Inapelan ayudu

Ta fafana` asuntu ni solu i federat siña umecha bendision tat kumu i mafanana`an CW1 na programan hutnalerus ginen hiyuñg. Ha inklusu este na chinatsaga i infetmera siha yan enteramiente ekonomia-ta.

Yangin ti mana`e Marianas putdet guine na puntu, pues 114 na infetmera siempre umana` fan para gi CHC gi uttimun este na sakan. Mas inaminasa i hospitat sa` sin kabales na empleau infetmera pues lamegai na fondun ti siña i CHC ha kobla i federat tat kumu apas Medicaid yan medicare.

Ta diseseha na u guaha konsiderasion guine na patte pot no umahuchum setbisiun hospitat yan una` tailaye mas i kinalamten ekonomia.

Areglu Giya Paraisu
Sisteman demokrasia na gobietnu anchu plasetña dispues tinagam ni taduñg tupu` mina` makat na kontrariu maseha manu gi papa` banderan Amerikanu.

Ta tutuhun gumubietnan maisa hit gi 1978. Kulan hit i man-ñalañg na katdumin galagu ni man-madagau pidasun to`lañg manog.

Sin inbatgu, ta gu`ot i te`lañg ya sige sattun ta asimula haf` ayu na attikulu. Ni federat tiha tuñgu` haf` dinagauña. Ta hoka ya sige animosu na pinetsige kume komprendi haf` yuhe na to`lañg.

Esta kanaha` 40 años desde ke ta usune humatsa kuetpun gobietnota. Maseha makat lau ni unu sumeha man-ayuda muna` mas finu i karera-ta. Maseha guaha siha dididi` linache lau hita dumiside futtuna-ta. Chat miyu fan hinahalañg. Na fitme mas inapipet para minauleg todus!

Pot I Tautau: Gi todu finacho`chu` man-menhalum na kabisiyu pot i tautau na ma-atotga masakrifisian maisa siha.

Klaru yan oppan este na ekun kinimiti gi prohimu diariu. Appenas na pot guiya soluke pot i otru. Sattun na disision para u ayuda i otru.

Yangin felis pues mauleg na lastru pinegaña gi tatteña `nai malofan gi halum hatdin. Bien felis para hamyu ni man-sinsiyu gi kinimiten assistimientu para i tautau-ta. Dañkulu yan ma`ug na bendision para hamyu lokue`.

Obligasion Saina: Gi todu kinalamten-ta, animu na pinetsige pot mantension familia. Esta ha mamattit siha i mañaina-ta pot para u prebeniye suffisiente nesessidat kada unu desde neñkanu`, doga yan trahi. Tai finagpu` na obligasion.

I animosu na saina ti umahñau dumoblague` malag i lanchu gi finagpu` cho`chu` para u assiste pinegsai yan tinanum. Maseha dididi` lau guaha ayudun usun familia. Dispues de minachum atdau `nai ha birague` tatte gi gima` umo`mag, sumena yan dumeskansa.

Makat na finapus antes, durante yan dispues de geran dos. Animu i mañainata gi inaligau mantension i tropa. Mauleg sa` kumayao ñaihon i sapet na maladisposision Japones gi hinalum Amerikanu`.

Konsidera ya hita lokue` sumufa` ayu na barañkan chalan linala`. Sali hit de papagu` na sinetnan sunen sisonyan. Kontodu siempre asientun tinanum fadañg ta usune yan haf` takone` gi tasi yan halum tanu`.

Lamegai giya hita fumaposgue linala` tradision natibu gi gualu` yan tasi. Ni unu pininu` lau todu man-felis gi karera mona. Mit grasias pot bendisionta ginen i Saina! Maseha ti guiyaya libianu lau enfin man-la`la` hit felis!

Asun Botkan: Buente i umafuetsas industrian casino guine pine`lun niha na che`chu` menhalom. Lau atan fan i bibu na kinalamten nasion siha gi oriyata kau ti magahet na diariu machochoneg adelantun mismu industrian casino gi tanu` niha.

Dos años yan pa`gu ya mababa industrian casino giya Japon, haf` mohon chansata man-mamatinas koble gi halum te`ug na kompitensia? Achametgot ekonomian iya Marianas yan Japon? Haf` `ste na binalutan kulot apu na sirenu ginen pagpag botkan gi ge`hilu`. Hita yan hita man-a`atotpi gi birada.

Kutturan Natibu: Guaha `nai man-diskuidau hit umatende mañainata piot gi inamku` niha. I kutturata ginen relihion-ta ni pumega respetu yan yine`ase` gi korasonta kumu mañgilisyanu.

Muñga maletke obligasion-mu kumu patgon sa` mas megai bendision `nai unna`e attension nesessidat amku` na saina-mu. I mamamaila` para hagu i husasañgan guine. Un` agradesi yangin mismu famaguon-mu dumisattende hau gi inamko`mu? Kutturata attension yan ayudu gi mañaina-ta!

Satbasion: Guaha finu` mañainata: Manu hechura esta i seputtura. Kumeke ileghu na manu i pinayonmu siempre un` kilili` guatu gi naftan-mu. Guiya este i pinegamu `nai malofan hau gi halum hatdin. I mauleg na checho`mu solu konsuelumu!

Lau i amiguhu Magoo ti konfotme. Piniloña na pot matan tautau husasañgan. Hombre entalu` mame na dos ti chagu` i difirensia gi homhum lasas yan machebañg fasun mame. Esta ti na`magof malitratu sa` kada ratu un` li`e na malefa i Saina tihana` kabales i patten mame. Hombre, pot chaleg!

Finu` Chamorro: Guaha siha palabra ni mauleg tafana`gue famaguon-ta gi karera mona. Gi bandan nina`e, guaha “a`ok”, i otru “ika”. I mefe`na propiu gi taiguihe fandañgo pat fina` gupot. I otru pot finatai. I uttimu i mananana`lu `an gai achaki i prohimu.