2014: Felis Año Nuebu

Dispues de dumeskansa milag felisitasion gi sagaña, man-ensinahyau hit para ta e`eñgulu` haf` gaige gi ge`hiyuñg. Potput na halom tanu` gastu piot kontra fuetsan pottanmonedan familia. Kase sakan esperansa kontra esperansa.

Mampos oppan pinadesen publiku deste mapos na sakan. Makat ta tampe sa` ti malumot. Machalapon gi todu lugat guine. Dispues klaru gaige gi matan i tautau makat yan miserapble na sapet mafafana` diariu.

Kontodu tinayuyot na maseha pot masge` u guaha fina` alibiu para i publiku lau matmos sin ditension gi halom otru hagoi diskuidu `sino mañan no siankassu.

I ma-utut pagamienton man-ritirau lumalailai esta pa`gu. Finiñot mas fuetsan familia mamahan gigon un` pega mahatsan health insurance, amot, fektus, kandet yan otru siha hatsada.

Pot konfitmasion pinadese, atan mismu kinalamten familiamu na maisa. Muñga mana` chagu` sa` gaige kulan siyan sufa gi halom sala. Atan ya un` ebalua haf` na taiguenau pinadesisimu.

I estrakadan politika matutuhon desde finagpu` ma`pos na sakan. Guaha numae`yu` patte na guaha siha dibin tautau man-ma-apase ni man-kandidadatu para gobietnu kontodu apas kandet. Sañgane fan ennau na kandidatu ya u lattichan As Gonno`.

Todu pot todu, makat na biahe gumubietnu piot `nai mas menos rinikohen kontribusion tax yan mas ti siña i CUC ha apagaye obligasioña sa` megai na tautau umutut usun kandet niha gi gima`. Mampos makat kinalamten i tautau siha ginen subridan kandet, neñkanu` yan otru siha nesessidat familia ni umatotpe yan ma-utut pagamienton tres mit na familia.

Mampos megai inefrese ni ti man-makomple na esta machuchuda` kanastran niha i tautau dinage. Sumasaunau hau man-aminasa publiku guine na batkada?

Dispues de pagyon 1968 (Jean) matutuhon programan guma` padet guine. Layeye pot proteksion familia gi finatton dañkulu na pagyu.

Dididi` kulan hiniga` i tanu` mahatsan guma padet na ni unu humassu kau propiu i modun guma` ni kulan hotnun dañkulu dispues de `las dies gi ega`an.

Tantu de kemun sanhiyuñg, ta tulaika guatu gi kemun atileg `nai ta usa hanom kada biahe, diariu. Hombre este gai problema gi tiempon maipe `nai trabiha ti man-matulalaika i paip (pipe) ni man-mapega deste finagpu` gera. Piot gi tiempon pagyu. Gigon matai i kandet matai ha` lokue` i hanom. Sige pa`gu man-ensinahyau hit lugatta para ta fan tinane`.

Mas ke tres mit (3,000) na familia dumiñgu i tanu` piot `nai malie` na taya` appottunidat guine para siha. Ma-umenta tautau-ta guihe lagu. Man-daña `nos kuantos para u fan ma-ayuda i nuebu na finatto. I ayudu desde atkilon guma`, hospitat yan eskuela, tenda yan otru siha nesessidat.

Mampos mala`et paladat niha sa` makomprende na pot diskuidon man-ma`gas niha na presisu na umadiñgu i tanu`. Gi nuebu na lugat, bula appottunidat desde cho`chu` yan antau na sisteman edukasion yan sisteman hinemlu` para i famaguon niha. Hasan este na appottunidat guine gi tano`ta na tiempu.

Guaha ha` gi halom man-ma-elihe u fan pinika ni finono`hu. Lau obligasionhu i publiku ni megai besis in`fa` fagas pachot miyu sin propiu aksion adelantu.

Areglayun problema-ta siha sa` puru diskuidun man-ñaba` na offisiat publiku gi halom napun asuntun linahyan. Esta pa`gu ti matuñgu` hafa kattan lau ti pot direksion i kuestion. De dios mihu!

Siña ha` pinika hau kumu offisiat ni ma-elihe. Dimas de un` fama` tane`, hafa mohon ya un` pasalista papa` haf` sustansiau checho`mu para un` adelanta linala` i tautau siha gi señgsoñg?

Ti mapot i areglu siha ni debi u fan machogue para ta pega tatte ha`anen tautau-ta gi yanu na plaset. Lastima sa` mampos poble i ridondun linahyan man-antau na offisiat publiku.

I man-hanau lagu sessu mañaleg tuyan `an guaha offisiat-ta mattu lagu para u estira koduña gi halom botadot Marianas.

Ilegña i unu: “Fana`an malefa si gransumatlagu na pot taya` bidan niha na ta diñgu i tanu`. Ya trabiha man-hanau mage para umadobla hagas dinagen niha? Ti kaduduku i natibu gi asuntoña”.

Kumuentos i otru: “Dispensa i prohimu sa` ha magtos mampos man-hassu hombre tiha danche gi ma`pos ya mattu mage para u batnis dinagiña”.

Esta menhalom yan edukau i natibu poresu na debi unna` seguru na mafñot sinturon-mu na biahe. Taya` kampu esta para hagas mamtu` `sino mismu dinage ni mata`lun mañgañgas.

Taya` parehuña i bonitun minachom atdau gi puntan lañget piot `an gofha`an. Todu klasen kulot dumañae` un` bonitan isa ni tumatitiye homhum uchan mientras tinetegtog ni asut lañget. Gaige lokue` i pajaru man-mamaya` dispues sige halom gi tanu`.

Gi halom laguna, un` sumen katma na tasi ni kulan laña. Mas bonitu `an gaige i pilan gi sanlagu gi oran `las kuattru gi chatagmag. Mas ta`lu bonito `an man-ina i luseru kulan rilos peskadot ni man-lulai tulanoche.

Lamegai na islan Pasifiku hu fatoigue lau tat mas gatbo ke tano`ta ni gaige gi halom un` gatbu na hatdin entalu` rubentasion yan chepchop tasi. Estague` muna` sumen gatbu i O` Perlas iya Pasifiku.

I filan tanu` punta pot punta kulan kadenan perlas bineste ni apaka` mapagahes yan asut tasi yan lañget. Dispues de minachom atdau (`an klaru i pueñge) man-gaige miyon na pution gi chagu`. Pas i tanu` gi oran deskansun todus. U ta`lu tatte manana gi otdinariu na kinahulu` atdau.