegurau yan libianu na chalan pot kualidat linala` tautau-ta.

Gaige na mau`udai este na diniseha gi homlu` na ekonomia. I homlu` na ekonomia libianu ha hatsa yan gama mauleg todu bote gi sagua`.

Hu akanteha haf` siha man-mapetsige guine na patte. Seru! Mas man-makalamya gi hatsadan sueddun niha. Gi halum este na diskuidu mas maluñu` ha`anen mayotmente ni manma-emplelea. Taya sattun na konsiderasion para uma-adelanta ha`anen empleau ni gumagana sueddun popble taimanu pinila` i federat. Tiempun “biliba” otru sakan.

***

Biba: I papulasion Marianas kase 56-mit na tautau. Lau pa`gu na Noche Buena 29 na mansabiun hegsu` I Deni` solu para u ginitai bonitu na ha`anen gupot siha. Los dimas memegaiña u fan ñgaha` hulu` gi lañget man-`emisirikotdia! Estague` na chinatsaga `nai mapega ha`anen linahyan.

***

`Nai hahatsa sueddun niha gi $71,100 gi sakan kumeke ilegña na debi lokue` u kabales kualifikasion niha tat kumu edukasion kolehu yan suffisiente na ekspirensia. Kuantu gi Da Boysis man-magradua gi kolehu? Kuantu mangai degree masters pot asuntun gobietnu? Guaha mohon mediu gi halum 29 na membro?

***

Dibi: Ñgai`an si señot Biktot Hokog `nai para unana`lu i $400,000 na salape taxpayers ni ha lagnos para bisnis familiaña? Guaha i Attorney General mapetsisige pot este na asuntu? Pot fabot sa` seriosu ayu na malabida ni umakontra yan mandatun konstitusion pot magastan salape` taxpayers.

***

Ha`ane: Huli`e motmut uchan gi sanhaya mientras malag gi sanlagu i kumeke diñgu hit na minachum atdau. Hu kontinua mañgge` gi komputa. Sige ha` lokue` estotbun man-a`atotpe siha asuntu gi titanoshu mayotmente pot asuntun linahyan.

Guaha `nai chumaleg ñaihon-yu` na debi bai deskansa sa` taya`yu` umapunta polisian publiku. Lau i sensian responsable na sudadanu umafuetsas attension-hu pot proteksion i publiku gi halum estrakadan lina`la`.

Hinimiddi: Umasoda`yu` yan un` popblen amku` ni humatsaye kapiya i buttun Santa Maria gi kantun gima`ña. Diariu, humosme misa, macho`chu`, sumaunau gi lisayun familia dispues mañena. Sattun dibosioña gi as Santa Maria i nanan i Nanalibreta.

Ha pañgun interes-hu umadiñgane pot para bai fanuñgu` haf` gaige giya guiya na taiguihe na dinibotu gi as Santa Maria. Ha tanchu` hulu` ya ayu ha` ilegña, “Nanan i Sainata as Jesukristu”. Trabiha estudiante-yu` `nai huhuñgog fino`ña i amku`.

Sessu dispues mattu gi hinasog-hu ayu na fino`ña piot `an hu tucha tinayuyot-hu gi pa`gu manana Si Yuus. Magahet, debi u guaha luseru yan fitme na añklan espirituat para u gai sustansia linala`ta. Ti deskribiyun ayu na sensian kinententu i ginen hilu`. Felis ha`anihu diariu.

Gaige enteru inangohog-hu gi Saina. Hagas ha pipetyu` gi halum barañka siha na katsada. I nanata as Santa Maria lumasa ha`ihu `nai hana` katma sensiaghu diariu. Hahassu na debi u guaha luseru yan añkla `sino mattiñgan `nai `oggan galaidemu!

Bisita: Mattu tropan un` galaide` giya Luta ginen Guahan. Man-mafaisen hafa inañgai niha. Ilegniha na marikonose tanu` iya Luta. Ilegña un` tautau Luta, “Hagas ha` iya Luta guine tatnai humanau”. Dios mihu!

***

Nobia: Ha faisen-yu` un` nietu haf` taimanu para sañganeña ni nobiaña na bastague`. Ileghu debi un` tunase i hagan tautau. Ilegña na ti bonitu i mampos buena na palabra. Huna hassu na asuntun umadespatta esta ha` ti bonitu! Gaige asuntu gi dos patman kanaiña. Kase finu` pinasensia ha espipiha i prohimu. Lau ni taimanu makat asuntun umadespatta. Dios mihu!

***

Buena: Magof i amiguhu Magoo kumanta sunidun Noche Buena. Esta tutuhu` lago`ña `nai ha usune “A`silensiu A`pueñge”—Silent Night. Gai minanñge` este katen bulachu. Kontodu mikosmu mames. Tulanoche kumanta A`felis A`idat (Felis Navidat). Magof i amiguhu. Bueno! Na`e animu na Noche Buena!

Rininueba: Ayuda i chatsaga ya unna` chatsaga i gefsaga. Gaige este gi finu` ebañgheliu. Debi unna` fonhayan tumaitai todu atmos banda para un` komprende i finu` kinilun i Saina as San Juan Bautista. Hu pula` gi taiguine: Bai konsuela i gai chinatsaga. Dispues, bai atan haf` finaposhu pot para baina` lamauleg ha`anihu. Guaha dididi` chinatsaga `nai sinsiyu un rinueba ha`animu!