Tiempon Areglu!

Mampos disareglau, diskalentau yan tai apunteria `sino direksion i hinananau-ta na tiempu. Taya` metgot na kapitan gi hilu` galaide`ta na kontodu i pasaheru siha man-tai kinemprende para manu siha. Kulan i galaide`ta mama`ya` gi taduñg tasi pinapanag katkuet direksion ni man-dañkulun napu `sino lañgat.

Kada unu kunsu direksioña. Todu mañgekuentos, ni unu ume`ekuñgog. Kontodu i kapitan ha abandona checho`ña. Un` kontentu pumasaheru guine na galaide`? Kau un` fattu halom gi safu na puettu dispues de `nos kuantos dias? Yangin ni kapitan no siakassu, haf` mohon ennau na mensahe ha signififika?

Mauleg kada unu` u sugu` gi katsadan silensiu na patte gi hinassoña. Ekuñgog un` ratu maseha pot para un` huñgog i suabe na guinaifen mañglu`. Gigon siña un` huñgog i silensiu na patte gi hinassomu, libianu un` pula` otru siha asuntu gi menamu.

Fan man-atan sa` sige ha` adumididi` i federat ha amot i natibu ni direchoña siha. Hasan ta huñgog na guaha gi man-ma`gasta pumetsige kume tagam `nos kuantos aksion federal. Todu man-udu gi direchon natibu!

Estague` na finatsu mina` presisu na u guaha kabales na tinilaika pa`gu na Nobiembre!

Usun Saipan yan Pagan
Gaige gi papa` kontratan inakonfotman Covenant arglun usun tanu` Marianas ni militat gi hiyuñg haf` esta mafitma. Ha prebeniye chalan haf` debi u chogue militat pot nesessidatña tat kumu plasan batkon aire Saipan yan lugat trening giya Pagan.

Huñgan guaha direchota prumesenta sentimento-ta gi haf` planun niha. Homlu` na eksisiu i para ta atsia fumama haf` sessu sentiment-ta. Tat ti siña manegosiu gi hiyuñg i kontrata. Mas probichosu para todu atmos banda yangin dibuenamente kada unu prumesanta planuña.

Presisu na u guaha inadiñgan entalu` man-ma-elihe yan publiku pot todu kinalamten interes militat guine. Gai benefisiu lokue` `an sumaunau i militat gi haf` para ta petsige siha na adelantu. Lau debi u fattu gi hilu` antau na inadiñgan yan negosiu pot para u guaha kinemprende deste tutuhon.

Probleman batkon aire
Ta fagcha`e fatsu na setbisiun batkon aire entalu` Guam, Luta, Tinian yan Saipan. I otru chinatsaga i ma-ribahan setbisiu ginen Japon. Gi todu atmos banda ilelegña i manehante na ti mauleg ganansiaña este na bisnis `sino setbisiu guine.

Ha aminasa hit este na asuntu pot hagas mafofondu salape` federat setbisiun Continental Airlins guine. Esta ayu na ayudu mana`para. Kumeke ilegña na debi setbisiun ruplanu u tachu gi dos adeñgña. Dispues mauleg ta komprende na bisnis este na modun setbisiu! Taya` trabiha mafatitinas ruplanu ni gumugupu ginen hanom tasi. Gaselina muna` kalalamten!

`An paire ganansiaña pues siempre mas bibu i setbisiu. Gigon matompu` ya maliñgu dañkulu na ganansia naturat na siempre u atan yan pesa haf` para u chogue dispues. Mas inaminasa este na setbisiu ni abarambau na presiun gaselina ginen mediu patte giya Uropa (Middle East). Makat na kontrariu sa` bisnis este i industrian batkon aire.

Fañuchanan
Mattu i tiempon fañuchanan `nai naturatmiente sessu uchan. Pot fresku, hu offisiona malag i baranda manaitai gaseta gi internet, tinayuyot diariu, primet pusuelon kafe, sopplan chupa yan layeye pot para bai` huñgog i pañgpañg uchan gi atuf sin. Dinanche na sunidu katkuet ora.

Gigon nubladu ya chata`an, i paluman na`abag ti u fattu umesuette gi troñkun lemon i gima`. Ni nosa yan otru siha paluma man-deskansa. Kontodu i manog man-atog gi papa` satgen i lanchu `sino halom kasiyas niha.

I nuebu na linachog golai duru man-palapa gi halom uchan. Mientras tantos sige lokue` i lancheru siha ma-atan kau ti u linimos tinanom niha `an sinparat i ichan. Enfin mattu tiempun fañuchanan yan guiya lokue` este na biahe `nai lagse` finatton pagyu. Chegue haf` diariu che`chu` miyu lau rikononose ripot klima kada oga`an yan uttimon ha`ane.

•••

Guaha `nai in` sisede gi kanton tasi uchan gi lemlem tautau sin homhum mapagahes? Tihu tuñgu` haf` na`aña este gi finu` Chamorro na pineduñg uchan. Lau `nos kuantos biahe in` sisede yan peskadot siha (tropan lateria). Namatman i u`uchan sin mapagahes. I mapagahes kumikilili` halom gi tanu` i ichan. Solu guaha latatkilu` na eskaleran mapagahes ni yumute` i ichan. Ti komprendiyon ya tihu keke komprende disposision ginen hilu`.

•••

Ti hu komprende inadiñgan finana`guen finu` Chamorro. Diberas, todu finu` Eñglis i sineyu` liñguahae. Hombre, ti mapot tana` a`ya hafa ta fafama yan i sasyan ni ta u`usa. Anog na ti humalom i totniyon titanosta antes de ta lapbla sekosta. Dios mihu!