Fatsu na representasion

Gi estrakadan moneda (budget) ha chule` Luta yan Tinian mas kopble ke Saipan. Hu atan hinanau dibate lau ni unu gi representante-ta umesalau na debi fuetsau umana`e mas Saipan fondu pot yinamag iran pagyu. Mañgontentu! I publikun Saipan i dada`da`!

Estague` na bahun represenetante pinega-ta ayu mina` libre yan obra i dos tanu` dikiki` (dadalag) mana baila i galagu (Saipan) sin sunidu! Magahet na taiguine na ninatatah `nai in` represesenta ham? Mañgge manadan promesa pot ayudu? Mas presisu Luta yan Tinian fondu ke manadan tautau Saipan ni esta pa`gu taya` kandet yan hanom niha? Manu `nai fuetsau inna` fan bachet yan tañga hamyu ni nesessidat tautau Saipan?

Siempre bai` pasalista kada unu gi gaseta yan haf` chatdisposisioña gi otru sakan elekesion. Esta fatigauyu` madage! Nahuñg! Ke lau mangai konsernsia i rumepresesenta hit pa`gu? Haf` na todu man-udu, bachet yan tañga?

Uson katgaderu
Kada hu dagau i haguet gi sagua` Fishing Base gumama gi supen tasi. Hu chage ta`lu un` biahe lau parehu ha` na son. Hu hala halom yah huna` lamakat i katgaderu. Ayu dispues `nai mañogñug.

Dispues de kulan kayao biahen este na pueñge, sigeyu` yan amiguhu umadiñgan pot todu klasen bida yan malabida gi halom komunida.

Gi dispues finaton mame tatte, sige ham man-uñgag ñaihon lateria `nai hu mente pot poduñg haguet gi supen tasi.

“Kulan asuntun publiku ni mamaya` gi na`tatah na tasin lehislatura pot tinahoñg kabesa para u inesgaihon papa` gi fondun menhalom”, ilegña i amiguhu Magoo.

“Dispues, ti u fan mañgonsidera satton yangin puru eskusu yan buetta `nai mapega i asuntu”, ilegña si Piñg.

“Makat na kontrariu piot ya megaiña manfatsu gi bandan manaitai manseriosu siha na materiat asuntun linahyan”, umentalu` si Lia.

I finu` i tres na bisita dinanche gi katkuet manera. Yangin ni hagu ti un` tuñgu` asuntomu pues taimanu un` diskute dibuenamente? I puntu: ni tali ni añkla guaha para i galaide`ta ni lumalailai esta pa`gu. Siña maseha pogse` troñkun pagu tana setbe sa` fitme ennau na troñku? Pot fabot maila` ta prebeniye aseguridat para i manatatte ni man-inosiente.

To`a na disposision: Mampos namamahlau disposision lehislatura `nai klaru ha kehayen maisague` na taya` to`a estudiuña gi asuntun linahyan siha. Masaulag kaprechu sin inina kau mauleg yan antau na finotman areglu para i mayotmente.

Mañaunau gi areglon lai lau ni siha ti matuñgu` haf` sustansian mafanana`an “supremacy of laws” `sino haf` na lai mofona ke otru. I constitution ya hululu`, tinatiye ni lai federat, dispues lai estadu tat kumu iya Marianas yan munisipalidat siha. Estague` na eskalera `nai tumunog sigidu fuetsan lai.

I para un` tulaika lai konstitusion ni inapprueban lehislatura na lai dañkulu na linache. Estague` na puntu `nai nina` fan salakumba` i lehislatura ni gobietnu gi mismu huegon niha! Che`chu` miron yan namamahlau!

Mañge Espiritun Natibu? Mampos natriste i tafatkiluye maguadog naftan manguelo-ta gi kanton tasin iya Garapan pot para umahatsa fasilidat casino.

Kulan tafatta na esta ti tana` presisu i sagradu na espiritun mañaina-ta ni apmam siha kumatga achon kabisiyu para i manatatte.

Enfin, para todu i maliñgon respetu gi sagradu na espiritun guelu yan guela uttimoña i fasilidat ti u felis kareraña para mona. Guaha siha para u fan masusede estake mahuchum i uttimu potta. Pot fabot esta huli`e` fuetsan espiritu. Ti presisu na baina` dos biahe!

Libianu mana abag hau, hineddan (mana` malañgu estake ti amtiyon) sino mana` tailaye. Todu i tres huli`e` masusede mina mampos dañkulu respetuhu gi fuetsan ti a`anog na nina` siñan espiritu. Fan egaga` ya in` ta`lun umatan kau kombene pat tanañgga estake ha funas todu i ti debi na u fangaige guihe na fasilidat.

Minagahet: Guaha lokue` umatbansa hinassoña haf` gaige papa` kontratan i Covenant. Pot ihemplo, ilegña un` saiantes karissu na gai “guarded sovereignty” iya Marianas.

Sovereignty na konsepto yan atoridat solu independente na nasion gai fuetsa nu este. Pot fabot na dispasiu manfabrikan konseptu ni nihagu mismu ti un` komprende.

Dispues, gaige gi Seksiona 101 gi papa` inakonfotman i Covenant na ta na`e i federat nu este na direchu. Gaige este gi gobeitnon federat. Pot fabot muñga manfabrika gi kaprichomu. Taitai kabales i kontrata para un` asegura na hilu` pisun faktu `nai uma`adiñgan hau. Di ba?

Dios Mihu: Masoda` un` neni gi tatten pick-up truck gi halom kahita un` taftaf oga`an. Dispues de marikonose managu` i tatan guma` na umakone` halom ya uma-assiste sa` namase`.

Man-oppe i nanan guma`: “Huñgan, keni` halom sa` patgon tatan miyu `nau. Puñiteru!” Guiya este i nuebu na tirun “daddy”. Dios mihu!

Magahet na metgot i sensian “che`chu` lahe” trabiha gi natibu! U guaha mohon inaguaiyan kotte dispues? Guiya `ste `nai un` tufuñg pattemu sepblanten check social security ya ni para apas amot tinahoñtg. A`saina! Siempre un` fanhassu ya unna` na`mase` hau `sino hilu` mahetog na bañkon kusina yan kestat gañgoche ni mana` maigu` hau. Ni señko` taya` para usumu.