Libettat Iya Marianas

Pa`gu na semana selebrasion Independence Day `nai gobietno-ta nasionat, Estados Unidos De America, ma-establese kumu nasion dispues de matuge` konstitusion gi 1787.

Mientras tantu, kase 71 año desde ke ta selebra este na okasion. Guaha `nai in` hassu haf` signifikasion este na ha`ane?

Bai pega i asuntu gi eskaleran `nai mangaige hit kumu man-libre gi papa` banderan Estados Unidos De Amerika. Kuestion: haf` kinemprenden miyu pot “libre?”

Faktu na guaha direchota gumubietnan maisa hit ni gaige gi pahinan kontratan Covenant yan Estados Unidos De America. Lau man-libre hit ginen manadan dibin gobietnu? Man-libre hit gi tinatiyen lai desde konstitusion papa` esta i otru siha areglun lai? Kau man-aktibu hit chumoneg gobietnamentun lai?

Listuyu` umoppe i kuestion siha. Lau makat para bai deklara “huñgan” gi kada unu. Lamegai eksisiun disposision asuntun linahyan man-maluñu` gi hilu` chatdisposision. Mauleg lokue` ta komprende na ma-areglan sisteman gobietnun demokrasia dispasiu na sahyan `nai mau`udai.

Bes enkuando siempre tafan mattu gi puntan hosgsu` `nai enfin kabales ta komple to`a yan amtau na disposision gobietnamentu siha. Hita solu siña umaregla asunto-ta sin ditension. Estake ta gacha` este na eskalera `nai siña ta deklara na man-libre hit!

Diskonsuelu

Guaha besis `nai hana` galileg-`yu asunto-ta gi halom sisonyan diskonsuelu. Huna`e animu tumachu tatte para bai rikonose haf` masusede.

Namanman maletken asuntun linahyan siha kulan diariu na bisiu. Hu konsidedera malag manu i manadan “biba” yan offresimientu para uma-adelanta linala` familia siha.

I ineppe ginen representante siha inipos ñañgon. Kase poduñg kabesan niha entalu` i señgsoñg yan kanifes mañglu` hegsu` imperadot I Deni`.

Sige hu ebalua manu `nai gaige sessu i seriosu na chinatsagan satbasion ginen Trenta`i Unu na sindalun publiku. Asuntu? Komplikau? Manaitai? Edukasion? Diskuidu? Abilidat mañgomprende? Manu guine i dichu problema?

Ni unu uma`atan haf` tinatet-ta para umakomprende i masusesede pa`gu. Pinalo`pu` este ni taya` planu para uma-esgaihon hinanau-ta mona. Gatdun gi tanu` diskalentau `nai sige man-afaisen kau guaha gayera lamuna sino fina` maneska.

Mientras tantus, sige ha` mas ma-umenta problemata gi halom chubaskun rimulinun diskuidu. Ni unu gai ineppe disiente. Todu man-udu, tañga yan bachet. Taya` kampu fuera ke bai` kahlañgyu` gi lipes esperansa!

Nesessidat Amku`

Hu taitai un` attikulu pot `nos kuantos miyon na man-amku` Japones ni numesessita ayudu pot man-tatfena idat niha. Kustumbren Japones i attension gi man-amku`. Lau makat na obligasion `nai finagcha`e debi u facho`chu` i pipulan.

Makat na obligasion piot `nai dos chume`lu uma`atahgue mamulan ya debi u fan machochu` gi mismu tiempu. Finañagu problema tat kumu man-mapunu` mañainan niha pot machoneg ginen dos bibienda sino man-mayute namaisa gi chagu hogsu` yan kantun sadog estake man-matai. Mientras tantus, mas megai numerun man-amku` ni numesessita ayudun familia.

Trabiha guine metgot kutturan familia gi ma-attenden dos saina gi inamku` niha. Lau hombre este huli`e na esta guaha ayudu ginen hiyuñg ni man-ma`apase kulan infetmera para siha u unatiende nesessidat un` amku`. Kau u fattu guihe na eskalera `nai gima` man-amku` `nai para ta pega mañaina-ta kase i tiempu u dinetetmina.

