Luseru: Pution Sankatan

Umadiñgan-yu` yan un` afamau na kapitan galaide ni krumusa tasin Pasifiku gi todu atmos banda pot la-anaku` na tiempu. Hu faisen i amku` haf` primera na señat tradision hana` sesetbe gi kareraña gi taduñg na tasi parehu ha` ha`ane yan pueñge.

Ti matman ha apunta na i luseru `sino pution sankatan. Guaha otru siha grupon pution gi lañget. Kontodu pañgpañg mañglu` yan kilulog kurente hana` sesetbe para u ketuñgu` manugue` `nai gaige. Guaha difirensia gi kilulog kurente `nai hihot yan tanu` kontra mababa na tasi.

I puntun pot usun luseru ni hasan tana` setbe. Este buente mina` disgranau na estau `nai man-gaige hit pa`gu. Memegaiña tampen sinetnan ke fotmat na konsiderasion linala` tautau-ta. Mampos dañkulu este na diskuidu gi man-ma`gasta kumu kapitan galaide`ta.

Gi mismu tiempu mampos man-atotgante finalaguen otru asuntu siha ke dichu attikulu ni lumuluñu` linala` i publiku pa`gu. Yangin ni katan ti siña ma-danche, guaha mohon chansa na umatuñgu` hafa luchan? Haf` na sige ta atisa heñiun bachet yan tañga? Gaige ha` i luseru gi sagaña!

Nuebu na kuttura
Maseha haf` na asuntu ni sessu maripite uttimoña mama` nuebu na kuttura layeye pot konbiñiente. Estague` humistototba-yu` gi `nos kuantos siha asuntun linahyan.

Pot ihemplo: machoneg inestablesen casino. Dispues sige man-afañague na adahe sa` inestotba asuntun hanom yan kandet gi sankattan na patte giya Saipan.

Na ti debi este siha na kuestion u fan masatba finenina antes de umasaulag hasupag i asuntu? Kau in` tiñgu` na taya` lamasan hanom (water table) giya Magpi?

I tres planun hotel (kasse 2,900 na kuattu) dañkulu nesessidatña hanom, kandet, sewer yan chalan siha. Ni fondu para este na fasilidat siha taigue gi lamasa `nai sige machukan i asuntun casino.

Ginen este na fatsun disposision uttimoña ginen halom na diskuidu u diniteni i planu siha gi ge`fena. Yangin gi presente ti siña i CUC kalamten sa` tai fondu para nesessidat kandet pa`gu, u siña mohon prumebeniye mas nesessidat gi halom tres esta siñko años na tiempu? Dios tiampare na diskuidu i hita pa`gu man-ma-onse gi karetan guaka para ta hala i toru ni tapega gi sanhilu`!

Na ti magahet na i pisun mahatsan nuebu na guma` ha tutuhongue` ginen papa` hulu`? Nuebu na modun kuttura manhatsan guma` ginen i atuf papa`!

Hinalom man-hoben
Lamegai na man-hoben (man-edukau yan eksperiensiau) umatrabi siha man-malagu para offisinan lehislatura. Sumen namagof i signifikasion este na disision kada unu. Anog na siha lokue` man-o`sun esta ni mismu yinalaka` harina ni debi esta u tinilaika ni modetnu na trastes mamatinas pan mames.

Parehu yan tinilaikan tasi deste afnu` esta ma`te. Guaha siempre fina` risake lau dipotsihe ha` ennau gi kinekeyuñg kurenten gi fina` chubaskon politika. Ti tinilaika i faktu na man-edukau yan eksperiensiau i nuebu na tropan kandidatu.

“Chansa ha` in` nesessita para ta aregla tatte futuron famaguon-ta”, ilegña un` hoben na kandidatu giya guaha. Hu pesa fino`ña yan tinateña ya huñgan konfotmeyu` umayeg na biahen eleksion. Dididi` ha` na ayudu ha nesessita plumanta mona man-mauleg yan fitme siha na areglu.

Planun amiguhu Magoo
Bes enkuando, mattu lokue` amiguhu Magoo para u toma padiset-yu` na guaha lokue` planuña kumandidatu. Ti hu chaba` ensegidas pot malaguyu` humuñgog haf` ayu i trabiha ti fumatotoigue talañga-hu. Enfin sige ha planta papa` haf` para uchogue.

Para una` guaha programan manhoben, che`chu` DCCA. Para u fan manayane i man-malañgu, che`chu` manehantan CHC. Umana` baratu i kandet, obligasion administrasion. U fan ma-apase man-ritirau ni 25 pot sientu na sueddun niha ni ma-utut ni gobietnu, obligasion administrasion. Todu pot todu kulan mohon kada familia ha nesessita ayudun Red Cross.

Todu hinassoña para u fama che`chu` Santa Claus. Hombre si Santa Claus suette `an mattu mage Marianas pot ha tuñgu` na megaiña guine saki ke manu gi tanu`. Huna`e ihemplo pot nina`en guihan yan finana`guen peskan guihan. I primet chumochu i tautau un` dia. I segundu esta i finataiña sa` umeyag pumeska para mantensioña.

I asuntun linahyan na biahe mampos te`ug yan komplikau. Poresu na debi i para ta pega na eleksion ayu i man-ma-eduka pot lumenos kolehu. Ti siña esta ta atotga i kotbatan Sears Roebuck kumu tampen sinetnan sa` siempre u anog klaru na un` atrebi hau gi ti fafayimu! Dinancheña `an un` espiha haf` otru `nai lagse hau ya un` apprubecha umayuda famaguon-mu gi edukasion niha!

•••

Pot chaleg: Guaha `nai in` hiñgog konbetsasion dos tañga? I unu ume`esalau na guaha inasnen tukun mientras i otru pot mañge` flitadan guaka. Dispues, umako`lau i dos gi lapupueñge. Kau ma-apotsu` biahen niha? Esta pa`gu ti siña hu danche `sino komprende haf` taimanu na umadanche hinanau bisita gi lemlem tautau. Dios mihu!