Mandaton Lai Konstitusion

Segun pettinente na probision konstitusion debi uma`apase dibin gobietnu gi uttimon mina` segundu sakan desde ke humalom i nuebu na administrasion.

Kumeke ilegña na i dibi ni gaige poku `mas `omenus $572 miyon pesus debi uma`apase gi uttimon otru sakan, 2017. Ti siña na para konbiñienten niha para umatatiye. Lai konstitusion yan lai iya Marianas siha debi u fan matatiye. Estague` muna fifitme areglun gobietnamentu.

Siempre tali`e disposision niha gi otru sakan kau matatiye mandaton lai konstitusion pot apas dibin gobietnu. Yangin para umafatkeluye pues siempre ta chule` halom gi kotte pot satton na tinatiyen lai i tanu` dehemunos haf` rayamu!

Esklabu: I kuestion kau ligat ma-apasiye gastun kumareran para iya China yan otru siha lugat ni un` kompania? I asuntu mas gaige gi bandan integredat ke ligat.

`Nai ma-apasiye hau, ensegidas un` dibi ennau na kompania. Un` tutuhon maliñgun integredat sa` mama` hau esklabu yan galagun kompania. Un` tutuhon umeskapaye haf` dipotsihe obligasion-mu kumu offisiat publiku.

Nahuñg lini`e-hu nu este na babarias desde 1978. `An un` batbaruye pues siempre un` fagcha`e problema gi ge`fena. Maliñgu kontodu inañgoghun publiku giya hagu. Lastima!

Hanom Lancheria: I Lt. Govenor as Biktot Hokog ha punu` priniponen inestablesen inetnon pot ayudun hanom para i lacherian iya Luta pa`gu na semana. Este na ginagau parat ausiliu gi man-lancheru siha pot umafagha` i nessesidat ayudun hanom yan tiempun maipe `sino añglu`.

Malefa si Biktot Hokog na i fangualu`an `nai ha sosoda` mantension familian niha i lancheru siha. Ha punu` este na ginaau gi hilu` natatah na eskusu siha. Estake para u siña mattu ayudun hanom ginen as Biktot Hokog atrasau sa` monhayan mankimason todu tinanom lachenru siha.

Malefa si Biktot na mana` sikat gayun gayera kaiha parehu yan `nai ha punu` linala` lancheru giya Luta. Malefa lokue` na responsablidat offisiat publiku i para u ayuda tautauña umadelantan maisa hinagoñg niha. Lastima i appottunidat sa` ha luñu` yan punu` mas linala` i mamopble na lancheru!

Chechu` Kriminat: Ha annunsia i gobietnu na para una` para todu chechu` kriminat gi halom gobietnamentu. Mauleg na planu.

Mas mauleg `an siña hana` magahet ayu na fino`ña sin u kilulog halom gi fache` hipokritu `nai ha lumos maisague`. Tutuhon hau gi chineneg para u mana` suha (impeach) i segundomu as Biktot Hokog.

Desde ñgai`an `nai siña ginen resulasion mana`en ñaihon fondun publiku para un` bisnis guine? Tras hana` seguru na mana`e $400,000 pesus bisnis familiaña gi mafahan MV Luta. Siempre baina` fattu este na asuntu gi kotte. Donde `sta este na chochu` kontra i taxpayers!

Disintunau: Hu e`ekuñgog sunidun imperadot hegsu` I Deni` pot esta pa`gu inipos disintunau. Kontodu kantot man-fatigau ni kantan niha. Dimas de umatulaika sige ha` de marepite! Kulan mohon tropan tañga!

