Sustansian Tradision

Lamegai besis `nai huna setbe este na palabra i “tradision”. Gi mismu tiempu malefayu` ti hu pula, pot para ta komprende, haf` kumeke ilegña `sino sustansiaña.

Layeye, tradision ayu siha na asuntu i ta praktitika diariamente gi halom familia. Ha inklusu finanague gi famaguon haf` mauleg yan ti kombeni. Primera besis ineyag espirituat gi hechuran dottrina, tinayuyot, ineyag bittun gumai responsablidat, respetu, umekuñgog, man-osge, inafamauleg yan kooperasion gi entalu` membron familia.

Este na chalan fumotma fifitme pisun tradision gi familia. Todu pot todu man-gaige mañaina ya siha umesgagaihon este mona piot gi maguaguat famaguon siha.

Lau gaige antigu na tradision natibu gi usun tanu` yan tasi gi finacho`chu` guelu antes. Ginen tinanom niha gi gualu` `nai mapega mantension familia diariu. Pineskan tasi sumaunau kumu mantension lokue`. Poresu na fitme este na pisu gi relasionta yan tanu` natibu. Estague` tutuhon pisun kuttura yan tradision Chamorro.

Gi todu animon mañaina-ta gaige orihinat na chalan finana`guen tradision gi Sainata as Jesukristu. Humuyuñg ginen un` sumen popble na familia. Finañagu gi as nanaña as Santa Maria. Si San Jose i pairastroña. Ha tutuhon mamana`gue deste idat dose años.

Sumaga i Sainata yan man-apostoles pot tres años na tiempo. Man-finana`gue ni tinagu` Yuus Tata yan mamana`gue gi sinagogu gi entalu` man-profeta yan professot relihion. Kontodu milagro ha chogue `nai hana` la`la` i man-matai yan magoñg i ti amtiyon siha na chetnot. Gi todu kinalamteña ha apapagat i disipuluña chatniha fan-malelefa ni man-namase` yan mamopble.

`An man-hanau hit man-hosme misa, mafattu ayu na patte i selebrasion eukaristia `nai hahatsa si pale` i ostia yan kales binu. Estague na patte sumen ma`gas gi misa. Mattu i Saina ha kombibida todus para ta daña`e yan ta konduse-gue` halom gi espiritu-ta kumu Yu`osta. Un` dañkulu na dinaña familia ni guiya umestablese deste antigu na tiempu.

Tatnai in` repara na i familia ni dumadaña gi tinayuyot, sentada, lisayu, nobena yan misa sumen magof ha`aniña parehu ha` gi halom katma, linau yan pagyu?

Ganansia ginen tanu` publiku
Yangin gai fuetsa i mafanana`an Open Government Act pues siña ta guadog pot para ta kesoda` haye siha na kabron man-mama` kepble ginen tanu` publiku.

Sige hu akanteha haf` ayu na kontrata i mahuchum ya taya` siña rumikonose. Man-gaige ha` ayu i chumogue este na kontrata. Man-mamomokat diariu lau tat ti fufugu sa` matuñgu ha` na siempre u paguan i malumot `an machuda` huyuñg publikamente. Ni kuantu na kadidiñg mapot mañega sa` oppan mampos pauña gi aire. Siempre u anog este na malumot gi ti apmam yan pa`gu.

Bai` chule` este na asuntu para i kotte. Yahu lumi`e` matan kada unu ni humasñgon mama` kepble ginen tanu` publiku.

I publiku ha sentuñgu` haf` direchoña. Maseha dignu mamatkilu siempre un` finanu`e sentimientoña piot gi che`chu` inipos na bidan interes petsonat.

Esta mauleg este i casino para futtunan famaguon iya Marianas? Puru che`chu` hasupag na dis-areglu man-huyuñg ginen este na lai.

Nanalau `an ileg niha “indihinau” dispues matalañgan maisa siha `nai masupotta casino. Ti umafagcha` i man-sañgan kontra aksion gi mismu sakudida. Kau magahet na appenas usun rason gi este siha na kritikat asuntun linahyan?

Hinanau Un` Mediku
Antes de u matai un` mediku pot ti amtiyun kanset gofesña, hali`e na i ora mampos kadada`. Tai tiempu chumogue haf` hinassoña mauleg u petsige. Idat 37 años `nai matai.

Sessu ha huganduye hagaña `nai mumalañgu. Ha konsidedera haf` mohon futtunaña i patgon? I ha`aniña kulan achaikag kunehu yan haggan. Gigon ha hassu i ora ensegidas maliñgu. `An kalamten para u kuhahulu`, humalom i haggan sa` kontodu fangu`otña puti dimasiau.

Gi uttimu suspiros ti man-gagau ayudu `sino tinayuyot. Ayu ha diseseha i para u hanau, satisfechu gi finaposña antes. Ileglegña na i taihinekog na deskansu esta ti u fan gagau mas `sino menos gi maseha asuntoña. I tinigeña anako`ña ke ha`aniña ni ha pluma para i hagaña. Dumeskansa kontentu.

Todu klasen hinanau guaha. Mafattu gi hinasoghu kau hali`e yan siente i tai hinekog na deskansu yan trankilida na kontentu humanau? Kau listu guihe na momentu gumu`ot kanai Satbadotña `nai mattu para u inesgaihon? Dinanche fino`ña na i deskansoña ti u fan gaugau mas o`menos nesessidat. Magpu` todu! Kontentu ha huchum mataña ya dumeskansa.

•••

Fumifila i amiguhu gi menan lamasan San Pedro gi trañkan i lañget. Hu faisen haf` inañgaiña. Ilegña na tinagu`gue` as San Pedro para u nana`lu i kahitan maches ni ha sake antes. Gi ge`tatte estaba otru amiguhu ha babatsala `nos kuantos guaka, chiba, manog yan babue ni ha sake gi agrikuttura. Piniloghu na para u guaha flumitada. Dios mihu!