Halom suenan katma

`Nai ta gacha` 65 años, memetgot ha` hinassota na libianu ta mueba fuetsan hoben taiguihe antes. Lau, kasi maulegña `an ta pasensiayen antes de tana` lamen maisa hit. Tatnai sisida, dios mihu!

Magahet na dañkulu i difirensia. I macheteghu ni esta bibiñgbiñg `an hu sague` antes gumupu gi primet sakudida. Mauleg na guaha kolat alamle ya tinagam `sino guaha huna` lamen guihe na talo`ane. I kuha hu pega gi un` banda kadu` tihu li`e`. Ayu balihu manrikohen gunut yan matai hagon choda. Nahoñg na cho`chu`, diariu.

Sumehayu`, dispues sigeyu` chumaleg ni maliñgun fuetsaghu. Esta kahulu`yu` ya sige huna`e` animu mamokat pot para asegura na maseha adai mamokat sisiña ha` trabiha. Hombre ni este esta maliñgu lokue` linistoghu. Taigue!

Pa`gu, achog patgon dikiki `an husoda` gi entalu` estanten tenda, hu birayu` ensegidas. Rason? Pot no u tataga` karate si pindehu ya u lachaiyu` muna` fangagau asi`i` sin presisu. Este i mangagau asi`i` gaige `nau na lamasa guihe hulu` as San Pedro.

Pale` Tradision: Gi lamegai na okasion selebrasion dinaña` natibu guaha kulan apuntau na pale` tradision malag sanmena ya manaitai. Ti hu tuñgu` haf` guaha na tinayuyot lau enfin kulan ginagau bendision Chamoru! Manu na patte gi estorianChamoru `nai gaige este na modun pale`?

Estorian espantau i Chamoru ya i malagu yan kumahat patte diariu gi hinanauña. Tai tiempu mama` sabiun kanton kantit. Sige de umentalu` fanatukan para u satban maisague`.

Na ti magahet na mapega ni antigu na manamko`-ta kalaberan mañainan niha gi halom apusientu kumu sagradu na onru. Huñgan, magagagau lokue` ayudu `nai guaha mafafana` dañkulu na chinatsaga `sino ira. Lau taigue ennau i modun pale` guihe na tiempu. Pues anog na mafabrika este na tiempu pot guaha manmalago manpale` totut!

Dispues tinatiye ni kantan anaku` na esalau (chant). Pot uttimu besis, manu gi estorian natibu nai gaige este na patte? Hu komprende (sa` damañkulon Lali Fo` yu`) na gaige este i chant kumu patte gi kutturan Karolinas. Dañkulu signifikasioña kau na`magof pat triste na okasion. Otru mafabrika pot guaha gumuife manmadren esalau kulan katen utak gi pueñge.

Este na hinanau masusesede `nai mattu i asuntu gi puntan chalan kometsiu (commercialization of culture). Ti rason este para un` fandage haf` tinatemu! Na dinanche yan diberas haf` gaige gi in` checheneg na baila siha sin in` sakrifisia dignun tradision natibu!

Hinimidde: Tres biha sessu mattu gi hinasoghu teñga `an sigeyu` mona gi diariu na nobenahu. Hu repasa haf` na mangaige ya monana gi hinasoghu na oga`an. Siha i tres kulan umesgaihonyu` mona gi ineyag humidde na linala` gi manu i guaha.

Agradesimientu para siha gi todu pinasensia yan ma`ug na akonsehun niha. Hu sen agradese i manñge` konkariñu siha na palabra mientras malalasa apaga`hu `sino ha`ihu. Magahet sumen nama`aggem finu` pasensia na saina.

Pinasensia: Mientras mas hit amku` mas lokue` umanchu sensian pinasensia. Mauleg na tinilaika gi karera pot para muñga na u totbus haguan metbius sin presisu. Dispues taya` presisu na para unna` chathinassu hau mismu. Yute` gi un` banda ya un` atilige fasumu! Homlu` i para unna` guaha minagof gi ha`animu.

Pinegsai: Un` tiempu mamogsaiyu` babue yan manog gi tatten guma`. Mauleg na tane` lau pot manhihita yan i mituñg i kelat todu dia yan tula noche. Namagof na offisiu piot gi finatton mañelu ya sige grasiosu na konbetsasion yan fina` chaleg. Estague` finapos megai na famaguon guine gi sisienta yan sitienta na sakan siha.

Minesñgon: Namatman un` malañgu (kanset estomagu) gi uttimu agonias `nai sige ha` i biha hana`e` agradesimientu i bisita yan ayu i umasistegue`. Mesñgon para i pinadesiña lau sentimalefa hayegue` umasiste. Tihu komprende.

Guse` Kanai: Umasudayu` yan amighu ni dumomu` un` Choseñg giya Magpi` pot finanu`e ni kalulot paluman ta`lu`. Magahet na lache i para un` dispone hau kulan mohon hagu ha` i paire gi chalan publiku. Tuñgu` manrespeta! Hu atan i amiguhu ya umachatge ham pot kasi malagu ha` mandomu` para u li`e` na sisiña ha` mandagau akagueña.

Maneska: Mientreas tantu, sige i tropa manmaneska gi kanton pantalan Susupe. Gi este na eskalera `nai siña un` huñgog kabales sentimienton otdinariu gi halom tautau-ta. Ni unu` kinetbabata pues chagu` i chansa para u fan gotgan gi finu` niha. Tunas yan frañku masañgan siñienten niha i los probes.

Diberas: I amtau yan menhalom na gaseteru ti u faisen, pot ihemplo, i ma`gas polisia haf` masusesede. Siempre bai` adiñgan yan i mas sessu mana` pili`au gi halom rimulinon disision tat kumu i corporal. Debi u kuentos pot satbasioña yan otru siha empleau. Gigon un` kuentuse i ma`gas magpu` kontodu nobenan talo`ane.