Sueno! Abisun Publiku

Sueno un` finu` tanu` ma-u`usa kumu abisu para todu gi maseha haf` mamamaila`. Pot ihemplo, giya Pagan un` tautau umesalau ginen i chagu` hogsu` “sueno”, abisu na guaha batku sige halom gi tanu`. Ha prepara siha i tautau ya sige malofan i kestat sine`su` para u mabende.

Ha trumpeta i federat “sueno” pot fuetsan immigrasion pot bula keha pot abusu guine gi hutnaleros ginen hiyuñg gi fakterian magagu. Chatta` ta attende estake humalom ya ha amot Marianas fuetsan disposision hutnaleru siha. Maliñgu mas direchon para ta gobietnan maisa hit lau ha yute` un` hogsu` basula i industrian magagu guine—Puerto Rico Dump—ni numesessita `nos kuantos miyon pesus para umana` gasgas. Diskuidu!

I uttimu “sueno” pot casino. Kasse i ti talili`e i didog na pinepble gi tautau-ta `an ha hatme halom salan gima`ta i industrian casino. `Nos kuantos gi man-ma`gas man-mama` kepble. Hita i `an soblan poñgpuñg gi papa` lamasa. Pot fabot gef atan sa` dispues de malofan ekun uttimu suenu megai para u destrosia gi linala` familia guine.

•••

Gi todu finapos-ta gigon ta gacha` i puntan i chita piot gi bandan offisiu i sigiente birada para papa`. Parehu yan man-sañgan na todu un` dagau hulu` siempre u poduñg papa`.

Namanman na i man-tufai yan fatsu na ginen offisiat publiku ti mali`e na makat machule` tatte hagas tronun niha. Lau guaha umatrebi siha guine na mapos na eleksion.

Mafa` fagas pachot niha asuntun natibu—indihinau—sino natibu. Mampos suspichosu na posision sa` mafa` hugete asuntunto-ta. Dispues, dudayu` kau fitme kinemprenden niha dichu asunto-ta fuera de mana supin tasi pot para u fan e`suette.

Yangin magahet in` kemprende asuntun natibu mauleg para hita na u guaha guine casino? Na ti este primera koyentura gi madestrosian linala` tautau tanu`? Umafagcha` este yan dinisehata gi todu animu para tana` fan ma-eduka famaguon-ta?

Siña ha` guaha adelantu gi bandan industrian turista ginen i casino. Lau sehan ñaihon un` ratu ya un` atan hafa futtunan famaguon-ta? Na ti magahet na hita offisiun `an poduñg pidason pan mientras tautau hiyoñg i man-guaguan siha na cho`chu`?

Ti hu komprende haf ` na mampos hit man-hasupak gi este na asuntu. Ni tanu`, fasilidat kandet, kandet, chalan yan sisteman aplacha` (sewer) taya` para este na planu. Haf` na tafa` bisiu pumega i toru gi menan kareta?

•••

Teñga mañguentosa hit pot natibu. Lau hasan ta huñgog “inadiñgan” pot dichu asuntun tautau-ta siha gi señgsoñg. Guaha difirensia gi signifikasion dos palabra: kuentos yan adiñgan.

I mefe`na puru asuntun muron. I sigiente fotmat na modun hunta ayu mina` kasee maleletke ni ga`ga` politika siha. Kulan mohon hit ni publiku guaka ni ma-atgogoya ya kada ratu man-mabatsala hit katkuet lugat kinibrutu.

Enfin, `an seriosu i asuntu haf` na tatnai mana` guaha fotmat na inetnon yan asuntu siha ni para u fan madiskute? Haf` na ma-u`usa asuntun natibu kumu pugen politika? Man-malefa kasse na esta ta dimemoria huegon niha. Muñga marepite sa` sage` i man-na`tatah siha na finu` fabulas de chispas!

Lamegai asunto-ta ni debi hita mismu mauleg fotmat ta prekura.

•••

Ilegña un` amiguhu na `nai hobengue` todu ha attetende. Gi idat kuarenta años ha diskontinua. `Nai sisienta años-gue` `nai ha repara na ni unu-gue` humahassu. Ha dagau i tuayan man-attende. “Guahu finenina ya yangin guaha soblante i otru”.

•••

Sige teñga ta ayuda i familia mahalan chenchulu antes. `Nai buyada esta kineni` guihan mapatten ñaihon. Kustumbren tanu` ni maliñgu gi santatte palu pot nuebu na areglu siha yan layeye pot man-hanau i hagas umesgaihon este na modun peska.

I signifikasioña layeye pot dinaña natibu gi inespihan mantension familia. Ginen dinaña un` chenchule manafitme mas inatuñgu` yan sensian ina`ayuda yan inafamauleg. Lastima sa` gaige este pa`gu gi fina` dinaña tininu yan maneskada.

•••

Ilegña finu` atpahon: Muñga matufuñg haf` un` kusecha na ha`ane ke haf` un` tanom. Haf` sustansiaña este na finu` man-sabiu? Na ti pot preparasion famaguon-ta? Haf` tinanom-mu gi hatdin familia? Man-lachok yan brabu? Un` rerega diariu pat manu` ha` `nai magof hau? Dispues de un` kusecha, un` tanom tatte simiya?

•••

Gi hiyuñg rubentason estaba un` peskadot para u etogcha`. Ha komprende haf` debi u chogue yan lokue` ha tuñgu` na gai piniligru. Ha atotga tumunog para u kone` i dañkulu na lagua, tataga`, gualafe, tarakitu yan lililug. Malefan ñaihon ni halu`u pot ha tuñgu` haf` dichu finatoña.

•••

Duru gi alacha man-mapoñga hit na baba i niyog para hinemlo`ta. Ya taimanu na man-la`la` i tautau isla deste antes yan man-brabu na tautague? Lau puru este dinagen kompanian amot giya America pot para ta fahan mas attikulu `nai mapega kepblen niha. Dimoñu na dinage!