Mamantenin pagamientu

Un` kolumnista (columnist) ha rekomenda na uma-manteni tatte pagamientun Congresson iya America estake ma-apprueba tahguen Obamacare—ayudun gaston hinemlu—para i man-namase` na sudadanu.

Guine, kase mauleg lokue` tagu`ot tatte pagamientun hegsu` I Deni` estake mana` guaha dañkulu na adelantu gi monedan familia siha gi enteru iya Marianas. I betsan niha manafofo`na ke publiku.

Pot mas ke 20 años manunug i asuntun kulan mohon gada` papaya ni madagau gi un` banda kinibrutu. Lau mahatsa sueddun niha mas ke 50 pot sientu. Estague` na rekueddu ginen i mangaige pa`gu gi hegsu` I Deni`!

Masuñgun ni publiku este na diskuidu mientras sige mapañot kumahulu` presiun nesessidat siha gi parehu na tiempu sin hatsadan sueddu. Buente mapopo`lu na makinan basula i linala` familia mina` mahasñgun ma-upus! Adahe na che`chu` kabron para uma-upus nesessidat publiku gi fache` sisonyan miserapble na pinepble.

Na ti man gai familia hamyu para in`li`e na parehu te`ug na pinadesi piot sa` mas ke 20 años ni in` letke este na asuntun linahyan?

Kuttura: Dispues de tafa` akustumbra usun una kosa, piot ya adelantu gi linala` linahyan, sige mona estake sumaga kumu patte gi kuttura-ta. I masimientu ya ma`ug mama` tradision tanu`.

Fangualu`an un` offisiu ni ma-embrasa ni man-antigu na mañaina-ta pot mantension familia. Entalu` tinanom yan pinegsai `nai masusteni linala` familian natibu. Dispues man-hanau hit para i moseria. Adumididi` maliñgu gi espehos santatte hagas tradision tanu`.

Mas maliñgu gi hinalum mafanana`an “Digital Age,” usun internet. Puru usun yemi` batunes `nai todu manalag papapa`. Matai konbetsasion kontodu hagas amtau na inatuñgu` familia gi lamasan sena. Mauleg in` atetuye umaregla este na patte gi kinalamten familia.

Siña ha` guaha na patte gi kutturata maliñgu gi halum guinaifen mañglu`. Poresu na presisu na este na asuntu un` komprende haf` sustansian “maisa” sino “self”. Guaha kada natibu dignoña para u gu-ot yan defende kutturaña kumu finañagun isla.

Kulan este inachoneg sensia: haye batbaru, hagu pat i ga`mu galagu? Gigon un` sedi kinalamot hau! Tohge ya un` defende hau sa` hagu mana`e titanos!

Mapunu` Malañgu: `Nos kuantos estados sumedi ma-ayudan malañgu ni sala1 chenotña matai ni mafanana`an “assisted suicide”. `An konfotme i malañgu madulog ni mediku ya matai gi halum una ora dimas de u famadesi mas.

Este na disision guaha `nai mattu ginen kompanian insurans (insurance) `nai ti malagu` man-apase mas setbisiun mediku gi malañgu pot guaguan. Ma-rekomenda dulog deskansu. Dañkulu na estotbu este na disision bisnis insurans.

Saina: I primet maestron yan maestran famaguon i dos saina gi gima`. Ginen siha `nai man-eyag liñguahe, kuttura yan modun che`chu` echu tautau. Estague` na obligasion gaige gi dos sainan guma`.

Kulan mohon matanum simiyan flores gi hatdin niha. `Nai man-lachog sige ma-assiste pot para u fan manogcha`. Ayu na patte `nai ti doku` i simiya madisembra. Che`chu` un` mauleg yan fitme na saina.

Tinayuyot: Gi un` finagpu` misan Mother’s Day estaba un` palao`an mananaita gi halum taduñg na tinayuyot. Asolas, ha sausau mataña dispues ha kontinua manaitai mientras sige kumasau.

Kulan makat asuntoña mina` ti hu estotba. `Nai umasoda ham dispues, ilegña i prohima na ume`emahalañgue` as nanaña pot desde ke man-famaguon siha man-diniñgu.

Hu pasensiaye umakonseha na cha`ña despreressia si nanaña. Mit grasia na bendision `an ha onra maseha taigue desde pinatgoña. Tinagu` i Saina onru gi mañainata.

Hu soyu` na u gagau na u pinipet ni Saina ginen halum tanu` pinitiña ya u finanu`e manana. U faisen lokue` si Santa Maria kau siñague` umapu` pot bendision hinimidde, pinasensia yan minesñgun.

Ilegña dispues gi otru biahen umasoda` mame, “Tat mas ma`ug na akonsehu ke fino`mu ya magahet na i inañgogho-hu as Santa Maria hu polu kumu nanahu esta i finataihu.” Puti ayu na ora `nai pinalolo`pu` manadan kuestion. ***

Kariñosu: Gi un` tiempu in` bisita asolas gi uttimun semana mañainan mame giya Matansa. In` dalalag si Ta Iku para i lanchoña gi papa` iya Kalabera. In` ayuda muna`chochun manog yan babue. Hana` tunog dispues tibaña ya in` chage dididi`. Ha pega gi kestat dos poya yan tandan para katdun i gima`.

Todu i finu` dos amku` motmut pinasensia. Ni unu sumeha umakonseha ham haf` mauleg. Tai malefaghu nui palabran amtau na akonsehu siha.

Likidu este na puntu kase pot sessu man-mamatrata ham kulan esklabu. Esta pa`gu mafattu magof na matan niha i dos amku` `an hu totpi humuñgog este na palabra i konkariñu: Si Ta Iku yan Nan Epa`.

Gi ge`lichan Tanapag i hagas guma` mañainan mame as Tun Pablo yan Nan Nena`. Sige ham man-o`mag gi tasi mientras manalalagu i amotsan talo`ane entre tininun katne, guihan, lemai yan sinetnan sunen agaga`. Man-mañge` mañaina!

Chenot: Humanau i amiguhu mariseta ni mediku pot putin pechu. `Nai umali`e ham hu faisen haf` pinadesisiña. Ilegña na korason. Hu ñañgon kau ha inklulusu korasoña, korason asaguaña yan korason achagma`ña?