Selebrasion kuttura

Gi selebrasion kutturan tano`ta yan tautau-ta, propiu ta renueba haf` umatbansa modun linala` natibu desde antigu na tiempu.

Gaige hale`ña este gi estorian mañainata ni ta huñgog desde antes. Estague` na sahyan umesgaihon linala-ta pot taya` mantuge` gi liñguahita gi antigu na komunidat natibu.

Klaru na liñguahen estoria! Ginen este `nai ta sustene haf` iyota.

Oppan i maladisision kada nasion ni humatme tano`ta preparau para u destrosia liñguahe yan kuttura-ta. Gi sakan 1668 i primet biahe `nai ma-establese fotmat na sisteman edukasion giya Guahan as Pale Luis De San Vitores.

I matuge` finu` Chamorro malimitte gi materiat relihion Katoliku. Kase estague` lokue` chumachalane ineyag ABCD yan AEIOU gi mas elementariu na matuge` finu` Chamorro. Enfin, mababa apppottunidat.

`Nai sige hu petsige haf` siha mantuge` pot fina`pus natibu, memegaiña sineda`hu gi materiat relihion desde dottrina yan kantan Guma` Yuus. `Nos kuantos lokue` gaige gi matuge` na disision kotte antes.

I PSS mauleg gi finana`guen liñguahe konbetsasion yan matuge` Chamorro. Huli`e gi dos nietu tinige` niha komplidu na sentensia. Ma`lag ha espehus este superiot na kualidat maestra gi leksion finu` Chamorro. Saludu yan sinsiyu na agradesimentu para si Señora Alma K. Villagomez.

I para ta atbansa sumustene kutturan natibu debi uma`udai gi fitme yan lagse` na galaide` liñguahen tanu parehu ha` Chamorro yan Karolinas. Este i solu sahyan gi todu animuta para ta sustene pogse` haf` iyota.

Achaki: Mampos na chatsaga minalañgu gi maseha haye gi familia. Mas makat `nai i chenot didog `sino ti amtiyun. I mana` sagan malañgu gi hospitat pat manahanau para hospitat hiyuñg Marianas otru katgu na sumen makat gi familia.

Malofan-yu` siete años segidu guine na katsada `nai guahu tinetpe nu este na chinatsaga. Uttimu esperansa yan inañgoghu i hu pega enteramente ha`anihu gi kanai i Saina. Sinparat lokue` mangagau-yu` minesñgon-hu pot para bai siña umatende malañgu-hu.

Grasias adios na mana`e-yu` ni finaisenhu ni Saina, patronhu as St. Jude yan nanan yine`ase` as Santa Maria. Añklan espirituat solu fitme gi halum manloka` lañgat sapet gi lina`la-ta. Tat mas ke bendision i Saina!

Talaya: `Nai man-famaguon ham, sessu in` dalag un` bihun mame tumalaya giya Puntan Muchot. Dispues de ha dagau, ha tantan tapadan tiau yan faya gi hilu` unai. In` ge`naf, hinagua, yan pega gi lagua`.

`An man-mattu ham gi gima`, in` kamyu dos ma`sun ni manadaña gi mañge` na kelaguen tiau. Mañge` na amotsa. Hu sen agradesi ayu na biahen mame yan i amku` pot nesessidat mantension familia.

Sessu lokue` manbiahe ham para i lanchun as Perdido yan Tagpochau man-mananum `agun natibu para usun familia. Desde todu klasen choda, sune, kamute, nika, yan dagu in` tanum.

Ha fanu`e ham si tatan mame satbasion gi hilu` te`ug na pinepble. Satbasion gaige giya hagu ya solu ke kalamten hau siempre puru yeñgyuñg adeñg todu dia yan inairen tililpas lodu`.

Anaku` yan makat ayu na tiempu `nai megai mantai che`chu` gi hinanau i Navy guine. Sinparat kada unu yan todu mañaunau gi inaligau mantension familia desde chagchag oga`an esta i oran deskansu `an pueñge. Ti anog i pinepblen familia sa` mayotmente mamopble guine na mattiru.

Katma: Guaha `nai malag kantun tasi-yu` gi lemlem tautau. Bonitu, kulan isa i mapagahes gi lañget. Katma i tasi haf` na laña, punta pot punta. Ayu `nai hu sosoda` ginefsagag-hu yan sensian katma gi uttimun ha`ane. Entre este `sino gi silensiu na patte gi barandan santatte.

Mauleg na eksisiu para unna` katma hinasso-mu diariu. Mas menos chathinasso-mu yan homlu` para hagu mismu. Liabianu un` atan katkuet asuntu gi merituña yan mauleg dispues na disposision. Mientras mas mona mas homhum i sanlagu. Finagpu` ha`ane giya paraisu. Katma.

Man-ñgiñge`: Kulan mas mafa` usu chikun fasu ke man-ñgiñge` na tiempu. Ti baba na eksisiu. Lau mas fitme man-ñgiñge` pot dos puntu: Respetu yan motmut bendision na u felis hinanau i patgon. Estague` minetgotña ma-implantan sensian hinimiddi gi famaguon-ta. In` hassu si Judas `nai ha chiku si Jesukristu dispues ha traidute?

Dinage: Ilegña un` afamau na titige` na i dinage ni kada ratu marepite siña dispues mahoñge na magahet. Ni taimanu na salamañkamu ni asuntu, faktu na i dinage intaktu dinage! Mañgge konsensia-mu kumu echu tautau? Adahe na heñiu para un atisa dinage!

Peskadot: Humanu peskadot halum tanu` yan ga`ña galagu (kasadules). Magahet na mañgone` binadu. Megai lokue` hinekaña chada` `nai ha soda sabanetan sasñgat. Ti hoñgiyun dañkulun chada gi dikiki` na paluma!

I kutturan maseha manu na tanu`, gaige liñguahe, relihion, trahe, kanta, baila, che`chu` yan areglun familia yan relasion mauleg na komunida. Un` asuntu hu soda` parehu maseha manu giya Pasifiku: kutturan inana`e. Metgot este antes gi hagas soñgsoñg Chalan Kanoa.

Huñgan man-a`ana`e hit esta pa`gu piot i man-hihot na familia. Estague` kustumbren tautau isla maseha manu. Libianu ta kubre nesessidat haye na che`lu mamakat ha prebeniyen maisa familiaña.

Este na sensian yine`ase` ginen mañaina-ta. Poresu na `an ta lagnos kanaita man-ayuda klaru na ginen i korasonta. Mauleg tafama gi karera mona.