Sensian fiet na amigo

Gi un` inadiñgan pot “amigo”, ilegña un` tomtum na amku` na ayu amigo-mu i mattu binisita hau antes de umahuchum ata`ot-mu pot uttimu besis.

Mafattu gi hinassoña i tiempu deste pinatgon miyu `nai sessu umakilili` hamyu, i chaleg yan grasia siha, chinatsaga, mañge` yan ma`ug na amesta. Uttimu despedida `nai man-na`e agradesimientu “pot todus”.

He mente este pot umasoda`yu` yan un` atuñgo`hu gi simienteyu para u pega un` korona gi naftan mauleg na amiguña. Pot mas ke bente años, kada sakan tatnai fatta, ha pegaye amiguña korona gi naftan. Bula man-amiguña lau este uniku ha attende gi kada finatton ha`anen mañantos.

Ti hu faisen haf’ i motibu. Ayu ilegña i “mauleg na amiguhu”. Ti sumiha dumañkulu lau mafotma fitme na amesta `nai sumiha i dos umeskuela dispues.

Ayu na kinimite dañkulu sustansiaña: Ti malefa ni amiguña maseha esta ti achaiguaña gi hechuran korona. Entalu` hinasso pot korona, seguruyu` na sumaunau tinayuyot para i amiguña. Esta ume`emisirikotdia para una` nahuñge balin un` korona.

Este mismu na eksisiu sinede bumirague` halom giya guiya mismu manayuyot pot satbasioña. Tat mas ke este i nina` fitme hineñggeña kumu mauleg na kilisyanu.

Hu li`e gi mapos na Sabalu gi simienteyu ha pepega i korona para u adotna i seputturan amiguña. Mauleg yan fiet na amigo! Haye gi halom man-amigumu siña humasso hau taiguine?

Inasi`i gi esta man-hanau
Gi ma`pos na Sabalu yan Dameñto, selebrasion ha`anen mañantos yan man-matai ta bisita i seputturan mañaina-ta, mañelu, yan parentela ni esta man-madispone.

Seguruyu` na ta baba pahinan lepblon niha mientras sige tinayuyot-ta `sino duranten `nai manotohge hit gi seputtura. Huñgan tali`e ta`lu finapos niha gi halom grasia kontodu disgrasia `sino chatbida ni ti mana` fagpu` antes de u fan madispone.

Lau gi selebrasion sakramienton ostia (eucharist) `nai gaige oran man-dispensa pot para u fan siña humuchom petmanente lepblon niha ya u fan hanau felis. Sumen namagof na siñiente i man-dispensa. Tinagu` Sainata as Jesukristu.

Este na selebrasion petmanente patte gi kutturan yan tradision natibu deste antes. Sumen metgot na pisu gi mana` fitmen pogse` dinaña` familia.

Estague` lokue` na tiempu `nai humalom selebrasion Noche Buena `sino ha`anen gupot siha. Na katma hinassomu ya un` pipet familiamu guatu gi sadog pas, inafamauleg yan inaya gi halom todus. Na fitme mas finana`guen espirituat piot gi man-hoben.

Sentimienton Patgon
Bastara ke satton na respetu tanana`e mañaina-ta, sumaga ha` lokue` ayu na siñiente i sentimienton patgon gi mañaina-ta.

Poresu na ni unabes `nai mattu gi hinasoghu na un` dia siempre lokue` u fan hanau para i taihinekog na deskanson niha.

Dispues mattu ayu na ha`ane `nai man-hanau. Gi biradan simienteyu (separau dos biahe) sige hinasoghu umafulu` yan sentimienton patgon gi sainaña.

Gi halom katotse na mañelu, guahu i mas amku` ya taya` preparasion katgon familia dispues de ma`pos i dos amku`.

`Nai sige man-atatiye halom kehan mañelu magahet na sumugu`yu` gi simienteyu man-gagau ayudu. Finatoghu tatte gi dispues de i che`chu` hu soda dos paluman mansu gi hilu` guma`. Humalom-yu` na i dos saina. Hu ayu`us pot kulan mabisitan ñaihon-yu` lau hu dispacha. Buente masiente na kulan`yu` pumininite. Hu katga dispues kilu`os-hu sin ditension.

Ayu mas umaminasa-yu` i finenina na pueñgen Noche Buena `nai pot primet biahe ti kabales i hagas lamasan nana. Hu pañot gi tinayuyot. Magahet na misin lago`hu lau esta man-hanau.

Na guaha lokue` kampu gi korason miyu tinayuyot para ayu siha na animas i ni unu humahassu na tiempu. Megai bendision-mu gi karera mona.

Areglon Mañaina-ta
Gi halom todu mattiru, ni unabes `nai sumeha i dos amku` gi maprebeniyen mantesion familia deste neñkanu`, magagu, fanliheñg esta i finana`guen espirituat.

In` hassu i dottrina, primet komuñon yan konfitmasion? Siha sumuhon hit para ta prekura ineyag espirituat. I uttimu `nai man-mapega hit gi sagata gi hechuran inakamu`.

Gi katkuet mattitu sen timagtos mapega papa` areglon pisun halom guma`. Maseha ti malalañgag siha pot fatigau dispues de che`chu` gualu, sige ha` mana`e animu rumikonose nesessidat familia.

Dispues de felis hinanau kada patgon, gaige ha` ta`lu na mananañgga finatton bisnietu yan bisnieta siha. Ai na nina` magof, pasensia yan grasiosiu na dinaña yan konbetsasion. Ti apasiyon todu animon niha.

`Nai ha diñgu ham si nanan mame, kada finatoghu gi gima` i dos amku` gaige si tatahu listu para una` sena-yu`. Tai minagtos ayu na assistimientu estake ha diñgu ham lokue`. Para i pinepblen niha esta na` tañges `an hu konsidera i animun niha yan konsuelu para hame todus. Hu li`e na magof yan felis hinanau niha. Este solu konsuelu-hu.

•••

Magahet na i patgon ni satton gi mañainaña ha sosoda` lokue` ginefsagaña gi kareraña. Ya sumen magahet na mauleg in` assiste siha gi inamku` niha sa` siempre hagu lokue` un` fattu guennau na estau. `An chatmañetbe hau, pues ennau para un` machogue ni mismu famaguon-mu. Muñga puminite hombre hagu un` hasñgon gi mismu mañaina-mu.

•••

Gi finaposhu lokue`, dañkulu yan satton na respetu hu pega gi relasion-hu yan prohimu-hu. Hu akseptague` gi hilu` sensian kilisyanu. Ni haf` ya bai` chogue, gi uttimu besis parehu na lugat `nai para bai`n asoda`.

Kumeke ileghu na ni bai` mau`udai first class ya guiya gi economy gi halom batkon aire, siempre bai`n afagcha` gi un` lugat: sagan katga para bai`n chili` maletan mame. Ti mapot este na kuentas: parehu klassita tautau.

•••

Gi un` taloa`ne hu dandan ayu na kanta i “Danny Boy”. Sunidun despedida entalu` un` tata yan lahiña ni humalom sumindalu. Ilelegña i amku` na un` dia ya un` bira hau siempre un` li`e gi fina` yanu ginen kañadan sabana un` plaset malahyu pot fañomnagan. Bai siente `angacha` sapatosmu yan tinayuyot-mu `an dumimu hau gi naftan-hu. Bai` gaige guine ha`ane yan pueñge estake mattu hau mage giya guahu.