Asuntun Sueddu

Asuntun sueddu dos klase guaha: miniumum wage yan living wage. I finenina kuantu un` gagana gi ora, i segundu mapisu gi gastun linala`.

Kuantu sueddo-mu gi ora lamayot patte mau`udai gi kualifikasion yan eksperiensia-mu. `An magradua hau gi kolehu mas dañkulu chansa-mu masueddu guaguan. Yangin settefikun high school solu, pues menos ke ayu i magradua gi kolehu.

I segundu na modun sueddu suffisiente apas-mu deste tutuhon. Kontodu para guma`, kareta yan nesessidat familia siha libianu` un` kubre (living wage). Mauleg na modu lau inipos guaguan para parehu ha` praibet yan gobietnu. Pot ihemplu, achog pa`gu hau makone` macho`chu` debi un` ma-apase ti menos ke $14 pesus gi ora. I sueddo-mu ennau i $30,000 gi sakan.

I segundu modun sueddu mas guaguan gi siuda siha `nai tatkilu` i gastun lina`la`. Guine, guaguaña gastun lina`la` ke iya Tokyo! Rason? Todu nesessidat-ta debi uma-inkatga ginen hiyuñg. Lau makat na attikulu pot popble ekonomian i tanu`.

Este i sueddu mauleg ta komprende na i gobietnu para man-gasta aduana (taxes) ni finatinas i bisnis siha. I komunidan bisnis primera checho`ña i para u famatinas ganansia. Mampos pa`gu chafleg este na patte gi ekonomia-ta. Ayu na kara` i kahan iya Marianas.

Sensian Hinimidde

Guaha dos lugat ni numana`e-yu` hinimidde kada hu bisita. Era i hatdin `sino gualu` yan kanton tasi. Sige hu ebalua haf` na taiguine sentimentog-hu gi kada mattu-yu` gi dos lugat. Sumen na ma`agem na siñiente antes de biradan i gima`.

Guiya este na plaset `nai kanaha` todu familia fumatoigue deste antigu na tiempu. Poresu na mafatu sensian katma yan hinimidde sa` tafachuchu`e i mana` gasgas yan matanumen gualu` familia. Entalu` che`chu` gualu` man-hanau hit dispues man-talaya, chenchulu `sino peskan fisga.

Huñgan, malofan-yu` guine na chalan antes. Tat hobensitu ti sumaunau solamiente pot mantension familia. I kinisecha ta agradese sa` ginen masahalom-ta. Tafachuchu`e ayu mina` taya` lastima gi chinile`ta ginen lamasan sena.

Mantomtum i mañaina-ta gi planun haf` na golai yan gulusina para u fan matanum. Ayu fine`nina i chadeg makusecha yan fahna. I pumalu mangaige gi oriya tat kumu sune, choda, kamute, dagu, yan otru siha agu`un haya. Man-mauleg na sensian kilisyanu gi oran kinisecha sa` mana` fan mañage lokue` i bisinu. Estague` sumimientu hihot na relasion gi halom natibu.

Magahet na i dinimandan modetnu na modun linala`ta fumunas i hagas kustumbren i señgsoñg `nai ta chule` dididi` kinisecha ya tana`e i bisinu. Lokue`, maliñgu ayu i, “Tan Maria, ilegña si nana-hu chage dididi` este i kamute” pat platun guihan. Estague` kase mina` mafatu hinimidde giya guahu, un` kustumbre-ta ni esta mafnas lau hagas hayu-ta.

Probleman Sanhalum

Mampos man-diskuidau man-ma`gas iya Marianas gi bandan moneda. Kara i gobietnu lau mampos mañgontentu kulan mohon machuchuda` salape gi kaha. Diberas, husga kabales haf` magahet i kondision fondu guine. Kanaha` todu operasion yan obligasion man-ma`apasen tiau.

Kulan lokue` patte gi kutturan man-ma`gas na gigon matompu` Marianas man-esalau na para umana` guaha negosiu yan federat pot relasion. Haf` na relasion in` sasañgan? I kara` kahan iya Marianas ni sen taya` animum miyu umaregla? Manu `nai gaige i bibu na makinan casino kau ha kubre i ma-ekspepekta na ayudun fondu?

Dimas de uma-attende i didog na probleman i tanu` tinane` mañgarera hiyuñg Marianas. Unu kumekuentus pot ti pettinente na asuntu mientras i otru mañoda` eskusuña gi usun nuebu na palabra. Dios mihu! Gaige dichu problema gi tanu`! Siña mañagan ñaihon hamyu ya in` aregla i primera fatsu? Haf` na para tasosogne federat lau hita muna` kara` i kahan iya Marianas?

Dispues duru man-esalau pot negosiun politika. Man-malefa na petmanente i relasion entalu` Marianas yan America? Taya` siña tumulaika i lai federat `nai gaige i kontrata fuera ke Kongresson iya America. Ti mapot este na asuntu fuera ke tahatme franelan tatamudu kadu` ta komprende i tita komprende na asuntu. Dios mihu!

Taitai haf` i kontrata hasasañgan yan haf` ti hasañgan ni ti hasañgan. `An ti un` kumomprende gi primet biahe, chage tumaitai i matranslada na materiat gi finu` Chamorro.

Lamayot patte na mampos chatsaga kinalamten i tanu` sa` i mangaige gi imperadot hegsu` I Deni duru manlosus dimas de u maprekura usun kabilosu yan menhalom na pinetsige para umaprebeniye ausiliu gi publiku! Na` mamahlau este na che`chu` ignorante `sino diskuidu dispues de todu i promesan promesa pot ayudu.

Megai besis `nai hu faisen maisayu` kau guahu ti kumomprende i asuntu? Lau `nai hu lilli`e sapet na modun linala` gi tautau siha, haf` taimanuyu` lache `nai kontodu guahu mafafaisen haf` na taiguine na te`ug diskuidu guaha? Pot fabot fañgalamten sa` i diskuidun chinatsaga gaige hale`ña gi manadan plinantan miyu diskuidu!

Pot Kutturan Natibu

Entalu` este yan Guahan, dañkulu na inatisa pot kutturan Chamorro deste dandan, baila, sakman, kagumañg kontodu hagmañg.

Mientras machochoneg usun liñguahe sige hit man-finu` Eñglis. Deste oga`an esta i oran maigu` diariu man-finu` lagu i natibu.

I hale` yan troñkun kutturan natibu gaige tutuhoña gi halom gima`ta. Deste liñguahe yan todu finana`guen kustumbre debi u tutuhongue` ginen halom guma`.

Pot ihemplo: Yangin un` finu` Chamoruye famaguon-mu siempre umatuñgu` liñguahen niha ya ma-usa diariamente. Todu finanague-mu siempre umakomprende deste ineyag luma`la`, espirituat, unestu yan yine`ase` gi otru. Siempre u fañetun giya siha. I mapraktika dispues de madiñgu pettan sanme`na ginen finanague-mu. Los uttimus, siha espehos-mu gi komunida.

I familia i mas metgot na pisun maseha manu na komunida gi enteru elmundu. Gaige guennau i hale` yan troñkun primet finana`gue gi famaguon-ta.

Yangin para ta añgoghu halom kuatton eskuela pues ala kuenta ta transfere obligasionta guatu gi maestro yan maestra siha. Ti dinanche este na hinassu. Hagu ni saina gai responsablidat futtunan patgon-mu. Manteni fitme obligasion saina ya un` esgaihon famaguon-mu mismu. Hagu ha` solu siña lumimienda siakassu na guaha chinatsagaña ennau na patgon.