Pisun Inaguaiya

Parehu mimilalag lagu` mame yan un` primahu gi alacha nai sige in` sasañgan finapos mañainan mame antes. I dinaña grasiosu na estoria siha, man-mañge` chaleg yan man-bonitun kantan Chamorro, Karolinas yan Chapanis muna` bonito i inetnon familia.

Ayu na dinaña` `nai in` seseda` manafitmen pogse` familia yan haye siha man-hihot na parientes pat otru sinisede siha gi señgsoñg. Ni estasion radio taya` guihe na tiempu soluke KUAM giya Guam. Pues kulan telefon alaihai `nai mafattu siha infotmasion sinisede.

Si bihun mame (Elias P. Sablan) i likidu luseru ni umesgaihon ham, kandet gi puntan kantit para i galaide` mame gi halom chubasku, achon gi chagu` sabana, menhalom yan kabilosu na kabisiyun galaide` familia.

Guiya tumanom fitme yan ma`ug na inaguaiya, respetu, linala` espirituat yan sensian yine`ase` gi halom famaguoña (mañainan mame). Ti hulili`e` este na kualidat gi otru siha na man-ma`gas esta pa`gu!

Mapresu antes de gera pot masuspecha ni Japones na man-nana`e infotmasion para i Amerikanu pot ha tuñgu` dididi` fuminu` Eñglis. Para todu i sakrifisioña ni ti mahassu maseha un` fina` premium agradesimientu.

Magahet na parehu ham man-na`e` tanu` para gima Yuus Oleai yan St. Jude. Honge-yu` na ti in` praktes este na gineftau. Mampos appattau i sakan `nai in` disidi man-ayuda (1966/1993).

Dispues, kada selebrasion pasgua resureksion (Easter) yan mafañagun i Ñiñu (Christmas) man-daña ham gi gima bihun mame giya Oleai. Hafa signifikasion este na inetnon familia? Dinaña! Estague` muna` fitme yan ma`ug i pegsi` familia dehemunos kau pagyu, linau, uchan, somnag pat katma.

Dinaña`, satton na inaguaiya, inagofli`e`, espirituat yan yine`ase` pisun finana`guen mañainan mame.

Konsensian Tradision
I man-guelota umesgaihon ineyag linala` espirituat (katolisismu) `nai ma-establese justisiau siha na areglu. Hana` fitme i inetnon yan inafamauleg natibu. Mas adelantau i kinalamten deste siñku siglu tatte.

Este na bittu muna` fitme yan umaregla ha`anen todus. Ihemplo: Gi antigu na komunidat natibu tai tanu` i Manachañg. Areglun espirituat yan justisia sumede man-gai tanu kumu tautau lokue`. Mas mana` fanfitme i areglu siha parehu para todus.
•  •  •
Lastima i ineyagta kumu mañgatoliku. I finana`gue ginen i Saina mafattu ginen i Santa Biblia. Ta tulaika este pa`gu yan ineyag destrosiu ni mau`udai gi galaide` casino.

In` hassu `nai ha saulag yan dulalag si Jesukristo i tropan gamblers yan tailaye na tropan kometsiante ginen i sinagogu—Gima` Yu`osña?

Rason na ha estotbayu` este sa` hu huhuñgog ginen taduñg na patte gi espiritu-hu finañagun un` dañkulu na ira ni mamamaila` para iya Marianas. Fotte na destrosiu yan sapet para u sotta gi lastroña. Homhum i tanu` ha`ane yan pueñge. Hihot siempre ta lastra hila`ta gi edda`.

In` hassu Pagyun Poñgsoña ni fumalalague Saipan dispues gotpe ha birague` papa` Guam ya tat tiha pagñgas? I ira ni huli`e` mas didog para todu atmos banda. Estague` muna` chachatsaga siñienteghu na tiempu.

Muñga hit planun militat pot suspichosu na destrosiun kuttura. Lau ta fatkeluye asuntun casino gambling ni sumen metgot gi destrosiun tradision tanu`? Haf` tasasañgan?

Taduñg Na Botsa
Pa`gu mas `nai klaru na mayotmiente gi membron lehislatura man-kinamisosola `an na`en Best Sunshine. Ai, esta masasada` siha gi hilu` satgen baila ya sige man-achatge. Man-malefa haye amon niha. Maliñgu i interes i tautau gi konsensian niha.

`Nai humuyuñg-yu` yan Magoo para i gima ilegña na todu i mangaige gi halom bar puru galagun chalan ni man-mañoda` nuebu amun niha man-bachigu`. Man-malefa haye umelihe siha. “Dudayu` kau sumaunau i Chinu gi eleksion”.

Sahyan Estoriata
`An in` repara, siempre un` soda` na i kutturan natibu ma-impatta pot hinerasion ginen estorian mañaina-ta. Mafanana`an este “oral culture” `nai ginen estoria siha `nai tali`e` finapos natibu deste antigu na tiempu.

Machalapon finapos-ta ginen estoria yan kantan Chamorro. Poresu na sen hasan tali`e` tinige` finapos natibu fuera de haf` ha pluma i Españot yan otru siha nasion ni man-ginen este. Enfin, tatutuhon dumokumientu gi fino`ta estoriata gi modetnu na komunidat iya Marianas.

Solu interes-hu mañgge` gi hila` nanahu i para bai` establese un` fitme na sahyan ni siña umesgaihon finana`guen liñguahi-hu mismu. Ginen este `nai mauleg taketuñgu ginen tautau-ta siha hafa estoria-ta. Sumen mañge` ma-ekuñgog haf` estoria-ta gi liñguahita parehu ha` gi hechuran konbetsasion yan matuge`.

Piniloghu na manog ha` tetekun lau un` manadan tautau man-nina`ye nu este na pesti. Gi lamasan sena, todu manetekun i membron familia. Ni unu kumekuentos. Man-gaige todu matan niha gi iPhone. Mas ma`tut i konbetsasion familia. Mumaneñgheñg i sentada gi lamasa, mañgahulu` dispues sin palabra. Magpu` i pueñge `nai kontodu dos umasagua losus sin inayu`us.
•  •  •
Hafa`gue` si pale i amiguhu Magoo. Humalom gi konfisinariu `nai mattu amigan mame Lia` kumonfisat. Hana`e i prohima pinitensiaña para u tufuñg kuantu na pution guaha gi lañget.
Matman si Lia` haf` na ayu na pinitensia mana`iña. Matachoñg gi un` banda para u nañgan ñaihon si pale. `Nai ma`adde si Magoo taya` kampu sa` kinilag guihe na ora. Esta bibisbes huyuñg para u falag i kemon. Kanaha` mamatai chumaleg si Lia. Pitbetsu pindehu!