Hu faisen kau taya` otru kanta matuñgu`. Ileg niha huñgan. `Nai mañganta, i mismu disintunau na sotfa sige marepite. Manyayas! Dalai ya tima huhuñgog na inipos disintunau kantan niha. Ilegña un` kantot, “Ketu Ta Iku sa` guaguan apas mamame maseha disintunau”. Man-osgun. Taya` planun adelantu!
•  •  •
Amot Manhassu: Mattu un` suruhanu gi gima` ume`e hagun mala`et ke tinegcha` atmagosu para u lomug para amot. Hu tugane un` hagun troñkun “nim” para u taña`. Esta nina` fofofu ni mala`etña.

Mañule` sa` dinanche na hagun. Hu faisen haf` na klasen chenot para u amte. Ilegña, “Champuladu!” Ha esplika na guiya este na chenot i sentaya` koneksion entre titanos yan sekus i malañgu. Udu! Huna`e un` puñu doni` sali para u chage puede fuetsau pinila` chenot champuladu. Ai na grasia!
•  •  •
Tai Ma`ñau: Muñga mafatta tai respetu-mu (mañan presonidu) kontra areglu yan lai i tanu`. Piot ya gaige hau gi tatkilu` na puestu. Mas magu`ot hau satton na responsablidat gi tinatiyen lai siha. Dispues, cha`mu malelefa na sisteman demokrasia i modun gobietnamentu guine.

Ti umahñau na siempre adumididi` ta tutuhon umaregla tatte tano`ta gi hilu` sisteman demokrasia pot interes i linahyan. `An tai planu hau rumespeta haf` mandatun lai siha, pues maulg un` resigna hau ginen puestomu pa`gu. Cha`mu nanañga na i publiku un` inafuetsas ginen puestomu. Ti mapot este machogue pot interes publiku `nai u tachu pot dirichoña.
•  •  •
Arestau: I ma-arestan ginen ma`gas polisia pot masogne ha abusa un` minot na patgon palao`an tat tiha tomba guine gi alacha. Makat na mensahe `nai ha fondu inañgoghun publiku gi depattamentu ni pumupulan pas yan safun membron komunida guine.

Dispues ilegña i ginen ma`gas polisia na baba mataña mina` ti siña ha tuñgu` kao minot. Lau ha segunduye gumalute i mismu patgon. Magahet na tiha ketuñgu` haye ha fefuegu? Hombre iya, komprendiyun i guafen minamahlau ni hagu mismu sumoñgge.

Namase` i prohima sa` petmanente ayu na paladañg giya guiya. Namase` pot todu i botlu yan minamahlau ni para uchahlau ginen man-atuñgo`ña. Puede u ma-akonseha pot para uma-esgaihon tatte gi dinanche na chalan lina`la`. Pinasensia yan yine`ase`!
•  •  •
Finu` Eñglis: Un` finagpu` eskuela, hu chuchule` un` sandwich para i gima`. Hafaisenyu` si nanahu haf` chinilele`hu. Hu sañgane na sandwich. Ha laladeyu` na “sandrich” ayu, ahe` ti sandwich. Gi sigiente dia ha koriheyu` i maestraghu na “w” gaige gi palabra ti “d”.

`Nai mattuyu` gi gima` hu sañgane si nanahu na basta mafana`gue-yu` finu` Eñglis sa` puru lache. Lau ansianu i amko` na para bai`n fan Amerikanu yan i atiloñghu! Ai na grasia!
•  •  •
Chiliguagua`: Hu tatiye un` premihu tumalaya. Era guahu chumuchule` i guagua` tumalaya. Gi un` tapada buyada kinine`ña na laiguan, tiau yan manineñg. Sigeyu` chumefla sa` esta nahuñg para kelaguen mame yan maneñgheñg sitbesa.

Gi kinekeyuñg mame sumugu` un` prohimu ya ilegña maulegña `an lamasan fiestan patron `nai mapega i kelaguen. Inna`e todu. `Nai sige ham mumaneska dispues ilegña na taya` chesan mame. Hu sañgane na gaige ha` damagas-hu para bai chopchup! Ai na chaleg ham! Hombre makat ta ñega che`chu` santos.