Huegon Liñguahe Natibu

Guaha priniponen aktu pot leksion finu` Chamorro yan Karolinas para umana` mandatu para umagradua i patgon gi eskuela guine. Lau i risetan chenot yan amot ginen medikun hegsu` iimperadot I Deni` acha lache. `An kanset i malañgu haf` na para unna` gimen amot lo`lu`?

Kulan masaulag supen tasi lau gai tinaduñg tupo`ña i asuntu. Haf` `ste na aktun tax asukat ni madisapprueba antes de u mahala tatte. Inipos na che`chu` hasupag sin luseru.

Para u ma`ug usun liñguahe debi u tutuhongue` gi halom guma` familia. Dispues humalom i sisteman edukasion ya fotmat ha simientu ineyag famaguon gi hechuran konbetsasion, tinaitai yan mañgge`. Yangin finu` Eñglis deste oga`an estake u maigo` ennau na patgon pues taimanu para un` tanum giya guiya usun liñguahiña?

Dispues machage aduanan (tax) asukat yan fina` gimen man-mames siha intension para uma-ataha chenot daibites. Taya` linachiña matutuhon gi fina` soft drinks (soda pops) mientras sige ta`lu ma-estudiaye haf` otru ni diariu ta konsusuma ni mandañosu. Haf` na ti mana`halom asigan kometsiu, pan, shoyu, soba, pugas, sitbesa, aguayente, tuba yan harina?

I asuntu gai minapot ya ti hoñgiyun haf` otru umatitisa chenot daibites. Ni ti asukat i asuntu lau gaige gi haga` yan pahariyan tautau. Pot ihemplo `an umayunat naturat na asukat i agaga` na patte gi haga` estague` tutuhon daibites. Gigon chafleg kinalamten pahariya-ta ha choneg chenot daibites. Mama` ferian daibites `an un` daflogue asukat!

Debi ta dis-onse i toru ginen i kareta pot para ta planuye fine`nina para manu hit. Dididi` ya guaha sattun na planu ileghu na ta danche dispues karera-ta. Haf` mohon?

Yangin puru sakudidan na`tatah yan gueku pues sumen namase` i publiku gi ti apmam yan pa`gu. Siempre u anog este sais mesis yan pa`gu `nai todu mansinapet pot diskuidun hegsu` I Deni`.

Man-ñahlalañg
Arestau dos offisiat DOC pot ma-aminasa un` presineru. Komprendiyon estau presineru lau kase man-malefa na tautau i mafafana` na prohimu. Dispues, iridau tatalu` i prohimu ni mahalan gotpe ginen kuatton presu. Pinasensia yan to`a na modun inadiñgan libianu ha pribene inachachag entalu` presineru yan guatdia.

•••

Ma-aresta un` prohimu pot sige impirau yan man-estotba `nai bulachu. Makone` halom gi polisia. Finaisen i prohimu ni sarentu haf` ginimeña. Ilegña “Budweiser”. Managu` i sarentu gi un` patrolman para umachuli`e latan Budweiser. Mamaisen i patrolman para hafague`. Sinablasus tatte: “Esta hu tatagu` hau pues chule` mage chadeg!” Era tiha tuñgu` i sarentu dumiletra “Budweiser.”

•••

`Nai manunog i astronauts Amerika gi pilan sige mana`yog sa` Amerikanu finenina tumunog guihe hulu`. Dispues mali`e fina` mañila` gi lachagu`. Marikonose ya masoda` `nos kuantos Tagalu man-manununu katne. Man-mafaisen taimanu fattun niha hulu.` Ilegña i unu, “Ai, Pilipine Airline”. Esta nina` kuentos un` astronaut, “Dios tiampare kulan yuus. Maseha manu man-gaige ha`!” A`saina!

