Pot industrian casino

Malagnus un` papet pot finapos Best Sunshine, era i kompania ni mana`e uniku lisensia para u fan hatsa Saipan casino. Kompanian neñkanu` este offisioña i Best Sunshine.

`Nai ha annunsia na para u hatme bisnes casino, mamatinas $1.5 biyon pesus na ganansia gi mafanana`an stock market. Taya` trabiha priniponen lai casino guine gi ayu na tiempu.

Dispues guaha siha offisiat ginen este man-hañau para Hong Kong yan Macau para u fan man-espiha fiñkas (investment). Tinatiye `nai doku` lehislasion casino ti lehislatura ni mana okakahat dispues mafitma lai un` pueñge `nai man-hanau hit man-maigu`.

Mampos chadeg finalagun inapprueban este na lai na ni publiku ti mana`e chansa para u ekspressia dibuenamente haf` sentimentoña. Lau esta pot dos biahe ta punu` este na ginagau gi alacha. Ayu buente na manakahat i lai gi lehislatura.

Gi todu lugat casino, guaha kontribusion tax debi uma`apase. Saipan seru este na patte gi lai. Lau estague` na lugat gi halom casino `nai matutufuñg hinalom salape` diariu. Haf` na ti mana patte kontribusion $50 miyon pesus gi sakan `nai taya` tax?

Uttimoña, i tautau fuetsau u inapase gastun operasion casino pot kuarenta años na tiempu. Dinanche este na disision? Haf` na kontodu i mas mamopble para un` sapet pot diskuidu? Aplacha na hinanau finapos lai casino. Maila` tana fan matatñga hit umaregla ha`anita gi este na asuntu.

Asuntun Moneda

Ume`esalau un` naofragu ginen Luta na mauleg este na bisnis i casino pot “globus”. Gi mismu tiempu de hemunos de sumusu Luta gi kahan iya Marianas; lamayot patte inapasen kontribusion tax ginen Saipan. Faktu este na yahu lumi`e kinentra na lacheyu`. Globus pat lobus?

Taya` Luta nina` halolomña salape` ginen iyoña casino gi kahan iya Marianas. Pues manu ni gaige ennau i “globus” na bisinis casino fuera de mañopchup chafflake`?

Gi halom $135 million na monedan Marianas para pa`gu na sakan (fiscal year), kuantu nina` halomña i casinon iya Luta fuera ke sumen yomug na seru na esta nina` reput? Mañgge ayu na balaku ilelegmu paire gi bandan moneda yan accounting?

Mes Kutturan Natibu

Maseñala pa`gu na mes selebrasion kutturan natibu gi todu atmos banda. Mauleg ta ina gi hilu` pinasensia yan antau na inebalua haf` muna` likidu, dignu yan fitme i pegse` kuttura-ta deste antigu na tiempu.

Gi kinalamten-ta, hafa siha na patte gi kustumbreta ta pasa guatu gi famaguon-ta pot para u tuñgu` haf` kutturan niha? Mesklau este na patte gi entalu` sosiat, espirituat yan inadaptan kustumbren otru ni esta patte gi ta praktitika pa`gu.

Sosiatmiente, gaige relasion natibu gi usun tanu` yan tasi. Ta gu`ot tanu` familia para usun famaguon-ta gi mahatsan fanliheñg familian niha mismu. Entre ennau `sino mantension familia gi hechuran hatdin, pinegsai yan peskan tasi.

Gi bandan espirituat, ta fana`gue famaguonta mina`añau yan satton na respetu gi Saina. Anaku` na karera este na finana`gue gi famaguon-ta. Lau siempre u nina` fitme pisun heñiuña gi haf` mauleg na chechu` kilisyanu gi prohimuña. Anog este gi todu moduña deste te pa`gu echu tautau. Este na finana`gue i mas fitme na añklan todu gi karera mona.

Guaha siha estoriata, kantatta, baila yan fina` attikulu ni finatinas attistan natibu. Mas este siha na ineyag mina` likidu haye i man-natibu. Pasensiaye ya in` entrega famaguon miyu haf` mina` likidu yan dignu i kutturan todu atmos banda.

Maisa: Gi todu para ta petsige, debi u tutuhongue` giya hita finenina. Yangin ti kalamten hit pues todu patten tatautau-mu sumilensiu. Taya` otru masusede.

Pot ihemplo: Un` biyinariu duru fumofu sa` ti guiya gumana i biyon pot biyon na lottery. Sige ha disfruta i Saina pot megai ayuduña ya ti mattu giya guiya ayu na suette. Mattu dispues un` añghet ya sinañgane, “Famahan tekit sa` iyomu todu”.

Bos Natibu: Mas ke kuarenta años antes hu tutuhon mañgge` kumu gaseteru (journalist). Mana`ihu este na offisiu ginen hilu`. Hu embrasa yan aksepta primera pot yahu mañgge` yan huna` presisu na hu adelanta “bos” lahen natibu gi asunto-ta siha.

Komprendiyon na lamayot patte gi mapasan tradision gaige gi finu` mañaina-ta. Hasan `nai tali`e matuge` haf` finapos natibu. Kasse unuyu` gi halom `nos kuantos ni pumetsige mañgge` pot dañkulu lokue` intereshu lumi`e na un` dia tatuge` estoriata ginen hita mismu.

Kumeke ileghu na i “estoriata” taya` siña tumuge` gi mas antau na eskalera ke mismu natibu. Maila` ta sañgan estoriata ginen hita mismu!

Linguahe: Gi un` konfirensia, sige masoyu` todus na u fan finu` Chamorro. Lau gi mismu tiempu ayu na sineyu` masaulag finu` Eñglis. Ilegña i amiguhu Magoo: “`An ti guahu kaduku` pues siha!”

Pesu: Giya Hawaii i fuetsan pesu ennau i $.85 sientimos. Guine gi tano`ta `nai kuattro besis mas guaguan i gaston nesessidat, kuantu mohon fuetsaña i pesu? Guaha $.10 sientimos? Kuestiona i mañgandidadatu nu este na asuntu.

Casino: Dos casino para umahuchum giya Atlantic City, New Jersey gi uttimon este na mes. Iya Saipan para u baba unu ni dañkulu balin $3 biyon pesus. Taimanu mahatsa este na fasilidat `nai ni hanom, kandet yan sewer tai kepble para u fan mapega? Guaha i man-sabiun I Deni` `nai mahuñgog ayu na palabra i “planu?” Yangin para tafan hanau mona, haf` na duru hit tatte?

Dañkulu na estotbu i manera `nai ma-apprueba lai casino. Pinilota na siha i setbienten publiku lau mahasñgun ma`usa tihoñg kulan mohon siha man-ma`gasta. Man-malefa na hita pumega siha guihe na puestu. Mauleg ta ebalua ya tafanu`e haye profitariu i ma`gas pa`gu na Nobiembre.

Debi ta chule` tatte respetu ni mahasñgon mafa` basula kulan tai pattisipasion i publiku. Sisteman demokrasia este ya i publiku u ma`gas gi todu sustansiau na disposision! Yangin otru hineñgemu pues klaru na chatman-hula` hau deste tutuhon. Nahoñg na insuttu!