Previous Story
Un` Bachet Na Peskadot
|
Posted on Apr 05 2009
Author’s Note: This is a story of a blind uncle who fished in the lagoon from early evening `til dawn. I thought it’s nice to share it. MVB (now MVA) picked it up years ago and used it as a feature of a unique experience.
[I]Deste brinabuña, hagas munanañgo gi halom rubentasion Saipan yan kontodo Mañagaha. Megai na guihan kinine`ña pareho ha` para uson i gima sino checho` familia yan linahyan. Sige mona ha dimimoria sagan difirientes klasen guihan.
Paire na peskadot deste antes ayo na sainahu. Kontodo sagon mañahag yan atulai todo ha dimemoria. Este siha na tiniñgoña sige ha fanague famaguoña siha. Kontodo otro siha manhoben man-eyag ginen hagas man-paire na peskadot.
Todo peskadot nu`i kumomprende sustansian halom tase, siempre i primet kineni maseñala para si guelo, konrespeto. Este na mañan peskadot todo man-paire prumaktitika. Tatnai fatta este na respetu piot gi man-amko siha na peskadot.
Lao dispues bumachet i sainahu. Mampos triste gi primet biahe `nai ti siña esta man-lie`. Sige man-hasso hafa i ha fafana` yan kao siña humuyoñggue` pumeska talo. I chinatsagaña ti chinatsaga para guiya. Manago` na umapolu botiña gi kanton tase `nai sumasaga. Gi un` minachom atdao, humuyoñg ya sige ha pogsai i botiña para entalo Susupe yan Oleai.
Ha dagao i añkla gi rubentasion yan i inai. Ha gotde i katnada gi haguit ya ha tutuhon umetupag. Tulanoche mañgone` mafuti, satmunete, gadao, sas yan otro siha guihan. Dumeskansa gi tatalo` pueñge sumena. Ha yuyute ñganan hinegsa` gi un` bandan bote kulan pugi. Dispues chumupa antes de u tutuhon talo umetupag.
Gi todo hinanaoña, mampos na chatsaga` na u dimalas sa` bachet yan inutet i sainahu. Lao todo kareraña tatnai huhuñgog na aksidiente, abag sino maliñgo. Megaiña besis `nai mehna ke dimalas. Silensio gi todo kinalamteña entalo `nai humuyoñggue estake u fatto tatte.
Hu faisen haf` taimano na siñague pumeska lao bachet yan haf` tuñgoña amano na direksion ha fapoposgue. Ha esplika gi taiguine:
“I pañgpañg tase gaige gi sanlago gi mattiñgan. I otro pañgpañg gaige gi chepchup tase. Hu e`ekuñgog pañgpañg napun dikiki `an hihotyu gi pantalan. Sige hu pogsai adumididi estake libreyu pumogsai katan.
“Hu ayeg lugathu hihot yan i mattiñgan antes baihu yute` i añkla. Hu tutuhon umetupag esta`i `nao i oran `las dose. Dumeskansan ñaihonyu pot para bai` sena. Dispues sigeyu talo umetupag.
“Gi biradan peska, hu e`ekuñgo atban Gima Yuus Chalan Kanoa `sino un` gayu gi sanlichan. Señat na matto esta chagchag chatagmag. Hu tutuhon tumulosyu luchan para iya hame”.
Manmatto i famaguoña ma-ayudaye i amko. Magonaf i guihan siha ya mapreparaye amotsaña. Dumeskansa esta`i pupueñge talo. Estague` un` estorian bachet na peskadot. Si Yuus Maase`![/I] [B]John S. DelRosario Jr.[/B] [I]As Gonno, Saipan[/I]
