Didog Na Mina’añau

Hu akanteteha haf’ gaige gi hinassun i tautau na tiempu. Ti mapot hu soda’ sa’ sumen oppan ni achog’ silensiun chatagmag gi señgsoñg siha. Mampos te’ug i chathinassun todus na esta chumechefla gi aire.

Megai man-ma’añau haf’ mamamaila’ gi oppan na rimulinon lina’la’ miserable ni nina’ in’krusu ni baban ekonomia. De dios! Kada biradata man-matrukus hit subridan presiun nesessidat, gaselina, utilidat, amot, yan kontodu hanom.

Yangin hagas i prohimu ha upus i gualu, gaige pagu na duru man-dismonta, man-guasan yan mananom sa’ ennau ha’ kase solu koyentura ‘nai siña ha prebeniye familiaña.

Memegaiña na kinahulu’ atdau nubladu ya muñeru i ma’lag ha’ane. I minachum atdau, mas ha fugu’ siñienteta ‘nai chinaflulun ni atiluñg na mapagahes i sanlagu. Esta silensiu ayu na kanta i “Don’t worry, be happy….” Mampos bula na biahe trompison “unhappy”.

Megai na cho’chu’ man-mahuchum ‘nai man-hanau i bisnis siha. Megai man-tai che’chu’ ginen este na sinisede. Megaidumibibina haf’ futturon primet na gima’ familia gi halom este na rimulinu. Manadan famaguon man-dinagau ñaihon planun niha pot maribaha mas i fondun umeskuela (scholarship). Yangin siña, cha’mu sesede na un’ malañgu sa’ guaguan lokue i apas hospitat yan amot siha.

Hu lie’ antes finapos didog na pinadese. Lau taya’ parehuña i presente na ha’ilas gi katkuet kinalamten. Kulan chetnut ni hinetdan: ti amtiyun.

I mina’añau gi tautau chettun gi hinasson niha ya umakatga, sin ditension, este na sentimientu guatu gi lugat botasion siha pagu na Nobiembre. Yangin i man-ma’gas publiku ti amtiyun chetnot niha, pues buenu, maila’ tana’ suha ‘sino hita gi finu’ i kuentus “man-dada’da'”.

****

‘Nai esta i fuetsan pottanmonedan familia maliñgu, todu ma’tut i hafa hagas tafafahan sa’ malimitte gi mas man-presisu na nesessidat siha. Estague’ na eskalera i memegaiña pumadedese pagu.

Kuandu menos i mas mamoble na tautau-ta. Buente man-gai suette ayudun federat. Lau i pumalu ni man-gaige gi rayan ayudu lau ti man-kualifikau i mas pumadedese chinatsaga.

Mas man-inaminasa ‘an ma-utut i oran che’chu niha. Gaige ha’ gi hiyuñg raya lau ti siña gume’halom sa’ ti kualifikau manae’ ayudu.

Este na chinatsaga debi mohon i lehislatura yan administrasion ensegidas umalistuye pot para u atan haf’ mas na fina’ satbasion siña mana’ guahaye. Lau oppan finatane’ gi entalu’ niha mina ti siña machogue i mauleg para i publiku.

Klaru na ti makomprende haf’ che’chu offisiat publiku lau kada unu man-hula’ para u chogue obligasioña gi todu asuntu ni mauleg para i linahyan.

Ti este masusesede. Pot esso, mas maluñu i linala’ tautau-ta sin presisu. I kuestion: Kau para ta repite talu este na mañan offisiat pagu na eleksion?

****

I minachum atdau mampos triste finaposña. Ti sinede ni potput yan atiliuñg na magapahes fumatta i bonitun kulotña antes de u faliñgu gi sanlagu. Gi ge’halom, i tautau lokue’ mampos man-triste matan niha kulan mohon pa’gu mafattu notisia pot finatai gi familia. Ti yahu i ta pokakate pagu. Mampos silensiu i mamamaila’ na fina’ guafen milag achu’ botkan. Todu ha soda’ siempre u soñge sin ditension. Haf’ problemaña este? Kontodu hita hafa’ apu!

****

Sige un’ lancheru umaguaguat na mai’es tinanomña lau suni man-doku’. Mafaisen para u pega unai gi papa’ bintanaña para u lie’ kau gai lastru gi sigiente oga’an. Mattu i otru lancheru guihe na puennge ya ha fedus i fina’ plantau na unai. Dispues de mañgusecha, ha bali tatte pot not u anog lastroña.

Kada ratu ha mente na mai’es tinanomña ya umapunu gi haf’ pinegaña. Para bai’ apagat mohon na u para mumaneska estake togpuñg kosake siña ha pulan i fan gualu’an ya cha’ña si pindehu na u fattu mamega ta’lu suni lau mai’es matanom.

****

Estaba si Iku yan Duñg gi puntan pantalan iya Susupe mumaneneska. ‘Nai esta maipe, ha yute’gue’ si Iku. Gi biradaña hulu’, ha lagnos i petnan manog ginen betsaña ya sige ha ñgañgas.

Finaisen as Duñg manu ‘nai masuettegue’ petnan manog.

Ilegña si Iku, “Yute’ hau pare sa’ duru man-gupot guihe papa’!”

Sin ditension, ha yute’gue’ si Duñg. Ti apmam sige hulu’. Todu kahaga’ mataña. Mayamag.

Finaisen as Iku haf’ guaha, ilegña, “Lapekaras pare sa’ duru man-mumu ni man-bulachon niha”.

Era, ha yute’gue’ si Duñg gi na’tata na lugat. De dios!

****

I ekonomia kulan un’ malañgu gi ICU. Un’ dalalai hilu gumugu’ut ha’aniña lau ta pacha puntan adeñgña ya ta faisen papa’, “Mamauleg ha’?” A`Saina uttimu agonias ya para ta atrebi kuestion inosenteria?

*****

Sige i amiguhu Magoo chumaleg tuyan ‘nai in’ diskukute kareran man-sabiu na sakan ‘an mahuyuñg para u fatta i hagas dinage ni mana’ mamtu’ gi halom sekus niha.

Ilegña na siempre u fan maisen, “Ta’lu un’ biahe”.

Ineppe as Pindeha, “Dinancheña, ‘polu esta otru biahe'”.

“Hombre, na’e chansa is los fatigau”.

“Otru biahe mas propiu na ineppe!”