Eku ginen puntan lañget

Un` lemlem tautau gi kanton tasi, hu huñgog gi chagu` na puntan lañget ekun katen pajaru ni sige halom gi tanu`. Kulan triste yan na`mahalañg ayu na eku gi lañget.

Sumugu` un` amiguhu ya sige ham kumonbetsasion pot kinalamten i tanu`. Hu bira i kuestion tatte giya guiya pot para bai ekuñgog haf` hinassoña.

Ilegña na ha taitai tinige`hu pot kondision fondun iya Marianas ni sige pumaya`ya` gi halom potput lañgat dibi. Hu tanchu`e ni pution gi lañget ni sige man-chalamlam gi minachum atdau. Hu apunta na mampos asgon gi chagu` ayu siha na pution taimanu kondision monedan Marianas.

Ha sañgan lokue` chinatsagaña gi haf` mamamaila` na kuattru años. “Sin nuebu yan dañkulu na fondu man-mañogñog hit todu”. Dinanche fino`ña rason sa` mampos bula dibi ke haf` humahalom gi kahan iya Marianas. Mas ke biyon pesus na dibi. Manu i otru siha na obligasion ni para u fan masuda`e apas?

“Mampos homhum na karera para i famaguon-ta. Memegaiña ti u bira siha mage dispues de man-ma-estudia”. Hu pañot fino`ña sa` sumen makat machanda i metton na lini`eña haf` mamamaila`.

Parehu lini`e mame gi asuntun natibu siha ni todu fuma` katsun politika sin sinyiyu na intension. Yangin ti ta prekura umareglan maisa halom gima`ta pues libianu dinisplantan famaguon-ta ti apmam yan pa`gu.

Mampos man-diskuidau hit ni guaguan tiempu. Tinane` hit man-politikan laime `nai kontodu futtuna-ta tafa` basula. Maseha parehu chathinasson mame umakonfotma ham na taya` parehuña i gatbon kanton tasin iya Punta Muchot.

Sustansian ginen hita mismu
Ni u professotgue` kumu ti natibu pues ni ñgai`an `nai u komprende kabales sustansian linala` tautau isla guine gi O`Perlas iya Pasifiku. Gaige gi haga` ennau na espiritun kinemprende.

Siña hihot ha danche haf` para umasusede guine ginen estudiu ni uma`achule` kinalamten. Lau ni taimanu ti u komprende haf` na pogse` gumugu`ot yan sumusteteni natibu gi halom didog na mattirun pinepble. Haf` na man-magof yan mañgontentu hit gi hilu` tinaya?
•  •  •
Hu dadandan sunidun todu atmos bandan Pasifiku entalu` Micronesia yan tano`ta. Puru lugat este siha ni ginen hu fatoigue antes gi hilu` offisiu. Megai man-nomtum yan menhalom asoda`hu guine na tiempu. Ginen satton yan fotmat na mañan offisiat `sino representanten tanu` niha `nai umeyag-yu lokue` mañan inadahe gi offisioghu.

Gi kasse `las onse, pañgpañg un` fotten trosun uchan. I bailan uchan gi hilu` sin señat para deskansu. Hu taitai naya `nos kuantos pahinan biblia (Exodus) kulan teñguañg-hu antes de deskansog-hu. Sige pa`gu umafulu`yu` yan haf` tinaitai-hu. `An chatseguru, hu birayu` tatte gi sigiente pueñge hu ta`lun rumepasa. Debi u klaru gi hinasoghu haf` mantuge`. Taya` kampu bumuente gi tinagu` Yuus Tata yan lahiña. Estague` mas fitme na pisun ineyag gi enteru elmundu.

Guaha `nai hu birayu` guatu gi otru lepblu layeye pot para bai` tulaika i sabot materiat gi hinasoghu. Pot ihemplo, sige hu guadog haf` taimanu iya Singapore na sumen homlu` ekonomiaña. Era, hu espipiha manu` `nai gaige hale` primet siha na areglu. Yahu haf` sineda`hu gi usun manma-eduka siha na tautauña ni chumoneg man-presisu siha na tinilaika. Lau i sisteman gobietnamientu ti parehu yan hita guine mina` makat ta chogue haf` ta petsige deste sisienta siha na sakan.

Makat na asuntu mana` daña` hinasson mismu tautauña kontra Chinu yan Indian ni mas man-adelantau edukasion niha ke natibu. Dibuenamente, umafagcha` dispues gi karera mona. Mi mutmorason na finapos lau man-adanche gi pinetsigen inestablesen fitme na nasion. Guaha mohon gi entre hita humahassu umestablese nasion iya Marianas? Na ti hagas independente natibu?
•  •  •
Bula na tiempu tane` yan modun tinilaika ni chumapag hit ginen hagas lina`la` tradision natibu. I sistema siha lokue kulan ta aksepta kumu pisu. Gi hilu` este kontodu hita yan hita man-a`afulu` gi hilu diniskontentu. Na ti hagas metgot amestan natibu piot gi entalu` bisinu? I chinatsagan este siha na tinilaika mauleg ta repara yan dumiskute gi halom hita mismu.
•  •  •
Sige amiguhu manunu mantikan tiyan babue. Dispues ha supog gi paire na finadeni` ya ha saulag. Todu soblan mantika ha famauleg gi kahon ais. Hu tuñgu` na sessu yinagai dinalag damagas adeñgña. Sinparat, duru ha daflogue mantikan babue.

Huna` hassu ni puntan damagasña. Ilegña, “Braddah, mamatai ha` i tautau pot guinaiyaña”. Gi sigiente dia keke`yau, chatta mamomokat sa` yinagai ta`lu dinalag. Huna` ma`lag i guafe gi feggun. Ha faisenyu` haf` para bai` chogue. Ileghu na para bai` fanunu ta`lu mantikan tiyan babue. Ai na manadan chatfinu`. Esta tutuhu` lago`ña ni chaleg putin damagasña. Pindehu!