•••

Este i burukan CW-2 na hutnaleros tat ti nina` kuentos. Kontodu pot yine`ase` yan mina`ase` ginen i biblia sige mana` paha kulan mohon direchu. I asuntu pot kontratan temporariu na cho`chu`. `An magpu` i kontrata debi u bira siha tatte gi tanu` niha. I lai federat pot immigrasion ti sumasaunau yine`ase` yan fatsu na kadu` direchu. Ritira hau gigon magpu` i kontrata! Gaige este gi lai USPL 110-229.

•••

Ilegña un` Bangladeshi na apmamgue` sumaga Saipan ayu na guaha direchoña sumaga guine. Huna` klaruye na i kontrata pot temporariu na cho`chu`. Taya` gi applikasioña probision inakonfotma para u saga guine dispues de `nos kuantos años. Aike sa` mañoda` finatinasña na direchu. Ilegña na man-tai ase` tautau Marianas. Hu sablasus na lai federat dumispopone asuntun immigrason. Mamatkilu. Pindehote!

•••

Guaha lokue` un` mauleg na amiguhu Tagalu sige puminite na hagasgue` guine pot mas ke bente años. Kulan lugat niha Saipan. Hu kanifise umesplikaye na i lai federat pot temporariu na cho`chu`. `An monhayan debi u birague` tatte gi tano`ña. Ni lehislatura yan gobietnu mantai fuetsa tumulaika areglun lai federat.

Magahet na man-namase` pot man-payon guine. Lau mientras man-gagaige guine ni ñgai`an i banda praibet `nai u hatsa i sueddu sa` payun sumen baratu na apas ni ma-apapase tautau hiyuñg. Poresu na megai gi famaguon-ta madiñgu i tanu` pot baratun sueddu yan taya` appottunidat para siha. Dinanche na areglu para i tautau-ta! Ni u fañgate lagu` haga` tat mas ke tautau-ta finenina!

•••

I USCIS kontodu Guam ha disapprueba ginagauña hutnaleros. I kompania ni chumage umappella kausan niha debi u apase kase $3,000 kada unu. Memegaiña lumetke ma-appellan este na asuntu pot mampos guaguan. Kase ni achog iya Marianas siempre u matasa parehu na mutta gi kada kausa. Estague` un` puntu ni umestotba kompania siha guine. Hu komprende na lai federat ya presisu ta estudiaye kau tiha estotba este direchon iya Marianas gi bandan self-government.

•••

Mamaisen un` patgon biyinariu tres pesus para u famahan yan nobiaña na`niha hamburger. Inatan ni tata. Ha lagnos i amku` tres pesus ya hana`e lahiña, ilegña, “Estague, ya otru biahe fan espiha palao`an ni labaratu!” De dios mihu!

•••

Humanau si Pedron Malas mamaisen petmissu gi as San Pedro para u akamu`. Inatan dispues ilegña amku`, “Ya haf` taimanu i tres na linilesmu guihe huyuñg?” Ha hedugue` si Duñg ya ilegña na ti hahasñgun. Sinablasus tatte as San Pedro, “Tres na bastatdu gi tres difirientes na famalao`an ya ti un` hasñgun?” Esta pa`gu ti uma`asagua si Duñg.

•••

Man-hanau un` familia para Disneyland. `Nai mattu gi entrada ilegña un` tablon, “Disneyland Left”. Duru i famaguon mañgake sa` mandiniñgu ni Disneyland. Era direksion akague!

•••

Un` minachom atdau, sige hu ebalua kada patgon deste kustumbre, edukasion, offisiu, bittun yine`ase`, gineftau yan otru siha. Magahet na mañgalagtos na famaguon. Kuattru muna` fonhayan kolehu ya huli`e na man-edukau gi ineyag niha.

Desde umadiñgan yan mañgge` esta man-maulegña ke guahu. `An huna` fan dibate anog eskaleran edukau na inadiñgan asuntu siha. Namagof sa` man-arespeta opiñion. Mas namagof `nai huli`e na man-apinitiye.