Bailan yan sunidon tanu`

Antes gi Lali Fo`, sessu man-egga` hit praktes bailan tautau-ta deste mas yan palitu. Este siha na baila mapresesenta gi fina` fiesta yan espesiat na okasion. Animu i maestro yan maestra ma-esgaihon i famaguon.

I yeñgyuñg mas hulu`, papa` yan oriya debi todu u parehu yan finu na doblada. I pañgpañg palitu gi entalu` bailadot debi lokue` un` klassen sakudida. Gi todu atmos banda guaha unu mumamanda i kinalamten. Duru lokue` i kanta ni inakompapaña gitala yan ukulele.

Guine gi alacha, huli`e` na guaha lokue` bailan Japones mafanana`an “Awaodori” `nai mañasaunau famaguonta. Tihu tuñgu` haf` ha sifnififika lau bibu!

Dispues hu li`e` gi TV otru baila ni tatnai huli`e` antes. Linipes i prohimu, ha estira kanaiña hulu` kulan ha kombibida bendision ginen hilu`. Hu huñgog na lumiliku` gi halom iya Pasifiku dispues `nai ha establese ayu na baila.

Ti hu fofohyan i prohimu lau na ti sinasade` i lahen antigu antes? Gai tiempu gererun antigu umensinahyau ausiliu? Na ti espiritun familia gaige gi hechuran kalabera ni mapega gi halom apusientu kulan yu`us antigu? Ti konfotmeyu` ni lini`e`-hu sa` mas gi mafabrika ke magahet na gai tinatte estorian tautau-ta.

—

Baila ni inakompapaña esalau (chant) sen ti huli`e` este kumu patte gi kutturan Chamorro. Oppan kumu patte gi kutturan Karolinas. Kau otru este finabrika pot konbeñiente? I puntu: Yangin taya` `nai siña un` katsu gi bandan estorian antigu na natibu, pues maulegña kasse unna oppan deste tutuhon na finabrika-mu.

—

Este lokue` i mañgge` kantan Chamorro debi u guaha dididi` inadahe ya umasuhaye kobiñienten mafanana`an “adaptation”. Yangin kantan Glenn Campbell ileghu na dinancheña yangin si Campbell hu ekuñgog ke matranslada ni megaiña lache. Fata`chong papa` ya un` tuge` gai signifikasion na kanta. Muñga hit mapunu` “hafa adai” deste tutuhon esta i uttimu.

—

Hafa na kanta tinige`mu ni oppan sumaga giya hagu? Kumeke ileghu maseha ñgai`an ni madandan ilegña i man-e`ekuñgog na si binganu pat bingana ayu. Pot ihemplu: Ti Gi Un` Palasyon I Riku tinige` defuntu Tun Josen Pangelinan; kantan ha`anen gupot siha (Christmas) Mr. and Mrs. William S. Reyes; Papa` I Kandet, Felix R. Fitial; I Talu` Gi Halom Tasi, Gregorio Sablan (Kilili`); Hafa Adai, Johnny Sablan; yan Hagu, Flora Basa Quan.

—

Miyon na kanta puru pot si neni. Ya esta na`chaleg sa` hafaisen mamaisague` un` kuestion ni guiya ha` siña umoppe. Hombre dispachan maisa hau `sino sugu` gi mas hihot na troñkun siboyas. Piot ya guiya man-isague lau si neni ha sogne. Los uttimus guiya kumantayen maisague` pot konfitmasion malabidaña. Haf` mohon na ti kantan abiu ginagau dispensasion? Dios mihu!

—

Finana`guen finu` Chamorro: `Nai mama` naufragu hau gi haf` liñguahe yan kuttura-mu pues taigue usun hila` nana-mu giya hagu. Sali siempre de umesuette hau gi sanhiyuñg haf` hiniñgog-mu. Enfin, taya` binabaña umeyag deste tutuhon haf` liñguahi-mu.

Lamayot patte siempe fuminu` American-Chamorro hau kulan mohon mafañagu hau betmehu yan buleñgchog. Gaige i propiu ineppe gi halom guma`.

Bula tropison yan estotbu na tiempu ginen ineyag usun diariu na finu` Chamorro. Obligasion saina i para una` seguru na ha tuñgu` i patgon liñguahiña. Ti mapot: Tutuhon ginen halom gima`-mu finenina. Tat presisu para un` kokone` i patgon para eskuelan liñguahe lau gaige hau ha` ni siña umenpatta ennau na leksion.

Pinasensia yan satton na kinimite presisu gi este na pinetsige.

—

Sige lahihu ñietun diñga` hafaisenyu` siha finu` Chamorro. Bira birada ha saulagyu` finu` Palau yan Pohnpei. Hu leksiona na muñga pumaya`ya` sa` siempre hilu` aire `nai lumailai sin pisu. Ayu na dispues sige ha guadog haf` kumeke ilegña palabra siha. Na`magof lau puru famaguon iPhone yan iPad na tropa.

—

Sumen namagof i lamasan sena `nai mañgabales todu. Matutuhon gi tinayuyot dispues sige mañena gi hilu` konbetsasion familia. Un` pisu `nai mas mafotma fitme na relasion yan inatuñgu` entalu` saina yan famaguon. Este na bintaha primera gi maseha haye na familia.

Hana`e i dos saina umekuñgog asunton famaguon niha. Siha umesgaihon haf` propiu na disposision mauleg yangin ha nesessita ayudu este na patte. Enfin gaige dos saina ni ma`a`atan kumu luserun familia yan pisun inañgoghu.

—

Antes de bai` sugu` gi tenda huna` seguru na guaha salape` gi pottanmonedahu. Sige pa`gu hu aligau nesessidat-hu. Kada ratu hu rikonose kau hulañgag umapase. Sumen presisu inadahe gi entalu` man-ritirau yan ayu rumesisibe ayudun social secutiry.

Mientras tantu, huli`e` un` prohima hahalan kinebrutu manadan uhañg halom gi karetiyaña. Sumeha-yu` pot tihu lañgag kontra i dididi` gi betsaghu. Suetteña sa` ginen papet food stamps ni ma-apase deste ginen lagu. Dimalas-hu sa` ginen papet pagamientoghu social security. Buenu!