Tres Klasen Tautau

Ho soda` amiguhu Magoo yan Denañg Magellan kulan silensiu yan chagu` hinasoson niha na talo`ane. Hu pasensiaye pumula` haf` umestototba i dos.

Ilegña si Magoo: “`Nai mattu i Españot ha soda` tres na klasen tautau guine: kabilosu, mediu mandu` yan mosu.” Kulan mohon ume`ekuñgog-yu` professot.

Ha apunta huyuñg si Magoo, “I kabilosu kalagtos, mediu mandu` mauleg gi chechu` kanai, pa`gu i mosu para matagu`”.

“Gi tinilaikan tiempu guaha siha mosu mañgahulu` gi pueston mandispone kumu mandu` disposision che`chu` linahyan”, segun as Denañg.

Dispues ha faisen si Magoo kau propiu na u fan dispopone i mediu mandu` `nai maseñala kumu mauleg gi che`chu` kanai?

“Kulan ti umaya para u ma`gas `nai tinahuñg kabesa piot gi didog na inanalisan asuntun linahyan siha”.

“Hombre, yangin sague` machete `sino manbiran totniyu fafayimu cha`mu atrerebi hau mama` professot karisu para un` imbelekeruye mamatinas areglun lai”, ineppi as Magoo.

“Ayu buenti na mampos abarambau kinalamten hegsu` I Deni`,” hana` fagpu` si Denañg. Dispues `nai marepapara na parehu siha mediu mandu` lokue`! Suetteyu` sa` gaige rayahu gi tropan muchachu.

Potbus Abarambau
Guaha un` pution para u hihot gi tanu` ya todu u lini`e. Ti este chathinasog-hu soluke kau ha yuti` lokue` potbula siha guine ni muna` fan gineflinan hinassun manma`gas hegsu I Deni`.

Tatnai huli`e potbus pution lau `an enfin machalapun guine, pues mauleg i tropa u fan ali`e yan medikun atadog ya u fan mariseta matan niha. Ti pot hafa lau mibirada i hegsu` iya Papagu` yan I Deni` ya tatnai sisida u fan aksidenti.

Hu komprendi yangin dos bachet umatotpi. Lau `nai umatotpi hau pot potbulan pution, alulaye mariseta ni mediku. Piligru hinatme ti naturat na potbus tanu` piot pa`gu gi tiempun fañuchanan.

Kantan Esalau
Hinatme sankattan na Marianas finabrikan kantan esalau (Chamoru Chant) ni mafafama giya Guahan. Magahet na para in` fa` paluman loru hamyu rumepite tumatiye i tai tinatte na finabrikan ginen lichan?

Manu gi antigu na estorian natibu `nai gaige kantan esalau? Yangin faktu na hagas patte ennau gi kuttura pues siempre todu famaguon Chamorro hagas mapraktika ennau na modun kanta guine desde antes.

I tautau-ta Karolinas fotmatmiente gai kuttura kantan “chant” desde antigu na tiempu. Makondudukta gi pininiti yan na`magof na okasion. Gi chant finatai masañgañgane i prohimu na guiya suette sa` para umafagase gi sadog iya Ur giya Ihiptu dispues umabalutan ni tampen apaka` na magagu ya umakonduse hulu` gi lañget. Klaru ha establesi i chant koneksion yan antigu na tradision mana-o`mag gi sadog iya Ur. Manu na sadog `nai sumusugu` anten Chamoru? Pat siña mohon in` fabrika unu kadu` patte gi kutturan natibu?

Pot fabot fan gai respetu ni man-antigu na mañainata sa` guaha pinegan niha gi hatdin komunidat Chamorro sin una` fan mamahlau hit! Esta mauleg na gigon hafa` ilegta ha` na “cultural?”

Naufragu
Este na palabra pot pasaherun batku ni mapua gi taduñg ya mannañgu halum esta`i kantun ladera. Sige manmañeñas sahyan katkuet malofan na batku.

I mismu palabra kulan lokue` ayu na natibu i ti tumuñgu` kuttura yan tradision tanu` ni umapopotsu` na tiempu haf` tinatten niha.

Tai relihion ya pa`gu gai tinayuyot gi hechuran kantan esalau (chant). Finatinas sin pisu desde primet sakudida.

Tai baila fuerake finana`guen Españot mestisa yan fayao. Mañoda` pa`gu bailaña nuebu! Adahe para un` famaisen para umabendise i haiguen niyog. Pot fabot, malefa hau na mas propiu i un` famatkilu pot ignorante gi haf` tinatemu?

I mafabrika na kuttura prefektu amot destrosiun sustansian tradision natibu. Bai` tatte yangin magahet lau `nai mafotman guinife, dinancheña che`chu` unestu gi este na asuntu. Ti un` bira hau mangagau dispensu!

Yangin pot para pot tane` bisita ginen hiyuñg, ke lau propiu para tafan mandage pot haf` ti patte gi kuttura-ta? Kase kutturan chanseru gi halum balutan dinage! Na para sa` sage`!

Akacha
Haf` este na dibinan Pedron Malas kuantu na Yuus guaha. `Nai sinañgane as Juan na unu ha` na Yuus guaha ilegña si Duñg, “Kettu, hombre `nai hu sañgane si pale` na dies ti malagu` ha aksepta! Pa`gu para unu ha`?” Anog na tiha tuñgu` si Duñg dottrinaña. Ume`esuette gi hilu` mañan chanseru na pindehoti! Hombre iya `migu!

Nina` Siña
Hagas hu estudiaye nina` siñan mas ke otdinariu gi `nos kuantos tautau-ta. Tita li`e este otdinariamente gi pumalu sa` malimitte i numeru ginen hilu`.

Guaha mana`e fuetsan suruhanu, manamte ginen finatinasña amot, fresku kanaiña manlasa, keni` gi halum tanu` yan tasi, yan otru siha nina` siñan mas ke otdinariu.

Un` amku` nihu bisita giya siha fumaisenyu` kau hu tuñgu` ga guahayu` timatitiye. Esta hana` fanfuguyu`. Lau este siha na fuetsa ginen hilu`.