Achu’ gi kanton lamasan tasi

Desde kuattro mit años antes man-estaba man-dañkulon paderon gi kanton lamasan tasi yan kantit. Adumididi’ kinanu’ i pisu ni man-dañkulun napu, diariu. Siempre un’ dia u fan basnag gigon gueku haligin niha.

Parehu este na finapos achu’ yan i programan man-ritirau ni adumididi’ kinanu’ i halige ni un’ manadan napun dispetdisiu ginen i man-ma-elihe. Mana’ guahaye lai ‘nai i administrasion para u disidi añgaian ‘nai para u fan apase.

Este na lai i tumutuhon muna’ kohu i fondun programan man-ritirau. Mana’ pinalo’pu’ este ‘nai man-sabiun lehislatura hana’en maisa siha tres pot sientu na subrida gi kada sakan. I man-sabiu mismu muna’ dañau i programa sa’ mampos megai na kanai gi halom tarun inasnen tukon.

Dispues, kulan kustumbre i bisiun mafuegu i asuntu ‘lau i akague na kanai tiha tuñgu’ hafa bidadaña i agapa’. De dios mihu! Sin inbatgu, mampos gueku esta i pisun programan man-ritirau ya mauleg ta abirigua i man-sabiu kau guaha kabales na satbasion sineda’ niha.

****

Finenina ha rega i mafanana’an “asigan haane” gi hilu achu’ rubentasion. ‘Nai monhayan i tautau manmanhoka para uson niha, hana’ tinatiye nu i sagun atulai, tinilada pot tinilada. Man-ma’agañg todu i tautau gi señgsoñg para u machule’ patten niha. Kontodu man-malañgu ni man-estaba Saipan mana’ fan mañage.

Ayudu na sumen dañkulu este na regalon ginen i Saina, piot para todu familia ni fumafana’ pipinu’ na apas kandet. Ayudu lokue’ ‘nai ma-asnen tukun i seblante para uson familia dispues. I mas likidu na asuntu guine na suette ginen hilu’ i mapatten atulai gi kada guma’. Trabiha memetgot ha’ tradision sensian komunida. Bien prubechu para i mañeluta siha!

****

Iya Luta ‘nai gaige hale’ DelRosario sa’ ayu na isla ‘nai ha tutuhongue’ i familia. Machalapon dispues papa’ esta Guam, hulu’ Marianas yan Pohnpei. Dañkulu respetuthu nu i edda’ ‘nai ma-imprinta lastron gueloghu yan guelaghu. Maseha ñgaian na tiempu, iya Luta motmut kampu gi korasonhu kumu tanu’ primet mañainahu.

Sige machalapon i familia entre isla siha. Guaha na Rosario ilegña familian siboyas. Guaha lokue familian ñgañga’. Tihu tuñgu manu ham na patte ‘nai man-gaige. Lau ta polu, pot para chaleg ha’, kumu familian ahus yan manog! Lau yahu humusga ginen manu mage ennau i siboyas yan ñgañga yan hafa estoriaña.

****

Guaha siha famaguonta ginen Tinian yan Luta man-eskuekuela gi Northern Marianas College. Ha kone’ mage famaguon niha kumu unika saina. Ha tutuhon un’ dañkulu na sakrifisiu ‘nai hana’ ma-utot i kandet apartment pot para u guaha dididi’ para kinanu’ niha yan otru nesessidat familia.

Tantu de abarambau malagnos salape’ scholarship, esta ni para kinanu’ niha hokog gi hilu todu sakrifisiun niha. ‘Nai esta ni mona ni tatte, man-basta man-eskuela ya bira siha tatte gi tano’ niha. Hita mismu sumapet este siha na estudianteta. Hita mismu humuchom appottunidat niha makomple guinifen niha manma-eduka. Ai bidaña i programan scholarship!

****

Guaha ma’añau matai sa’ siempre pumara humaguñg. Entre guahu ha’, “Ke lau desde ñgai’an i matai ‘nai sige ha’ humaguñg? Hmmm! Mañan tatamudu!

****

Ilegña un’ daibites gi otru daibites, “Yangin mampos mames haga’mu, sumuke hau dididi’ asiga ya u tinempla tatte”. De dios! Achcha baba ha’ i asiga yan asukat para i chetnot mames haga’.

****

Masañgane i intetprete ni mediku gi finu Iñglis, “Tell him that as soon as the tests are done, we’d give him a shot and proceed with the surgery”. Ha birague’ i intetprete ya ha sañgane i malañgu, “Ilegña i mediku na gigon monhayan hau mariseta, para un’ mapake dispues ‘nai operasion”.

Umesalau hulu’ i malañgu, “Ha? Hamyu pagu para in’ pinu’yu’ guine? Kone’yu pagugu ha’ tatte gi plasan batkon aire ya bai birayu para Saipan”. Dispues ‘nai ma-esplilika hafa finu i mediku.

****