Konbetsasion Kontra Mañge`

Dañkulu na difirensia liñguahen konbetsasion yan matuge` gi todu liñguahen elmundu. Gi hilu sahyan konbetsasion taya` maseñala areglon konduktan inadiñgan. Todu atbettu i pisu `nai libre hau humapbla.

Taya` ma-aksepta areglu pot usun gramatika yan hechuran dobladan palabra. Saulag esta i dispues `nai tana` fan a`adanche puntun haf` madiskute. Todu bali!

Gi bandan konbetsasion appenas `sino hasan mangai abilidat usun palabra ni fitme dumaña` kabesa esta`i puntan hila`ña i uma`adiñgan. Tres ha` na Chamorro huli`e` mangai abilidat nu este. Los dimas, memegaiña para mane`suette inanalisan otru.

I matuge` na` finu` Chamorro fuetsau un` embrasa fotmat haf` na asuntu para un` diskute gi tinige`mu. Humalom areglun gramatika, usun palabra yan señat gramatiku, relasioña asuntu yan otru attikulu siha gi ge`tatte. Umeyag hau mañge` palabra pot palabra, sentensia pot sentensia, estake unna` fonhayan tinige`mu. Mas fitme giya hagu menhalom na hinisgan yan inanalisan asuntu.

Dispues de lagse hau man-analisa mas lokue` listu gi usun antau na rason gi konbetsasion-mu. Mas fitme dos adeñgmu maseha ñgai`an `nai umadiñgan hau. Mafattu este na linagse` ginen eksisiun mañge` `nai guaha appottunidat manhassu gi hilu` pisun kritikat yan analisau na materiat siha.

I para un` tuge` haf` siñientemu ti parehu yan kritikat na inanalisan puntu gi dichu asuntu. Un` komprende todu puntu pot puntu `nai un` diskute dispues gi tinige`mu. Estague` na bintaha guaha gi matuge` na finu` Chamorro. `An taya` tinege`mu benefisiosu para i manatatte pues muñga machalegua i katman hanom gi halom sadog.

Poresu na hu sosoyu` todus na u fan eyag manmañge`. Mauleg para hagu petsonatmiente `nai un` choneg mas mona ineyag liñguahen natibu gi halom famaguonta.

Pot siha ti pot natibu

Esta kanaha` hohokog manhanau hinerasion geran dos ni lumi`e` antes, duranten yan dispues de geran dos guine. Guaha siha estorian niha pot ayo na tiempo mannamagof, napinite yan lokue` ti sennamagof na finapos.

Pot ihemplo, gi tiempon Japones mabende natibu to`lang gi tenda ni masupiyu todu sinseña. Pues ginen titanos to`lañg `nai ta chuchule` sabot katnen guaka pat babue. I sensing mana` hanau para Japon gi metkau siha.

Ni achog Japon, i finatoña guine ti pot tautau tanu` soluke interesña militat. Todu ha petsige pot para u defendegue` kumegu`ot este siha na islas. No siakassu haf` pinadesen i natibu kumu siña ha defende yan gu`ot i tanu`. Haye ha` humalom ha yute` gi un` banda interest natibu pot interesña.

Este na finapos-ta mauleg ta tutuhon umebalua haf` sustansiaña. Espesifikamiente, kau propiu para i natibu i fuetsau kulan ayu ha` nina` siñata i para tamana` fañginlulog kulan totniyun makina? Guaha `nai in` hassu este na puntu gi estorian `sino finapos tautau-ta?

Atan pa`gu haf` na estau ta`lu `nai mangaige hit. Ti pot interes natibu soluke pot interes militat. Todu i tiempu pot militat! Debi u guaha fina` inasoda` manma`gasta yan offisiat militat pot para ta tamtam kau este ha` uttimu relasionta. Seguruyu` na guaha mas mauleg na inatuñgu` gi karera mona ke mañan no siakassu.

Asuntun Natibu

Todu klasen offisina manma-establese pot natibun este siha na islas, Chamorro yan Karolinas. Gaige offisinan Indigenous Affairs, Community and Cultural Affairs, Carolinian Affairs, yan Women’s Affairs.

Kulan mampos taduñg hineñgeta ni tautau-ta na manadan offisina manma-establese pot tautau-ta mismu. Yangin diberas i intension pues kanaha` tai kampu diskuidu kontra natibun este siha na perlas. Tatfoi hineñgeta sen taya` adelantu para i tautau-ta siha. Lau mandañkulun offisina establisau pot natibu.

Kau makat magahet mafotman programa pot tautau-ta? Manu na koyentura `nai gaige mamakatña i asuntu? Kau guaha chinatsaga mañge` propositu pot natibu? Guaha `nai ta atbansa kumechage este na eksisiu? Pat guaha `nai manadiñgan hit maseha pot kadu` tinituhon? Finu` un` amiguhu, “Ayu `nai sesen sustuyu` `an ilegmu cha`mu lilihan”. Guiya kasi este mafanana`an sensian chanseru!

Buente gaige lamayot patte problema-ta gi ti manseguru hit manu `nai para ta tutuhon inestudian modun ayudu para i tautau-ta. Ti mapot sa` kada dia ta tototpe i mismu problema ni ta upos kadu` todu mauleg. Guiya este i kustumbren “shoot, shoot, shoot”.

Edukasion, bisnis, hinemlu`, setbisiu siha para i publiku hinerate fumafana` hit diariu. Kada unu gi entre este na asuntu ha affefekta hinemlo` kinalamten tautau-ta. Yangin chafleg kinalamten ekonomia pues tat familia guine ti hana` gagalileg gi halom mutuñg na fache` didog yan miserapble na sapet. Makat i para ta prepara hit kontiempu pot no u fatoigue hit mattirun diskuidu?

Mampos yomug i gobietnon iya Marianas na esta mama` reput gi fatachoñgña. Ni para u sugun i lalu` gi guieñgña, chatsaga. Ni para una setbe i kemun makat sa` inipos machuchuda` sintiraña na esta ti linañgag ni timoña. Ai, ni para ta gu`ot tatte sinparat guinaiyan paladat-ta makat sa` mangulosu hit na tautague gi bandan sentada. Dios mihu!