Batkon aire sin pilotu

Dumadandan-yu` kanta siha ni hagas in` dadandan antes yan i Tropicsette. Sumasaunau “adios korason”, lahe hanau, hatdin paraisu, flores Marianas, ti gi un palasyon riku, yan otru siha sunidu.

Dispues mattu-yu` gi un` kanta `nai ilegña, “I batkon aire sin pilotu”. Kase kanta pot mayute` i paire ya tinetpe puminite.

I mismu sunidu lokue` kabales ha deskribi kara` kahon iya Marianas. Lumalailai sin pilotu ya ni timon taya` para u ma-esgaihon mona.

Hu dandan lokue` “nobia”, un` napinite na kanta sa` i hagas nobiu kumantaye i nobia gi pueñgen komplimentu. Bonitu na kanta pot mensahe para i nobia gi mañainaña antes de uma-echa bendision umakamu` gi sigiente dia.

Lau sige ha` hoñga i ekun “batkon aire sin pilotu” gi fondun talañga-hu. Ni haf` na lugan guafe umahatsaye kara` iya Marianas siempre u poduñg ginen minakatña mismu. Megai para u fan mamadese ginen este na diskuidu.

Mangai sustansia i kantan antes siha gi todu tres liñguahe. Agradesiyon ma-ekuñgog i mensahe ni kinakatsu kabales na sentimentu. Guaha siha man-matranslada ni umafagcha` kulan tunadan isla.

Lamegai lokue` man-lache na finu` Chamorro. Bai rekomenda na yangin mañge` hau kanta, na`e i tumuñgu` finu` Chamorro ya una` dinanche palabramu.

Kanta, oppan gi maseha manu na komunidan isla gi enteru iya Pasifiku. Estague` un` chalan `nai a`anog sentimentun tautau isla entre pininite yan man-namagof siha na okasion.

Lau mampos na` abarambau hinassu i “batkon aire sin pilotu!” De dios!

Te`ug na asuntu: I baban ekonomia hagas ha chalapongue` gi linala` familia siha guine. Mas tiempu mas didog i pinadese gi halom tautau-ta. Kuestion: Haf` i mansabiun hegsu` I Deni` mapetsisige para uma-adelanta i ekonomia ni humohogse kinalamten familia pa`gu?

Nañga sa` man-hanau mañgarera para DC yan Tobi de hemunos kau kara` i kahan iya Marianas. Dios mihu na mañan diskuidu!

Ilegña un` attikulu na kahulu` adelantun ekonomia tres pot sientu. Ti ma-inklusu kuantu pinidoñgña i lamayot patte gi hagas abarambau na kinalamten guine.

Poresu na hu chochoneg fehman para umana` guaha planu `nai todu petinente patte guine siña mañaunau gi areglun ennau na planu. U fan inayuda ni professionat na tautague` ni tumuñgu` plumaneha mauleg siha na adelantu para i tanu`.

Sin planu pues sali hit de man-esuette ginen i aire. Areglu guaha gi maseha haf` na planu mapetsige gi maseha manu na tanu`. Tat presisu na para ta tatiye pañgpañg napu `an afnu`. Presisu na ta planeha futtunan famaguon-ta.

Mantai Gima`: Guaha un` estorian gaseta ha pasalista kuantu na natibu giya Guam mantai gima` familia. Mas ke kiñientus numeron este na grupu. Gi halom este 132 ginen sankatan na Marianas. Nachatsaga na estau gi katkuet manera.

I dichu kuestion: Haf` tinateña este chinatsaga? Kau pot mantai che`chu` i los probes yan kau guaha ahensia ni siña man-ayuda sumuda`e offisiu? Mauleg `an guaha ayudun federat entalu` temporariu na fanliheñg yan food stamps. Lau temporariu este na katsu. Debi u guaha animu gi inaligau offisiu `nai guaha kampun ineyag yan edukasion.

Mampos hit mañgontentu gi presisu siha na disision yan disposision ineyag yan edukasion na hita mismu tumailayiyen maisa futtuna-ta. Pot fabot gigon guaha kampu ma-empleha hatme ya un` tutuhon muna guahayen maisa hau. Estague` dinisehan mañaina-ta i sensian animu diariu kumu patte petmanente gi kuttura yan tradision natibu!

Tiempun Eskases: `Nai ha fagcha`e hit semanan brok mas guaha inadahe gi gastun monedan familia. Mas este na inadahe in` pilan na biahe sa` mas didog na sapet para mona.

Puru dilinkuente pumalolopu` familia siha pot taya` adelantu gi sueddon natibu pot bente años na tiempu. Gi hilu` este man-bulachu hinassun niha i kabisiyun hegsu` I Deni` haf` finenina para uma-akude. Mientras masosoda` haf` mauleg sige ha` mas mafondu linala` i publiku.

I sentimentun diniskontentu mas te`ug yan a`gañg publikamente. Siempre ta aregla este na diskuidu pa`gu na Nobiembre.

Lastro-mu: Guaha fumaisen-yu` haf` sustansian estoria-hu pot deñgdeñg ni hu lagnos gi alacha. I morat: haf` mauleg pinega-mu lastru para i manatatte dispues de malofan hau gi hatdin lina`la`?

—

Unu na lastron mañaina-hu chettun giya guahu: minesñgun gi halom sisonyan yan rimulinun pinepble. `In aksepta i man-taya` mame lau in` espiha koyenturan linala` entalu` gualu`, peskan tanu yan tasi.

Puti malag i misan gayu yan matiteg franela sa` ayu ha` guinaha-hu. Lau ha tampe-yu` i Saina ni sutanan tanores `nos kuantos biahi-hu para i atat mañetbe. Dispues, adumididi` `nai `in seda` ginefsagan mame. Bali mesñgun!

—

I otru adelantun linala` espirituat. Ala kuenta añklan mame deste tutuhon estake man-echu ham tautau yan mañelu-hu. Ni unu humatme offisiun kriminat. Todu man-felis gi kareran niha. Agradesimientu para i mañainan mame.

—

Sessu lokue` umekuñgog-yu` grasiosu na konbetsasion mañaina-hu. Ayu `nai umeyag-yu` usun humidde yan su`anu na palabran Chamorro. Pot ihemplo: Ilegta na “mañagu” i palao`an. Dinanche! Lau i mas propiu na palabra “man-diskatga”. Mañagu mauleg na usu gi ga`ga`.

—

`An mattu hau man-bisita, maplanta i kanastran mama`. Un` ami hau pugua, pupulu, afog yan amaska. `Nai esta makatkula na nina` batbaru hau ni bulachun mama` `nai mafaisen hau haf` sessu finato-mu. Finu na konbetsasion yan usun palabra estake man-adiñgu.

—

Huli`e na i usun finu` Chamorro su`anu siha na palabras. Kumeke ilefg-hu ti direktamente mana`yan hau haf` na intension. Pot ihemplo: `An para un` fañgopbla manana`lun inayau salape` siña un` usa chinatsagan patgon-mu man-apase atkilon guma` kumu estudiante.

I man-didibi debi u hoka ensegidas pineduñg fino`mu pot dibiña. Antes de un` hanau nina`e hau ni salape ya man-gagau dispensu pot atrasau hanana`lu. Tai guine na modun konbetsasion mina` motmut inafamauleg gi tautau-ta.

—

Hu fagcha`e primu-hu gi fina` maneska. Ha soyu-yu` chesan “hurry up” tat kumu flitadan babue ni mimantika yan tininun tiyan babue. Guiya ayu na chesa i siempre mofona hau ke ambulans guatu gi hospitat. Dios mihu!