Pineblen antau na man-ma`gas

Este i chatsagan pineble ti ayu ha` i mamatmos na pottanmonedan familia. Sumen poble lokue` i tanu` antau yan listu na mañan man-ma`gas `sino offisiat publiku.

`An haye duda, para haf` tana` chagu`. Atan kinalamten familia-mu mismu. Yangin inipus didog chinatsagamu, pues lamayot patte ennau na pinadese mau`udai gi taya` listu na offisiat publiku man-ayuda umataha i chinatsagan i tautau.

Lau duru mañgarera punta pot punta gi tanu` kulan mohon gaige offisinan niha gi hilu` aire. Dispues, gi hilu` taya` fondu gi kaha haf` na sige ha` mañgarera kulan mohon todu mauleg i kinalamten i tautau? Kase pot guaha para u fan riku gi ti apmam yan pagu ginen mabenden tanu`.

Gi hilu` este siha na diskuidu, i publiku ha dimemoria todus i chatbidan miyu maseha mamatkikilu kulan kinilu gi sagaña. Siempre u oppan sentimentoña gi otru sakan. Kontodu udu siem,pre u esalau na biahe.

Asuntun immigrasion gaige ennau na atoridat gi US Congress. Esta ma-amot Marianas nu ennau na pudet ya mapega gi US Immigration. Machogue este pot hagas ma-abisa Marianas para u aregla i manadan aminasu kontra empleau ginen hiyuñg.

Poresu, siña ta ekspressia diniskontento-ta, lau gi uttimu besis i US Congress solu siña mama` disision pot haye para u fan masede man-residente yan sudadanon Amerikanu. I ta fafama na sentimentu uma-ekuñgog lau solu fitme yan magahet na ginen i mayoria.

Ala kuenta i ginagau `nos kuantos i para ta presetba rasan natibu. Gi mismu tiempo machoneg asuntun casino ni uma`akontra yan i finenina na intension. Ke lau manu na plantiyas `nai manotohge hamyu? Un` huchum i petta dispues un` panag ya unna` atbettu?

Dispues, mañgge respetun miyu ni disision publiku ni dos biahe ha punu` este na prinipone? Kau hamyu` i man-gueku na sabiu ya taya` balen sentimentun publiku gi este na asuntu? Haf` linie` miyu gi `nai madiside este gi fina` plebliscite pot dos besis? Na ti dañkulu yan klaru na indikasion na tai inañgoghu i publiku ni disision lehislatura gi este na attikulu? Hafa gi palabra “NO” ti in` kemprende?

Haf` na para in` disatentuye disision i publiku?

Sessu teñga ta huñgog mañge` boñelus dagu gi tiempon Noche Buena. Megai sumasañgan mañge`ña este na bokan natibu. Megai ha` lokue` ti tumuñgu` fumatinas lau lagse` gi sekus niha.

I umestotobayu` i ginaguanña este na produktun gualu na tiempu. Gigon un` atrebi mamahan pues kase guaha suettemu dididi` `sino loddu` sueddomu. Gi halom tuhu` tila`hu `nai hu kakanu` este na golai haya. Ti linañgag ni sueddon retirau yan social security.

I asuntu taimanu `nai siña tafan sosobla dagu gaige gi dikiki` na sakrifisiu. Tanume tatten guma` dineku` dagu desde Ineru otru sakan. Siempre u doku`, famunu`, fañusu ya u lachog paire gi halom hatden-mu. Mientras tantos, tanume maseha kuattro iñgleran gihas kamute yan mendioka. Dalai ya ti u machuchuda` lamasamu aguon haya gi Disiembre otru sakan.

Hulie` amiguhu ha hahala i primet tapadan talaya. Mauleg kinine`ña na tiau yan otru siha man-dikiki` na guihan. Sumugu`yu` para bai` konbetsasiune.

Estaba lokue` gi ge`lichen si señot trosu, ma`gas tropan professot karisu ni tat tiha tuñgu`. Hu pasensiaye i konbetsasion pot para bai` taka` haf` masusesede giya siha.

Kumuentos si señot trosu asuntu siha ni mampos chagu` yan nina` siñan titanoshu. Hu akanteha para bai` lie` kau ha komprende haf` ha lalapbla. Todas sa` matompu` gi todu ineppeña.

I amiguhu talayeru ha patten tres i kinine`ña ya hana` fan mañage ham maseha para kelaguen mame guihe na taloane. Ti mefnu` lau anchu yan edukau kinemprendeña. Hu achetge ya hu diñgu i dos. Gai bale finatoghu hombre manae`yu` kelaguenhu.

Ti hu offisiona umadiñgan yan balakon trosu piot i hagas hu titeg leblun niha. Lokue`, ti sumugu`yu` pot si trosu na soluke amiguhu tantu. Probechosu tantoshu na biahe.

***

Gi bespiran Noche Buena, u fattu gasgas yan klaru na minagof ginen i korasonta gi selebrason mafañagon i Niño Jesus. Suette sa` i finattoña guiya numae` hit bendision esperansa para ta ta`lun prumupone ha`anita. Gaige este sustansiaña gi un` sunidonn Haliman. I finu` Karolinas si biuhu` Elias P. Sablan tumuge`.

Ayu na patte sumen na`mahalañg `nai ilegña, “Jesus Yuus mame, gi nuebu na sakan, gai ase` nu hame apatta i dañu; nae` nu i deskansu i mangaige `sta gi naftan yan ayu seha kasu matai na sakan”. Estague` na patte i muna` fan tutuhu` lago`ta gi Misan Gayu. Sin inbatgu, “Tafan Magof Todus”. Felis Noche Buena!