Gi Hilu` Chinatsaga

Kanaha` todu guma` guine mangai kemon sanhalom. I primet ma`utot na setbisiu gi hinigua` pagyu i hanom. Ti manpreparau hit para i mattu na ira. Tat tiha ha destrosia gi todu i señgsoñg siha. Haf` na sagan basula katkuet rinkon ni un` atan.

Mas mannamase` ayu i mandinestrosia gima` niha. Sin inbatgu masuñgun chinatsagan lugat fanatukan pot taya` manu siha guatu. I sanlichan na patte Saipan esta mas ke dose dias desde ke taya` setbisiun hanom. Haf` `ste na fandañgun golai faka`.

Animu magahet i CUC, militat yan empleau GPA manna`tachu poduñg telefon. Ayu finenina i telefon ni humanau hulu` Dandan manmana` fanatachu. Era pot para umana` kalamten distribution hanom. Puede monhayan amanu i siña na chinadeg.

Na ti gi tiempon Ramon Guerrero (Kumoi) mababa i hanom gi sigiente dia dispues de pagyu? Haf` masusede pa`gu? Na ti hagas ha fuegu hit iran pagyu deste antes? Manu `nai manlotgun hit leksion na ta letke este na obligasion? Na`mamahlau na diskuidu!

***

Kuestion Hobensitu: Un` tomtum ni magradua kolehu na hobensitu fumaisen-yu` kau guaha kampon esperansa gi lini`e`hu pot futuron iya Marianas.

Ha atrebi mamaisen pot ha taitai `nos kuantos tinige`hu gi mansustansiau siha na asuntu na kritikat sentimentog-hu. Era, kulan ti hu eskohe haye para bai sablasus lau fafayihu este na huegu pot mas ke kuarenta años. Taya` sin politika. Lagnos mage asuntun linahayan ya ta pesa haf` bidamu.

Hu esplika na i eksisiun mañge`, piot gi bandan opiñion, patte gi sisteman demokrasia. Hu sañgan dibuenamente hinasog-hu pot para bai pañgon i mansabiun i hegsu` I Deni` sa` sessu manmaigu` gi mañgon kareta. Mandiskuidau!

Hu mente lokue` na huñgan gai esperansa-yu` ni futuron tautau-ta sa` gaige gi patman manma-eduka na famaguon-ta i hagas ta nañga siha na areglu. Era huna fan hahassugue` na sumasaunau gi inadiñgan asunto-ta siha para mona. Tomtum yan menhalom na hobensitu.

***

Otru Asunto-ta: I hospitat motmut manmalañgu. Mafa` kuattu i hagas AC-II pot guaha na malañgu numesessita elektrisida para makenarian mañglu` (oxyge. Agradesimientu para i infetmera yan mediku siha ni manohge 18 oras diariu para uma-assiste manmalañgu-ta.

Layeye na taiguine pot guaha siha na manmalañgu numesessita elektrisida para i makina ni manasesetbe tat kumu para mañglu` `sino oxygen. Seguruyu` na guaha lokue` mansinaulag fotte na maipe `nai nina` fan chatninagoñg.

***

Gi kada lemlem tautau, hu atan i mapagahes gi oriyan supin tanu`. Kumu agaga`, pues garentia na maipe i sigiente dia. `Nai esta ni mona ni tatte, hu pega futon-hu gi baranda ya ayu `nai hu soda` dididi` ginefsagag-hu dumeskansa.

Magahet na bula ñamu. Haf` na sotfan man-añghet `an sige manliliku` man-e`esuette lasas piot i mandaibites ni manmi-asukat. Esta mañechefla gi tininog niha. Guahu pa`gu duru mamada`. Kontodu labis-hu hu chaba` pot ñamu. Hu gagau fina` pas. Ni unu ume`eñgog estake hu soñge i señko`. Diberas.

***

Antes de pagyu, suena i pueñge `nai kulan-yu` tañga. Kumate i gualieg señat guaha para u fattu. Taya`. Ni telefon ti madiliñgdiñg. Dispues poduñg trosun uchan. Estague` muna` kontentun ñaihon-yu`.

