Politikan Uttimu Suspirus

Todu baba na tinituhon siempre baba lokue’ uttimoña. Kulan taiguine masusede gi mapos na semana ’nai umanae’ i ginen gobietno yan gobietno pagu (Juan N. Babauta yan Benigno R. Fitial) ni siyan kabesanten i pattidan republican.

I intension i para umana fitme mas i pisun pattida huyuñg esta’i señgsoñg. Lau namatman sa’ i membron republican gi lehislatura ti man-makombida para ayu na hunta ’nai ma-elihe si Fitial kabensante. Lokue’, repara sa’ ni unu gi dos (Babauta/Fitial) lamauleg administrasioña.

Guaha chinatsaga gi este na tinilaika. Machoguen papa’ troñkun niyog i nuebu na areglu pot para umana’ sulun halom si Fitial. Namase’ sa’ ’nai sumuberu’ halom, fuetsau ha pua huyoñg galon pot galon na hanom ginen sagan fan-o’mag republican. Hokog hanom ya memegaiña man-hanau ke umadalalag pumalapa gi halom tai sinahguan na swimming pool.

I para u kone’ halom na membron Covenant kase ’nos kuantos. I para u diniñgu i republican pot guiya pagu kabesante, lamegai. Pues i unu hana’ pinite mientras i otru ha aminasa sin presisu. Maseha hafa madisidi ni republican siempre u anog klaru hafa diniskontentun niha ni primera lehitimu. I tautau mama’ tatautau yangin siña ha sustene dignoña ’nai ha embrasa todus. Para i man-machanda gi un’ banda, na fan fitme hamyu gi disision miyu sa’ mangai dignu hamyu.

—

Gi otru semana tutuhon i haanen gupot siha desde Thanksgiving Day. Sumen namagof na okasion kumu haanen familia gi enteru iya Marianas.

Guaha dididi’ chinatsaga kau para ta gasta pottanmonedan familia gi mafahan pabu ’sino ta polu gi un’ banda para apas CUC. Este na disision gaige gi matriatka yan patriatkan familia.

Pesonatmente, ti mapot este na selebrasion giya guahu mismu. Esta listu i latan satdinas asaite para bai’ fadene guennau na haane. Ti na’mamahlau sa’ estague’ na totche pabun mamoble guine gi tano’ta.

I ginatboña este na selebrasion i ha tutuhongue’ gi tinayuyot familia gi oran sena. Tanae’ i Saina agradesimientu pot todu i bendisionta maseha sumen makat i kinalamtenta na biahe. Patte este na haane gi tradision relihionta ni ta abiba halom desde uttimon siñkuenta siha na sakan. Umafagcha’ yan hineñgeta kumu mañgatoliku.

Fan mannae’ agradesimientu ya in’ fan mangagau lokue mas bendision sa’ siempre i Saina u gaige gi fihonta para u konsuela yan u pipet hit mona gi halom katma yan pagyun lina’la’. Guaha esperansa gi inañgokota gi fitme yan tai achaigua na fuetsan i man-nanae’ lina’la’.

—

Hu e’ekuñgo siha i man-nuebu na attistan kantan natibu. Guaha man-mauleg, guaha lokue ni ma-alaguane tai suette gi diu. Lau polu pot chechu’ animu. Mina’ hu mente este sa’ lamegai gi mantuge’ man-atotpe mensahe gi halom mismu kanta. Pot ihemplo, ilegña i unu na estague’ listu para u hanau “sa’ estayu’ tiyamu”. Dispues mamaisen “hafa neni disposisionmu?” Ai, ihu, yangin esta madispacha hau, haf’ na para un’ kuestiona talu i palaoan hafa disisioña?

Sige mona, lamegai sineyu’ para u fanachu i Chamorro ya umadefende i kutturan niha. Dididi’ na’tatah i finaisen gi katkuet manera. Rason? Haye kumeke amot hit nu i kutturata? Na ti asuntu gaige gi sinatton natibu umeksisia kutturaña dimas de u ke sahguan gi halom taru pot presetbasion? Pot ihemplo: I uttimu sasyan satbasion kuttura ’sino tradision gaige gi usun i liñguahen Chamorro. Ahe’ ti kuantu na konfirensia pot para ta repite i hagas man-mansañgan desde alacha siha na tiempu.

—

I modetno na linala’ta mampos kulan ha traba hit. Antes, tres pesus i apas kandet ya memegaiña gi neñgkano’ta ginen i gualu yan tasi. Todu usuta mafattu ginen minasahalomta.

Matulaika este fuetsau piot ’nai humalom i “surcharge” ni fumufunas pottanmonedan familia antes de u fattu gi gima’. Dispues, guaha lokue ayudon food stamps para i numesessita lau ayudu ginen i kalaguag manman-apapase kontribusion tax halom gi kahan federat.

Ti hu kuestiotiona i ayudon neñgkano’ gi tautauta pot rason na pot diskuidon man-ma’gasta na mangaige siha gi este na modun linala. Lau i puntu: megai obligasion familia ni humohogse kantida na tautauta. Ha inklusu apas hinemlo’ deste setbisiu yan insurance, tatkilu’ na apas kandet, tatkilu’ na nesessidat familia siha, obligasion apas primet gima’ familia. Lau gi mismu tiempu i pottanmondean familia entre tabla ’sino seru. Aminasu siha gi modetno na linala’ natibu.

—

’Nai poduñg i kinalamten sasyan i tanu ni mafanana’an ekonomia, gigigu este yan ma-umentan chechu satbahe yan babarias gi enteru komunida. Lamayot patte gi este na problema finañagu ni taya’ chochu’. Ti na’magof este sa’ oppan na diskuidon i man-ma’gas i tanu.

Tineteka lokue kuantu malulogña i prohimu gi finanaguen modun linala’ espirituat. Yangin chatfitme gi pisu, pues un’ ratu ha’ gumama gi halom tadoñg na tasin diskuidu ’sino linache. Pot este na rason na presisu inna’ fan madottrina i famaguon miyu mientras man-eskuekuela. Sumen fitme na finana’gue i para u yute’ añklan espiriuat pot no u lailai gi taduñg na tasin babarias. Si Yuus Maase’, si JR.