Suabe Na Kantan Chata’an

‘An finagcha’e nubladu yan chata’an i ha’ane sigeyu’ pa’gu kumanta. Hana’ hassuyu’ as biahu pot guiya lokue’ sessu kumanta gi finatton mattiempu. Man-namahalañg siha na sunidu mafattu ginen korasoña.

Umafagcha’ yan dispasiu na pineduñg uchan gi hilu’ sin. Fresku i mañglu’ ginen haya. Sige ha estoriayeyu’ pa’gu pot antes kontodu haye siha parientela.

Mina’ mampos hu agradese ayu na tiempun mame sa’ guiya i nanan tatahu ya appenas ham kumonbetsasion. Motmut pinasensia, yine’ase’ yan hinimidde gi mañaña siha. Sumen kariñosa pumalablra. In’ sen agradese ‘an sige ha estoriaye ham pot antes.

Manadan kanta yan estoria hineñgoghu ginen as biahu. Ayu chetton i mannamahalañg siha na sunidu. Sumen na maggem finu’ un’ humidde na biha giya hame. I sinantusan na bihan mame mafattu gi hinasoghu ‘an nubladu yan chata’an i ha’ane.

Hinanau dos asagua

Sige hu arestreha finapos dos fiet na asagua haf’ masusede ‘nai mofona i unu para i tainekog na deskansu. Kasi pot mas anaku’ dos años dispues ‘nai humanau i otru. ‘An soplu pues anaku’ ha’aniña ennau na amku’.

Hu guadog haf’ mohon na taiguine na finapos masusede dispues. I unu huli’e’ klaru i mahalañg i tatatte gi pinayoña diariu na dinaña’ yan fiet na asaguaña. Sessu umemahalañg ni taiguen fiet na amigaña ‘sino amiguña. Estague’ kasi umesgaihon dispues humanauña. Kulan i mafanana’an “love birds” ni debi usisiha todu i tiempu.

Guaha lokue’ estoria pot un’ biha matai asaguaña giya Roma. Ma-offrese setbisiu entre para umana’ hanau tatte America pat umahafot giya Roma pot asuntun gastu. Ilegña i amku’ na para u kone’tatte sa’ pot ha huñgog na gi uttimu biahe ‘nai guaha matai guihe kahulu’ ta’lu gi mina’ tres dias. Dios mihu!

***

Napun Agostu: Sessu gi mes Agustu in’ bisita tasin Lali Fo’ nai manloka’ i napu siha. Guiya este na tiempu ‘nai sessu pagyun tasi. Esta mane’esalau manloka’ lañgat gi rubentason. Mauleg sa pinatañg ‘sino ha lachai ham gi ge’halom muna’ fañgilulog.

Gi este na mes ‘nai i inai iya Mañagaha hinala guatu Puntan Muchot. La dañkulu na patte inipos natata pot mi-unai. Adumidide’ gi finapos tiempu ‘nai numa’lu tatte i inai giya Mañagaha. Kasi todu fina’ unai guine kulan mantinilaika hechuran niha ni metgot na trosun napu yan sakudidan risaki.

Gualu’ Kalabera: Sessu in’ dalalag si Ta Iku (kiñadun biahu) para i lanchoña giya Kalabera. Sige in’ ayuda gi halom hatdin. Gi kasi ‘la siñku ha rikohe i tiba gi ‘nos kuantos troñku dispues hana’ fañochu i pinegsai siha. Gi lamasan kusinan i lanchu ha kachetgue’ dididi’ mama’ antes de biradan para i gima’. Sen ti mefnu’ na sainan mame.

‘Nai duru uchan guihe na pueñge ilegña na siempre manmagof i tinanom siha gi finattun Primet Agua De Abrit. Era deste Oktubre gi tiempun maipe ha tutuhon muna’gasgas gi halom hatdin. Matanom fina’ a’gun yan golai siha para u finagcha’e’ finattun uchan.

Apmam de i gualu’ lugatña i amku’ diariu. Dies años antes uttimu biahe finatoghu guihe na gualu’. Kulan mohon gagaige ha’ si Ta Iku lau hagas humanau. I mames memorias gi ayu na lanchu chetton giya guahu.

Tinilaika Petmanente:  Deste ke tapega papa’ i fusiñus, kama’, machete yan kuha gi gualu’ pot cho’chu’ gi administrasion i Navy gi finagpu’ geran dos i uttimu biahe ‘nai ta praktika i kabales na tradision natibu—fangualu’an yan tasi.

Che’chu’ muchaha, ayudanten infetmera, makinistra, kusunerun, draiban truck, elektrisida yan katpenteria na offisiu siha tachule’ gi papa’ i NTTU. Maseha i sueddu $.16 sientimus gi ora ta usune pot mas libianu ke papa’ somnag gi halom gualu’.

Guiya este na despedida tumulaika petmanente modun linala’ta. Uttimoña i fangualu’an ta bisisita gi uttimon semana gi dinaña’ familia. Mas machapag relasionta yan usun tanu’ natibu.

I peskan tasi para i umusune. Kontodu este na patte gi kutturata adumididi’ sige maliñgu. Hasan tali’e’ manhoben manpanag gi halom rubentason pot ayudu gi che’chu’ familia ‘sino fiesta. Kulan hinanau petmanente estake maliñgu gi minachom atdau gi kanton lañget.

Guaha siha manfitme na tradision adumididi’ (kulan unai ‘an mattiempu) sige maliñgu gi fina’ resakin tasi. Parehu yan mappla’ talin galaide’ ginen i añkla. U faliñgu dispues gi hiyuñg rubentason.

Magahet na makat masustene haf’ hagas gumu’ot hit na pogse’ fitme gi linala’ natibu? Kau este na fina’ diskuidu mau’udai gi mampos hit mankonsentidot gi madestrosian tradisionta?

Adumididi’ lokue’ sige ha’ maliñgu usun liñguahen natibu. Megai mampos tane’ ni umaminanasa tradisionta na tiempu. Tatnai sisida para halom kuatton eskuela ‘nai para tafananague famaguonta haf’ taimanu manñgiñge’ yan haf’ signifikasioña.

Buente layu’ bihu sentimentoghu na biahe lau atan sa’ presisu na hita mismu tana’ ma’ug haf’ tradision natibu sin tafan masañgane propiu pinetsige pot petmanente na patte gi linala’ta. Tafan daña’ munafitme tradisionta!