Kulan hu offisiona umekuñgog este na sinesedidi-hu pot seriosu manmasusede dispues. Siña ha` ti hihot lau gai minakat i para u fattu. Mampos nachatsaga lini`e`hu gi kada biahe `nai ha danche-yu` i na`tanga na silensiu.

***

Apuyuak un` ga`ga` ni gai señat pot fotte na finatton iran pagyu. Gigon ha rikohe plinantaña tatarañas gi troñku pat lugan guma` aregla hau sa` i fette mamamaila`. Pa`gu i imperau guaka gi halom kolat, kontra linau. Tugtugag manog `an pueñge kontra dinimalas familia.

***

Diberas ti hoñgiyon minesñgon tautau-ta pot gaselina, ais, hanom yan ayudun neñgkano`. Ti hu lañgag ayu na tiru. Lau mamila pot este siha na nesessidat. Mauleg bidan i Marines ni machulele` mage makinan niha mandistillan hanom. Dañkulu na ayudu gi señgsoñg siha.

***

Esta hana` chaleg-yu` finu` Chinu pot destrosiun pagyu. Mana` paha i “fall down” desde guma`, kareta, palapala, magagu, kandet yan hanom. Ilegña un` palao`an Chamorro, “Chage run down”.

Era manmalagu para i lugat fanatukan `nai yinamag i gima` familia antes de tatalu` pueñge. Guaha fumatinas, guaha ha` lokue` mañugu halom gi fina` tenda man-atok estake malofan i mañglu`. Piligru machansa iran pagyu!

***

Pot primet biahe tali`e` tagpapa` na pagyu ni sumusteni fuetsaña gi 120 miyas gi ora. Kada manrikohe ya bumibu, i fuetsaña mas ke 200 miyas gi ora.

Pa`gu hulili`e` taiguine na fotten destrosiu. Ni sentron pagyu (NOAA) ti ha gacha` finaposña si Soudelor sa` tumunog mas papa` ke otdinariu na hinanau pagyu.

***

I fette na linau muna` chachatsaga hinasoghu. Gaige gi menan iya Tokyo gi halom Pacific Ring of Fire mapupulan trosun pidason tanu` mas ke dose miyas inanakoña papa` esta i fondun tasi. Fuera de ginemgon siempre iya Tokyo, i mafanana`an “mega tsunami” siempre ha destrosia i lugat yan bisinu siha.

Hafa mega tsunami? Hinalom tasi ni 100 pe linika`ña, kiñientos miyas tatte ya malalagu 100 miyas gi ora. Mas nachatsaga sa` ni hafa ya u sufa` ti u rinibaha lineka`ña. Parehu minedoñgña halom yan huyuñg. Konsidera fan un` ratu kau guaha chansa-ta `an ha danche hit ayu i mananañga giya Tokyo na mega tsunami? Konsueluhu i chagu` hulu` Tokyo.

***

I otru linau i inatotpen tanu` gi taduñg entalu` mafanana`an Philippine yan Pacific plates. Sumen dañkulu este na tiru sa` dos higante na achu para u asufa`. Haye mohon para u sanpapa`? Haf` ya i Pacific Plate `nai gaige Marianas sumanpapa`? Ti u hinala papa` i tanu` siha guine ya u fan finondu gi taduñg? Ni para bai` hassu sa` ma`añau-yu` haf` para umasusede `an umasufa` dos dañkulun achu` sanpapa`.

***

Siña ta letke i asuntu pa`gu pot kulan katma yan chagu`. Lau kau estake pañgpañg ya tat tiha yamag `nai para tafan a`aligau pot preparasion? Gi katkuet lugat, sanmena pat santatte na tasi, i fuetsan napun mega tsunami ti u sugu` ni manu. Parehu na fuetsa halom gi sientu pe linika`ña yan `nai humuyuñg. Estague` piniligruña este na napu!