Maliñgun Tradision

Tradision i modun linala` ni mapasa papa` hinerasion pot hinerasion. Adumididi` ma-adelanta, siglu pot siglu, gi halom kinalamten linala` espirituat, kuttura, finacho`chu` i grupu, sakrifisiu, ekspirensia, yan hinanau todu.

Hu akanteha este na asuntu pot para bai komprende hafa tradision Chamorro pa`gu. Huñgan, hagas gaige gi finaposta fangualu`an yan peskan tasi. Dispues, maliñgu gi santatte gi hinalom i Navy yan dispues i gobietnun Trust Territory. Planun Amerikanu desde tutuhon.

Ta abandona tradision fangualu`an yan peska pot mas libianu macho`chu` gi fina` offisiu entalu` gobietnu yan praibet. Adumididi` mabasiha guatu gi kometsiu linala` natibu. Esta tafafahan i guihan gi kantun chalan dimas de tafan peska. Manhanau hit guatu gi metkau lancheru pot golai yan gulusina.

Sige finana`guen finu` Eñglis ni ta sedi kumu liñguahen famaguonta desde oga`an estake u fan deskansa `an pueñge. Man-maliñgu hit gi estrakada yan chandan tiinilaika.

Pues haf` pa`gu tradision-ta? Mapot hu oppe sa` i hagas mapasa kumu tradision ni mañaina-ta maliñgu. Kontodu mapo`lun tanu` familia para i famaguon-ta gaige na magu`ot para umabende gi tautau hiyuñg. Madirite este na tradision gi halom interes salape`. Mas umapattau i hagas hihot yan man-agofli`e na familia.

Yangin in` atan kabales haf` chumalapon yan dumestrosia tradision natibu siempre in` li`e tihoñgiyun na dos attikulu ni yumamag sin ditension sustansian estorian tautau-ta. Mampos hana abarambau hinanau-ta ya ti siña ta apunta haf` pa`gu tradision i tanu`. Lau areglun linala`ta gaige gi dos patman kanai-ta. Guaha mohon chansa ma-abiban sustansian natibu?

Komplikau Para Mona
Inipos komplikau finaposta pa`gu. Ti nuebu i mañgahuhulu` na asuntu. Lau hagas man-rikohe tantus basula estake loka`ña ke hegsu` I Deni`.

Desde kara` (broke) i CUC yan para mona mas menos rinikohen aduana (tax) siempre ha palo`pu` i tautau siha gi señgsoñg sin ditension. I maribahan hutnaleros ginen hiyuñg ha punu` i mandikiki` siha na bisnis kontodu man-dañkulu. Todu kinalamten adelantu man-gini`ot tatte.

Seguruyu` na gaige giya monana este na asuntu gi hinasson i gobietnu yan haf` satbasioña i makat na sapet ginen tailaye na lai federat. Debi i gobietnu u chule` i asuntu direktamiente guatu gi as Presidente Obama pot makat na destrosiu gi linala` i tanu`.

Atoridat disposision immigration gaige ennau gi federat ya ni manu na kotte siempe mana` klaru haf` fuetsaña pot este na asuntu. Komprendiyon. Responsablidat-ta para fanu`e si Obama na i otru banda gaige asuntun pot linala` tautau. Estague` sumen presisu na ta apunta huyuñg gi pinetsigen satbasion este na asuntu.

Kada sakan diskuidu
Kada sakan na diskuidu ginen offisiat publiku esta tres años tatte maluñu` linala` i tautau. Ayu `nai mas anog este `an in` atan kau guaha adelantu gi pottanmonedan familia.

Pot mas ke benti años taya` adelantu gi ha`anen empleau siha gi halom baba na ekonomia. Kase sisienta años tatte `nai man-mapega linala` i tautau siha ginen este na diskuidu. Haye mumirese didog na chinatsaga ginen diskuidun offisiat publiku ni taya` bindan niniha?

Ti namanman na mas ke tres mit na tautau-ta dumiñgu i tanu` gigon mañgiñge` na siempre te`ug na chinatsaga para umapadese `an tiha mueba siha. Namagof `nai hu huñgog na siha yan siha man-a`ayuda gi nuebu siha na finattu lagu ginen Marianas.

Sessu man-daña pot para umarinueba desde liñguahe yan man-mañge` siha na bokan tano`ta guihe lagu. `An tiempun ha`anen gupot noche buena, man-daña gi un` lugat man-nobena ya mañgiñge` i Niño. Man-chagu` lau gaige ha` i metgot na sensian famaguon isla.

Gi nuebu na lugat niha, mas megai appottunidat cho`chu`, mauleg na sisteman edukasion, hospitat yan trañkilu na komunida `nai mañasaga. Homlu` na tinituhon para i famaguon niha. Dudayu` kau umasoda` parehu appottunidat `an mañaga gi halom rimulinon taya` appottunidat guine.

Gi Puntan Chalan
Kase guaha giya hita fumatoigue un` puntan chalan `nai ta husga finapos-ta gi halom rimulinon kutturan otru ni ti umaya yan tradision natibu. Sahñge na modu finapos-ta yan haf` sustansian natibu. Estague` na puntu `nai ta dibina manu na chalan para tatatiye—akague pat agapa`.

I presente na modun linala` seguru na siempre ha funas tradision natibu petmanente. I asuntu mauleg ta diskute pot para ta esgaihon para manu hit.

Dañkulu na chanda este na asuntu. Pa`gu na benefisiu ginen finana`guen Amerikanu ni dumisplanta sustansian natibu. Haf` este siha na asuntu `sino destrosiu yan kau listu i natibu umina yan kumorihe i man-chogue siha? Gai minakat pot rason na siempre kada unu debi u pesa pinayoña kontra dignu na modun linala` natibu ni numesessita dañkulu na sakrifisiu.

Siña ilegta na ti makat. Bira hau tatte ya un` atan sa` desde liñguahe yan neñkanu` megai tinilaika. Dispues, ekuñgog famaguon natibu gi usun liñguahen niha. Desde oga`an manfinu` Eñglis estake man-deskansa an pueñge. Masaluda hau “hello” ti “halo”! Lagse` man-finu` Eñglis ke Chamorro `sino Karolinas.

I natibu hagas fafacho`chu` piot gi uttimon semana gi lanchun familia. Pa`gu, gaige na gumagalileg gi siyan sufa gi menan television mientras duru ha sumukegue` ice cream yan fina` mames siha. Kontentu! Gi karera mona `nai luma amku` ha tutuhon umuguñg pot puti yan haf` siha na chinatsagan hinemlu`. Estague` kase presiun modetnu na Marianas!

Mañgakanta I Tropa: Yangin manlagnos mas ke $3 Miyon si Señor Takahisa Yamamoto apas i MV Luta dispues ti manatuñgu` pot i $400,000 ni hana` ma-apprueba illigat si Biktot Hokog, siña i mañaunau gi disposision salape` publiku mapresenta taumanu magastaña este na fondu?

Guaha siha infotmasion pot patten salape` para si fulanu yan fulana lau ti klaru sessu ginen manu na fondu `nai humuyung. Lau sige pa`gu man-dañkulun ulu` mañgunanaf ginen malumot ya makat man-matiges sa` inipos yinemog niha. Dispues, tinatitiye otru nuebu na residenten ulu` yan birak gi santatte.

Finu` man-amku`, “Todu tinituhon ni ti mauleg siempre ti mauleg uttimoña”. Estague` na chalan `nai sulun i asuntu ya sige pa`gu man-a`suspecha i tropan man-mapatte.