Guaguan na Apas Kandet

Guaha umesplika gi programan radio (Marianas Agupa) haf` na sumen tatkilu` i apas kandet gi enteru iya Marianas. Ha danche esplikasion lau tiha prebeniye ineppe haf` taimanu para uma`alibia este na gastu yan didog na sa`pet kontra monedan familia siha.

I propiu na ineppe gaige gi ma-adelantan ekonomia `nai siña guaha appottunidat todus mañgalamten gi halom ridondun abundansia. Lau taya` machogue gi este na banda pot dies años na tiempu. Ayu na megai na empleau pot 20 años tatnai man-mahatsa sueddon niha mientras i gastu sige hulu`.

Dos patte gi halom gobietnamentu dinispopone pa`gu ni otden kotten federat: I programan man-ritirau yan i CUC. Yi yofu atmos banda pot diskuidu! Todu i dos programa mana` kara` ni man-sabiun I Deni`. Poresu na ma-amot i administrasion ni operasion dos programa: man-ritirau yan asuntun CUC pot didog na diskuidu!

Pinadesen Miserapble
Gi katkuet kinalamten-ta todu presiun nesessidat man-gugupu hulu` gi lañget kulan higante na kuetes ni masongge gi kantun tasi.

`Nai ta atan papa`, esta poduñg ginen betsata monedan familia ni kanifesña. Ta hala gotpe pot no mali`e na tai sinine. Ta pañot i man-taya`ta dibuenamente.

Tatfoi man-taya`ta, esta man-eyag hit man-la`la` gi dididi. Mampos i mattirun taya` hatsadan sueddu pot 20 años na tiempu dañkulu na sapet kontra familia siha.

Maseha haye un` atan, ti mahñau un` li`e na mamadedese. Siña tatulaika este na pinadese? Gaige i ineppen este na kuestion giya hagu mismu.

Debi ta atrebi hit bumatbaruye umesgaihon halom tinilaika. I appottunidat adelantu dañkuloña ke inanchun tasin Pasifiku. Maila` ta esgaihon galaide`ta fitme gi halom chubasku. Este ha` `nai siña ta soda` felis yan safu na puettu para i famaguon-ta.

Gi suenan tatalu` pueñge
Kasse pot tres biahe hu huñgog ekun bos tai guihe mohon pañgpañg napu ginen rubentason man-yaya`u ayudu. Ti siguruyu` haf` finaiseseña lau un` espiritu ayu na bos.

Sige dispues hu akanteha i namase` na finaiseña para bai` komprende hafa sessu malago`ña. Guaha `nai huli`e este na espiritu lau tihu dimemoria haye-gue`.

Dispues de hu aberigua todu patte gi guinefihu `nai hu establese na mapunu` ayu na espiritu ya mamalefan ñaihon pot la-anaku` esta na tiempu.

Kulan guaha dos malago`ña: 1). Orasion `sino tinayuyot. 2). Para umahuchum pahinan lebloña pot taya`-gue` esta humahassu. Ti matmanyu` tumayuyute-gue` pot 18 dias.

Hu bisita dispues ayu na kantun tasi para bai` husga haf` guaha. I rubentason hihot yan chepchup unai. Manadan man-dañkulun achu gi oriya. Ti safu na lugat mabisita `an hahagu ha` na maisa. Hu soda` dispues haye ayu na animas ya hu faisen lokue` nu i ayuduña.

Dalai `ste na guinaguan
Hu soda` i amiguhu Magoo gi kusinan lanchoña sige ha a`kompara presiun lateria siha. Kada ratu ha yeñgyoñg iluña ya hana` tinatiye, “Dalai `ste!”

Ha atanyu` ya ilegña, “Hagu mauleg sa` ritirau lau guahu ‘tirau’ `nai ni mona ni tatte”. Era tai che`chu` i prohimu ya manu ha` na fina` choda `sino kinisecha ha bende ayu monedan nesessidatña.

Dispues de felisitasion ha gu`ot hinassoghu kuantu mohon gi tautau-ta man-gaige gi tai guihe na estau. Makat na tiru kontra nesessidat familia. Guaha lokue` lamegai asudahu ni man-tai che`chu` `sino esta mas ke ochu años. Sumen makat este gi maseha haye na familia.

Mientras i sueddu parehu pot 20 años na tiempu i presiun nesessidat esta magalolope i kelat monedan familia. Ke lau man-mañgge i man-sabiun I Deni` gi este na mattiru kontra i publiku? Kau todu man-tinatme chetnot losus? Dalai `ste!

Direchon publiku
Sisteman demokrasia gaige giya monana na i gobietnamentu “ginen i tautau, pot i tautau yan para i tautau”. Gi todu pinetsige piot dañkulu na asuntun publiku, debi un` bira hau guatu gi tautau ya un` faisen hafa sentimentoña. Estague` establisau gi sisteman demokrasia.

Lau guaha lokue` humasñgun dumagau yan fuma` basula sentimentun publiku tat kumu lai kasino. Ti mana` presisu sentimentun publiku kontodu i dos biahe `nai hita mismu bumota NO para umana` halom kasino guine giya Saipan.

Mampos che`chu` hasupak na man-malefa na ni tanu` taya` trabiha maseñala para este na intension. Ni fondu para kandet, hanom, sisteman sewer yan chalan. Este na diskuidu hafañagu sakrifisiu kontra i tautau. Debi pa`gu ta sakrifisia hafa para hita na ayudu para umakubre nesessidat kasino. Kontrariu gi uttimu besis i kasino sa` siempre hana` fan chatsaga i publikun Saipan.

Mauleg ta faisen naufragun iya Luta kau mauleg este na sapet kontra tautau Saipan? Deste ñgai`an i destrosiu na mauleg kontra i tautau?

Sentron Dinaña Antes
I plasan Chalan Kanoa antes i sentron dinaña` tautau-ta tat okasion 24 de Oktubre yan 4 de Julio. I mefe`na na feria pot United Nations, i segundu pot independesian iya America.

I mas dañkulu na huegu i bolan kokiu` gi entalu` Saipan Team yan Braves `sino kontra buleron ginen Guam yan otru siha lugat.

Ayu na dinaña` `nai machalalapon haf` siha man-masusesede gi otru soñgsoñg deste umakamu` yan haye man-madispone. Gi ennau i oran `las siñku ha tutuhon siha i man-ginen i chagu tumulus siha tatte gi lugat niha.

Hihot i relasion parentela siha. Machuchuda` sensian ko-operasion gi kinalamten deste gipot nobena esta fandañgu `sino che`chu` linahyan. Todu mañgalamten deste cho`chu` esta fina` finatinas sentada para todu. Gi este na dinaña` `nai mas oppan man-amko`ta masañgan dibuenamente estoria-ta siha kontodu antigu na finapos mañainata.

Sumen namagof ma-ekuñgog grasian niha yan usun palabra ni hasan ta huñgog na tiempu. Motmut magahet inechan bendision gi kada manekun ham man-man-ñgiñge. Hasan esta este na modun dinaña na tiempu. Malimitte gi familia. I hihot na relasion tautau-ta sumen fitme guihe na tiempu.

Maliñgu esta kutturan chenchulu, peskan panag, lumulai yan katokcha`. Esta kontra fahan na tiempu ginen otru peskadot. Lau magahet memetgot ha` mabenefisian pinegsai. Achog para makadun poya, man-daña hit gi un` sentada.