Pinadesen Malañgu

Pinadesen atbansau na chetnot kanset sumen makat parehu ha` para i malañgu yan familia. Gi uttimu besis `nai kumama i malañgu dumaña i familia para u fan assiste. Megai giya hita chumage este na ekspiriensia gi hospitat `sino gi gima` `nai esta sala` i chetnot ya tiempu ha` tetehnan.

Un amigahu matan brabu yan magof `nai sige ha sañgan na numa`lu tatte hinemloña. Kuattru mesis dispues madispone. I brinabuña kulan mohon uttimu despedida lau magof i prohima. Buente ni guiya tiha tuñgu` haf` mamamaila`.

Hu konsidedera kau tinataka` silensiu na mensahe na ha bisita yan umadiñgane i man-hihot siha na mañeluña yan parientes? Guaha mohon pininite pot ha sesiente ha hihot esta para humanauña? Pat mas ha` gi hinalula sa` ha tuñgu` na mauleg na lugat para u hanague?

Makat na fina`pos para todu. Magahet sumen na ma`agem kustumbre-ta dinaña yan motmut na ayudu gi esta ti muna` siña. Bendision i Saina!

Man-ñahlalañg

Ilegña si Senadot Sixto Igisomar na i kondision fondun iya Marianas gaige na mamatmos gi papa` tasi. Malagu` man-ayuda umesgaihon este na chinatsaga kosake siña man-nañgu hit gi supin tasi.

Dinancheña `an mamahan si señor lamegai na antios ya umadaña`e ni pumalu man li`uf sa` taduñg na fondun tasi `nai gaige kaskon `sino kara` kahan iya Marianas. `An in` seda`, pot fabot hatsa hulu`.

***

Lamegai tautau-ta man-inadite chetnot daibites, kanset yan korason. Satbasion? Mauleg ta estudiaye haf` na i Chinu mas anaku` ha`aniña ke haf` na rasan tautau. Gaige lamayot patte gi sentadan yan gimen biha entalu` golai yan cha.

***

Pot masoda` ni bisita-ta aplacha yan mutuñg komun publiku na esta nina` fan `u`uha`, ilegña si Representante Leepan na guiya para una gasgas diariu. Ke lau haye propiu ahensia gai responsablidat este? Ilegña si Señor Leepan na para una`ye Pine Sol para u disiente pau i kemon siha.

***`

Makansela todu kareran ruplanu guine gi mapos na semana. Layu` i kabesanten lehislatura sa` ti siña machogue che`chu` niha gi hilu` tanu`. Mapayune hilu` aire ni hita ni publiku umapapase fletin niha. Dimoñu` fañaga ya in` chegue che`chu` linahyan!

***

Tumalaya-yu` yan amigo Magoo. `Nai dumeskansan ñaihon ham hu soda` na mas i talaya ha tuñgo`ña si Magoo ke guiya gi talaya. Un` buyada na man-yomug guihan seru kineni` mame. Hombre mapla` i lagua` talaya ya ti in` ripara ni ñahlalañgña. Pindehoti!

***

Hu faisen si bihahu haf` na un` primaña echuñg te`lañg guieñgña. “Ha apunta i paluma ni flecha ya tiha repara na ha pega i diñga` gi guieñgña.” Dios mihu!

***

Mana`e amiguhu Magoo katdon to`lañg guaka. Ilegña, “Pagu a`tautau este mage”. Ma-abirigua haf` kumeke ilegña. Era dispues de ha kanu` i katdu ya ha chogue che`chu` kasamientu patgon para u huyuñg. Asaina!

***

Guaha un` atuñgo`hu sessu `an kumuentos kulan mohon sabiun karisu. Mafaisen dispues kau i fino`ña hinassoña pat hiniñgogña. Sige pa`gu fumofu ha defenden maisague`. Dios na grasia!

***

Matto i mediku para u riseta un` malañgu-ta gi Straub Hospital giya Hawaii. Mientras tantos finaisen, “Does this hurt?” Tiha o`oppe.

Finaisen ni intetprete kau puti. Ilegña na huñgan. Mafaisen haf` na ti ha o`oppe i mediku. “Ke sa` ti ilegña pain”. Esu na chinacha` palabra!

***

Hu li`e tropan abeha ma-mueba chemchum niha kasse tres pe kuatdrau dinañkuloña. `Nai man-gupu kulan mohon sen ñahlalañg mabatatañga deste un` troñku esta i otru lugat.

Ti hu li`e manu `nai mapega chemchum niha. Dispues hu rikonose hagas lugat chomchum gi troñkun sosge, gasgagas. Ti listuyu` kumuestiona haf` linagnos i Saina.

***

Man-asoda` famaguon prefektu yan bastadu gi fina` gupot Noche Buena. Sige machalegua` haye lehitimu yan ti lehitimu. Ilegña i mas patgon na bastadu, “Tata-hu ayu i matatachoñg guihe guatu, yan miyu pat ti yan miyu”. Ha umentaye na todu uma-onra si tatan niha dehemunos kau haf` rayamu.

***

Ilegña si Magoo na man-resibegue` esta kattaña para i lañget. Era ha huñgog na taya` esta ginen Marianas para umasede guihe hulu`. Mafaisen haf` taimanu na ha resibe kattaña. Ilegña na ma-email-gue`. Sinaulag as Lia, “Pues man-dage hau sa` taya computer trabiha guihe hulu`, demoñu!” Dios mihu!

***

Ti gofha`an, potput nubladu i tanu`. Hu huhuñgog gi chagu` ñañgon na guinaifen mañglu sige ha dulalag homhum mapagahes gi ge`lagu. I pajaru sige lokue` mañganta. I tautau duru preparasion senan familia gi lemlem tautau. U machom i atdau gi ti apmam. Finagpu` otru dia giya paraisu.

***

Ilegña un` finu` atpahon: Muñga mapesa ha`animu gi haf` un` kusecha pa`gu ke i simiya ni un` tanom”. Kau un` tanom tatte para otru biahe? Preparasion famaguonta!