Futtunan Famaguon-ta

Gi finu` i kuentos makat para un` tuñgu` asuntu ni ti un` tuñgu ya siempre un` matompu` gi hemhom na fina` katsada. I para un` ketuñgu` i asuntu presisu na un` aksepta sensian hinimidde.

Pot ihemplo: Ti bai` chansa umatrebi-yu` na hu tuñgu` kuentas ni mafanana`an calculus sa` tihu chule` ennau na asuntu gi eskuela. Unu hu tuñgu`, tihu tuñgu`. Pues ti bai` lapbla sekoshu piot kontra i manma-estudia pot calculus.

I puntu, debi man-sabiun I Deni` uma-atmite na kara` i kahan iya Marianas. I para umaditene i asuntu gi dineskuten otru asuntu ti satbasion. Eskusu! Si dakon siña esta dos biahe ha liliku`e` i tanu` antes de u gotde si magahet listun sapatosña. Dispues, i minagahet tat presisu na un` bira hau tatte para un` fandage mas.

Gi hilu` pumalolo`pu` hit na tiempun eskases mas siempre u didog pinadesen i tautau gi sigiente dos años antes u guaha dididi` adelantu. Makat na kontrariu i apenas pa`gu fondu gi kahan i tanu`. Sañgan i minagahet dispues tutuhon ansianu siha na pinetsige para in` adelanta rinikohen moneda para setbisiun publiku, pa`gu!

Hinasan Diskuidu
Hu chage umebalua haf` na mampos hit mandiskuidau ni kuttura yan tradision natibu. Kau ha hatme hit kustumbren konsentidot `nai mapla` satton na finanague haf` tinatet-ta deste kuttura, tradision yan liñguahi-ta?

Mampos matulaika mañan famaguon na tiempu. Maliñgu kustumbren manñgiñge` gi man-amko`, manfinu` Eñglis dimas de finu` Chamorro, kontodu kustumbren iphone yan ipad `nai ti mana` presisu respetu gi grasian Yuus tat kumu sentadan familia.

I presisu na adelanton espirituat kulan masotta gi kaprechon niha. Hasan tali`e` rinikohen familia para Misan Dameñgo. Megai lokue` ti manfafatu gi gima` Yuus. Ti hu komprende umesgin mamanu mage este i nuebu na kustumbren famaguon.

Ginen diskuidu-ta ni mañaina uttimoña tafana`gue famaguon-ta liñguahen niha kumu segundu liñguahe sa` tana` fofo`na i finu` Eñglish. Atan sa` klaru na tinatten kuttura yan tradision mina` likidu i rasan Chamorro guine siha na perlas.

Gi inai Lali Fo`
Umasoda`yu` yan un` achahet-hu ni dumañkulon Lali Fo` antes. Kanaha` trenta años ha diñgu i tanu`. Hu offrese mama` `nai ha afgue-gue` para unna` agaga` pachotña. In` atan i lugat `nai manpeska antes i maestron tasi `sino peskadot.

I mismu lugat `nai maselelebra lokue` gipot San Isidro, patron i señgsoñg gi kanton unai. Mauleg na ineyag gima` komunida yan maestron peska manmafana`gue i manhoben guihe na tiempu lumulai deste fisga, togcha`, panag, umetupag, talaya yan chenchulu.

Kulan mohon finattoña ume`emahalañg ni hagas soñgsoñg. Ha hassu sumaunau pumeska, muna` gasgas guihan, manlasas choda, mendioka yan sune gi preparasion gipot patron. Era sige ha kuestiona maliñgon finapos antes ni benefisiosu para i manhoben. Konfotmeyu`.

Ha hassu tatte i fasun man-amku` ni krumeansague` antes. Ilegña nu guahu yan mesgu` mataña, “Lastima!”

Chetnot Daibites
I neñkano`ta muna` fan mamadedese hit chetnot daibites. Ti na`duda na megai lokue` na mediku ti tumuñgu manu `nai gaige tutuhon este na chetnot.

I pahariya gi fihon estomaguta umareregla usuña i asukat ni gaige gi haga`ta. Ha hala guatu gi sagaña (cell) `nai siña i tatautau-ta hana setbe para mantension.

Diariu ti sessu ta repara haf` siha ta kakanu`. Bula mampos asukat gi neñkano`ta ni chumochoneg parahiya-ta mamaiche`chu` fuetsau. Tantu de tana` fachochu` mas ke fuñgsioña uttimoña malañgu.

Dos muna` lalamen parahiya-ta: Asukat yan asidu siha gi neñkano`ta. I primet mas muna` atmariariau kinalamten parahiya sa` ensegidas hana chadeg mampos kinalamteña i asukat. Este yan mattirun asidu gi neñkanu kanaha` seguru na ha punu` kinalamten parahiya-ta.

Gigon pumara homlu` na kinalamten, manhalom hit gi chetnot daibites. `Nai guaha mas diskuidu, sige mona estake kontodu renihion-ta pininu`. Gi este na estau kontodu hinemlu` korason seriosamente inaminasa.

Bai` sige umina este na asuntu. Gi biradahu bai` lista i siete na neñkanu` ni miasidu kosake in` chage sumuhaye. Hagas ha estotbayu` este na chetnot sa` un` manada gi tautau-ta maninaminanasa na tiempu. Dispues, un` ratutu ha` mankineni`. Ti debi na taiguine na modun linala` u guaha gi halom natibu. Gaige satbasion giya hita mismu.

•••

Pot chaleg: `Nai marisetayu` un` biahe ilegña i infetmera nu guahu, “Ai señor na minames hau!” Hu oppe na poresu na tihu nana`ye asukat esta i gimenhu kafe `an oga`an. Duru chumaleg. Deste ayu na tiempu (kasi 20 años malofan) hu ataha usun asukat yan dañkulu hu ribaha kuantu hu kakanu` diariu.

•••

Ha`anen Gupot: Namagof finatton ha`anen gupot siha. Maseha man-aronsasada hit gi halom fache` chinatsaga ni unu sumeha umabiba finatton i Rai man-rai siha. Gi mismu tiempu mafattu siñienten luhan gi bira birada. Kasi todu pumadedese este.

•••

Kliman: Pa`gu na sakan mapredikta na mas anaku` i tiempon maipe yan añglu`. Esta guaha siha na lugat gi tanu` manpininu` tinanom niha piot i sanlichan na patte giya dos America.

Mauleg ta akanteha umekuñgog haf` `ste na kinalamten. Seguruyu` na kontodu tupu` hanom-ta u fan inaminasa `an ha palo`pu` hit este na fina mattiru. Hu atotga umatbahet este na asuntu para muñga na u gacha` hit induktu.