Probleman Sanhalom

Ta fafana` te`ug na problema pot appenas moneda gi kahan iya Marianas. Estague` mina` makat ta apase obligasionta siha kontodu dibin CUC.

I umatisa este gai tinatte: Mahuchum fakterian magagu yan hinanau bisnis man-dañkulu siha na bisnis Japones. Ha bali huyung poku `mas o`menus $5-7 biyon pesus ginen pisun ekonomiata.

Guaha man-halom nuebu na bisnis siha lau tinahoñg para u katsu i manesessita na moneda para usun iya Marianas. Gi mismu tiempu sige ha` mas mumegai obligasion gobietnu.

Lastima i tafatta gi 1993 gi Congresson iya America na tita nesessita esta ayudun salape` para operasion gobietnu. Na`magof lau kulan dididi` taftaf ta hapbla sekosta.

Yangin tafaisen Washington ayudu u fan ayuda mohon? Guseña ilegna galaide` miyu espiha kau siña in` pegsai huyuñg ginen sagua` kara`. Fuetsau debi ta atan bisiun gastu na biahe.

Onse tatte i toru gi sagaña ya tatutuhon dinuebu i karera-ta. Makat i para u batsala sa` katgau i kareta lau este ha` `nai siña ta mueba hit mona.

Sensian Komunida
Sensian komunida gaige halige yan pisuña gi lamasan senan familia. Fuera de dinaña` tinayuyot, estague` na patte gi ha`anita `nai man-hita todu gi hilu sagradu na sentada. Mientras tantu, matutuhon konbetsasion asuntu siha kontodu haf` finapos kada unu guihe na ha`ane.

Este na fina` konbetsasion umestablese inatuñgu` yan tutuhon fitme na relasion entalu` i dos saina yan famaguon niha. Ti siña na para hahagu ha` namaisa. Hombre i Saina `nai hana` huyuñg si Eba, hana` huyuñg lokue` si Atdan para gachuñg i prohimu.

Magahet na guaha siha trastes modetnu finañagu ni mafanana`an “teknalaye” (technology) ni umafuetsas kada unu konsu bisnesña. Tat ti tumalag papapa`. Ma`tut i konbetsasion kontodu entalu` familia. Dañkulu na destrosiu este mina` presisu na i dos saina umarepara yan umana` na`lu tatte konbetsasion lamasan sena gi familia.

Ginen konbetsasion lamasan sena `nai mamutiplika mas konbetsasion yan homlu` na relasion yan membron familia yan komunida.

Fiet Na Gachoñg-hu
Teñga gi chagchag oga`an gi baranda, tumunog un` guali`eg kulot betde ginen i halige ya ha chiku` i tanu`. Dispues ha birague` tatte.

Gai señat gi katiña. Guaha kulan suenu na para u uchan pat ti mauleg na mensahe mamamaila`. `An kumate ya sige lumauya gi rehas baranda pues mauleg ha`anihu.

Hu tuñgu` na guaha rason na gaige ayu na guali`eg gi fihonhu. Kulan fiet na guatdiaghu ni numana`e`yu` mensahe mientras humahame.

Mattu gi makalamya. `An maliñgon ñaihon pues ume`eboka gi troñkun patma siha. `An kulan chatguahu, pues siempre hafana`yu` ya sige kumate. Debi bai` deskansan ñaihon. Lau fiet na gachoñg-hu, diariamente.

I apuyuak ti sessu hu estotba gi lugatña. Gigon guaha mattiempu gi sanhaya hu rikonose kau gagaige ha` gi sagaña. Gigon ha rikohe tararasña ya maliñgu pues aregla sa` fotte ayu na pagyu i mamamaila`. Hu eyag este ginen un` amku` `nai un` biahe umadiñgan ham pot pagyu.

•••

I katen paluma todu klase lokue` guaha. I tropa ni mattu haf` na feria, duru man-esalau mientras marikononose ramas, hagun yan flores gi troñku.

I man-amku` guaha `nai mahuñgog katen utag. Señat na guaha mapotge` gi familia `sino para u guaha dimalas.

I katen gayu `an chatagmag gi chagu` ai na nina` mahalañg. Lau guiya i suenu na ti apmam esta mage mañana.

Mientras tantus, trabiha ti huhuhuñgog katen paluma ñgai`an `nai para bai` mikopble. Ni unu malagu` umuriya gi gima` mame. Dios mihu!

•••

Este i dandan mauleg para maseha haye na patgon. Ayudu piot gi ma-adelantan abilidat kabesa. Lau un` biradan ginen Puntan Muchot, sige lahihu diñga` kumanta animu gi finu` Eñglis. Hu pula` haf` hasasañgan: “Muñga lalalu`, asagua-yu`”. Pot dandan na tihu kopbla lau siempre bai` birayu` ya baina` tulaika `sino mana`linipes i lahihu.

Planon Militat
Planon usun iya Tinian yan Pagan para eksisiun militat yumama attension tautau-ta siha guine gi alacha. I sentimientu kinentra yan fabot ginen todu atmos banda.

Trabiha i presentasion pot inestudian hafa siña man-inafekta yangin enfin maplanta ayu na planu deste tinanom, tasi, tanu` yan komunida.

Chagu` i para uma-implementa haf` planon niha. Ha nesessita appruebasion dos patte ginen i Congresson iya America: Ha embrasa este planu yan moneda.

Siempre u fattu gi eskaleran ginagau petmissu gi usun dos lugat para eksisiun militat. Tinaka` tiempu estake u fattu este na tiempu.

•••

Estaba un` amiguhu gi kantit iya Magpi lumululai. I otru gaige botiña gi taduñg kasse ha fagcha`e saluñgai atulai `sino guihan taduñg. Ni unu hu estotba pot chagu` `nai man-gaige. Lau ti u mahñau bai` tagam gi puettu gi lemlem tautau pot patteghu guihan.