Ha`anen Gupot Marianas

Agupa` na ha`ane Thanksgiving Day, espesiat na okasion para familia. Un` dinaña `nai tana`e sinsiyu na agradesimientu i Saina pot todu bendision-ta na sakan. Lokue`, tutuhon ha`anen gupot siha guine. Tradision tanu` este pot mas ke kiñientus años.

Gi bespiran Noche Buena ta falague Misan Gayu pot para tatagam i finattun i Niño Jesus. Dispues, manhanau hit para i gima` mankinafe yan amotsa. Tanañga finattun i Niño `nai manana si Yuus. Kutturan relihion-ta kumu mañgatoliku!

Mientras mamañge`yu`, gaige suabe na dandan “Pueñgen Yuus” e`eku gi santatte. Esta na`mahalañg antes na selebrasion pot motmut minagof gi tautau-ta siha. Sumasaunau nobenan i Niño ni manaliliku` gi bisinu `an pueñge. Sige mona esta`i finattun i Niño gi gima`ta gi ha`anen dichu Noche Buena.

Tat ti dumimu mangagau bendision gi Niño Jesus. Namagof na ha`ane. Mas hana` fitme hineñge-ta gi tai achaigua na nina` siñan i Saina-ta.

I benefisiu gaige na i sensian hinimiddi umesgaihon halum katma yan trañkilidat giya hita. Gi mismu tiempu ha tanum fitme yan petmanenti na dignu yan respetu gi korason-hu pot guiya. Estague` sustansian hineñgge!

Ti hoñgiyun na desde ke patte-yu` giya guiya diariu, tatnai chathinassu-yu` pot nesessidat familiag-hu. Gaige enteramente inañguhog-hu gi taihinekog na nina` siñaña yan yine`ase`ña. Hu pega ha`ani-hu kulan un` patgon ni tumatitiye si tataña gi kantun unai, innosiente lau motmut minagof yan grasiosu na chaleg!

Tafan adiseha mauleg gi dichu ha`anen Noche Buena. Felis Noche Buena para kada unu giya hamyu! Si Iku yan Familia!

Bachet: Hu ekuñgog un` tautau umadiñgan pot fuetsan kabales na hinassu. Ha lista haf` siha offisioña un` tiempu. Ti hoñgiyun `nai ha annunsia dispues na bachetgue`.

Ha apunta huyuñg na gaige lini`e kada unu gi haf` kabales ha husga kumu magahet gi asuntoña siha. Pot ihemplu, siña i tautau gai atadog lau bachet. Puru imbarasus tumani`. “Nasuha todu tinane`mu ya un` husga haf` magahet”. Este solu `nai siña kabales tali`e asunto-ta. Ilegña na `nai bachetgue` `nai mas klaru hali`e asuntoña siha.

Ha usa asuntun birag pot lamegai pumo`lu na magahet. Lau este na asuntu finañagun mina`añau sin kabales na hinisga. Taya birag solu haf` i titanos-ta ha fabrika kumu magahet. Magahet na guaha espiritun man-hanau lau ti birag.

Ginen bachetña na mas mauleg-gue umekuñgug ya hana` setbi hinassoña umebalua yan analisa gi maseha haf` na asuntu hafana` diariu gi operasion bisnis.

Hana` klaru na todu asuntu `nai chatkomprendi hit siempre maya` lini`e-ta. Debi fuetsau tana` suha chatlini`eta kosake klaru hinassota. Ginen este siempre u kabales lini`e-ta. Haf` baliña gai atadog i tautau ya bachet?

Pot todu, i hinasso-ta i mas metgot gi para ta satba maseha haf` chinatsaga-ta. Este na patte mauleg ta eksisia gi hilu` katma, pinasensia yan hinimiddi. Ha sedi hit umatetuye mas amtau na hinanau diariu. Gi hilu pinasensia, minesñgun yan amtau na rinipara `nai siempre ta gosa kinemprenden lini`eta.

Nasuha ti man-pettinenti siha na asuntu ya umanana hinasso-mu gi maseha haf` un` petsisigi. Sedin maisa hau katma gi todu hinassu yan disposision-mu. Este mas lagsi` na manera gi mafotman fitmi na disposision. Kabales siempre lini`emu!

Nuebu! Ilegña i amiguhu Magoo na mampus oppan maplulikan Biktot Hokog yan i MV Luta na tinampe i miyinariu as defuntu Larry Hillbloom.

“Fana`an miyinariu si Biktot hombre manadan keha gi kotte pot mansañgan finababa gi `nos kuantos bisnis yan taxpayers iya Marianas”, ha apunta huyuñg si Magoo. Kasi i balin keha ennau i $4.2 miyon pesus ni gaige pa`gu gi kotte.

Petsonatmenti, para todu i manmapublika na minamahlau kontra Marianas debi si Biktot u resignague`. Nahuñg na minamahlau gi gasetan elmundu pot mansañgan na che`chu` achibau gi apusientun gobietnamentun iya Marianas.

Na lamegai pop corn yan gimen sa` huhuñgog na paire na lukau mamamaila`! Desde bailan fayao, palitu, mas yan hula siempre duru gi hilu` karetiya siha!

Silensiu: I tanu` silensiu. Esta na`tañga i inipus silensiu maseha manu-yu` guatu. Gi tatten felisitasion gi matan tautau-ta, tuñgu`un na guaha te`ug pinadesin niniha gi halum gima` niha.

Gaige lamayot patte este gi tai sinahguan na monedan familia. Mientras masuñgun todu kinahulu` nesessidat familia, i moneda tatnai ma-adelanta pot 25 años na tiempu.

I matan niha didog inaligau ausiliu yan kau guaha un` dia u doku` kabilosu yan fitme na kabayeru para u esgaihon i tautau huyuñg ginen presenti na sasalaguan chinatsaga?

Oppan este gi matan niha. Mampos a`gañg gi ekun silensiu na dinisehan niha para u lagnos siha ginen este na modun linala` esklabu gi halum mueyi` na fachi` miserapblen pinepble.

Este na sentimentu sige ha` dumañkulu gi halum abubun binibun publiku. Siempre un` dia u mapga` pat pagpag `nai panku` pinasensian todus gi enteru petlas guine. Na`mañau `an para u fattu guine na eskalera. Haf` mohon gaige gi hinassun niha i timunerun hegsu` imperadot I Deni`?

Kuestion: Yangin guaha presisu un` keketuñgu` ginen un` prohimu(ma) mauleg un` offsiona haf` na kuestion siña un` dagau `nai guiya mismu umesplika boluntariamente i infotmasion siha.

Debi un` fayi umatan haf` moduña i prohimu mientras ha o`oppi i kuestion siha. A dakun un` ratutu ha` ha kehayen maisague`. I tunas na tautau dibuenamente sinañgane hau klaru haf` kinempendeña gi asuntu ni un` abiririgua.

In` koneksion yan este, hu soda` na i Chamorro i mas baba na testigu gi kotte. Ahe` ti pot dakun lau i liñguahen Chamorro mau`udai gi “fana`an, kasi, buente”. Ti direktamiente i palabra sa` popble liñguahita. Poresu na puru mafanana`an “implied” na besis `nai mañgekuentos hit.

Pot ihemplu: Mafaisen un` testigu haf` kulot chininaña i mamunu` `nai humuyuñg ginen i gima`, asut pat betdi. Chatseguru dispues hana` asagua i dos kulot `nai ilegña, “Fana`an asut, ahe` betdi, kasi todu i dos”. Dios mihu!