Bai` komprende yangin unu ha` patgonhu ni debi u fachochu` pot mantension familiaña. Diariu bai` preparayu` deste neñgkano`hu, fanmaigo`hu, deskansu, numeron EMT para `an hu nesessita makone` para i hospitat yan gasgas halom yan hiyuñg gima`hu. Ti megai nesessidathu.

Direchun Natibu: Matutuhon inadiñgan estau politika giya Guahan. Umatotpe este yan atoridat Congresson Estados Unidos De America dumispone komplidu futtunan i tanu`.

Mabasiha i asuntu entalu` direchun natibu dumidise futtunaña yan obligasion federat gi madefenden nasion yan iya Pasifiku.

Atoridat disposision gaige gi Congresson iya America gi todu asuntu pot Guahan. Taigue ennau na atoridat Congresso giya Marianas sa` i relasioña dinispopone ni kontratan papa` i Covenant. Estague` i diffirensia gi bandan atoridat.

I umestototba-yu` i siña mahatsa maseha haf` na fasilidat militat sin konsentimienton natibu. Kontodu mahatsan fasilidat industrian turista sige ha` hulu` sin patttisipasion i natibu. Guaha komplimientu gi dos fasilidat maluñu` gi tautau tanu`.

Este na sinisede siha fuetsau pumañgun i natibu haf` pattisipasioña gi kinalamten ni siempre u fan inaffekta. Mauleg ma-insiste pattisipasion natibu propiu pot futtunaña.

Troñku: Mafana`an “park”, lugat ni maseñala para sagan deskansu ni man-mahatsa gi `nos kuantu lugat. `Nai hu bisita unu na park giya Japon bonitu na lugat ni matanume manadan gulusina yan mahyau na troñku siha.

Gatbu magahet I flores sakura`, flores nasionat Japon, ni gaige katkuet direksion gi halom park. Megai familia man-malitratu gi fihon este na flores. Dispues man-akone` man-amotsan taloa`ne gi fina` resturan.

I gumu`ot attension-hu i manadan mahyau na troñku ni mana fan fila gi enteru lugat. Bes enkuando umasudayu` yan un` empleau i park. Hu faisen haf` na manadan troñku man-matanum.

Ha esplika na i kulot betde sumen mauleg munakatma siñiente gi maseha haye na tautau. Nina` katma siñientemu gi duranten dumeskansa-mu gi fina` bañku. Magahet na felis siñienteghu gi ayu na finattog-hu gi park. Mauleg lokue` maigo`hu guihe na pueñge. Dinanche na lugat deskansu piot ya un` kokone` i tropa.

I otru lugat `nai husosoda` sumen na` pasifiku i kantun tasi piot gi lemlem tautau. Haf` mas gatbu ke minachom atdau gi sanlagu ni man-ina difirientes kulot. Inakompaña este ni pañgpañg napun dikiki` gi kantun unai. Dispues gaige i suabe na guinaifen mañglu ni sige ha gaput i hagun gagu siha. Paire kumu lugat deskansu.

A`ketu A`Iku

Ai na mañge` chaleg tuyan si Magoo gi mapos na Dameñgo. Esta tutuhu` lago`ña mientras ha bibira i tininu siha gi hilu` guafe.

“A`basta a`tuge` este sa` ti a`komprende este guatu”. Era, hasañgañgane-yu` para bai dis-attende mañge` sa` taya` mananaitai. Muchomas, dudague` kau makomprende haf` hu sasañgan. Hana` fan hassun ñaihon-yu`.

Entre guaha probleman niha man-manaitai mina` ti makomprende i asuntu sino mahasñgun ma-upus pot no u fan gai che`chu`. Ke lau na ti manmanhula` para u fan man-ayuda?

Hu tampa `nos kuantos representante yan senadot. Kulan man-madulog deris ya nina` fan imbeninau. Hu pesa ta`lu un` biahe. Parehu na mañan taguan.

Anog na hasan man-manaitai pettinente siha na attikulu pot para umakomprende asuntu ni mafafana`. Dispensayu`. I asuntu fumafana` siha pa`gu! Dios mihu!